क्लासिक टेकद्धारा समाचार साइट ‘ब्लक’ गरेकोमा पत्रकार महासंघको गम्भीर ध्यानाकर्षण

काठमाडौं ।

निजी कम्पनी क्लासिक टेकले समाचार प्रकाशित गरेको विषयलाई लिएर इन्टरनेट सेवा प्रदायक ओबी मिडिया प्रालिको अनलाइन प्रकाशन बन्द गरिदिएकोमा नेपाल पत्रकार महासंघले गम्भीर ध्यानाकर्षण जनाएको छ।

क्लासिक टेकले समाचार साइट आवरविराटनगर डट नेट (www.ourbiratnagar.net) लाई ‘ब्लक’ गरेको घटनाप्रति पत्रकार महासंघले विज्ञप्तीमार्फत आपत्ति समेत जनाएको छ।

भदौ ११ गते विराटनगरस्थित क्लासिक टेकको सेवा केन्द्रमा सेवाग्राहीले तालाबन्दी गरेको समाचार प्रकाशन गरेको विषयलाई लिएर उक्त अनलाइनलाई ‘ब्लक’ गरिएको थियो ।

प्रकाशित समाचारप्रति चित्त नबुझे या गुनासो रहे त्यसउपर कानुनी उपचार खोजिनु पर्नेमा इन्टरनेट सेवा प्रदायक कम्पनीबाटै यसरी अनलाइन सेवालाई ‘ब्लक’ गरी प्रतिबन्ध लगाइनु कानुनविपरीत हुनुका साथै प्रेस तथा अभिव्यक्ति स्वतन्त्रतामाथि समेत हस्तक्षेप भएको महासंघको ठहर छ ।

महासंघले यस्ता कार्य नदोहोर्याउन र तत्काल प्रतिबन्ध हटाउन सम्बन्धित निकायको ध्यानाकर्षण गराएको छ।

साथै, उक्त कम्पनीलाई कारबाहीका लागि महासंघले नियमनकारी निकाय नेपाल दूरसञ्चार प्राधिकरणलाई आग्रह गरेको छ।

यसअघि सो अनलाइनले क्लासिक टेकको विराटनगर ट्राफिक चौकस्थित शाखा कार्यालयमा सेवाग्राहीले तालाबन्दी गरेको समाचार प्रकाशित गरेको थियो । अनलाइनले गुणस्तरीय सेवा प्रवाह नगरेको भन्दै सेवाग्राहीले शुक्रबार कार्यालयमा तालाबन्दी गरिदिएको उल्लेख गरेको थियो ।

सोही समाचार प्रकाशित गरेको विषयमा क्लासिक टेकले सो अनलाइन साइट आफ्नो नेटवर्कमा बन्द गराएको थियो ।