काठमाडौं ।
अमेरिकामा फाइभजी मोबाइल प्रविधिको प्रयोग हुन थालेपछि एयर इन्डियाको आज बुधबार अमेरिकाका लागि उडान रद्द गरिएको छ। यस्तो भएको हो। एयर इन्डियाले आफ्नो दिल्ली-न्यूयोर्क, दिल्ली-सान फ्रान्सिस्को, दिल्ली-शिकागो, मुम्बई-न्यू जर्सी उडानहरू बुधबार सञ्चालन नगर्ने जानकारी दिएको छ। यसका साथै एयरलाइन्सले दिल्लीदेखि वासिङ्टन उडानको समय तालिका पनि तय गरेको छ।
फाइभजी नेटवर्कले विमानको सञ्चार प्रणालीमा ठूलो समस्या आउन सक्ने भन्दै एयर इन्डियाले उडान रद्द गर्ने निर्णय गरेको जानकारी दिएको छ। अन्य धेरै एयरलाइन्सले पनि एयरपोर्ट वरपर फाइभजी प्रविधिका कारण खतरनाक समस्या आउन सक्ने बताउँदै आएका छन्। त्यसलाई ध्यानमा राख्दै फाइभजी प्रविधि धावनमार्गबाट दुई माइलको दूरीमा राख्नुपर्ने उनीहरुको भनाई छ।
फाइभजीका कारण टेकअफ र ल्यान्डिङका क्रममा विमानका उपकरणमा समस्या आउन सक्ने विश्वभरका एयरलाइन्स अधिकारीहरूले चिन्ता व्यक्त गरेका छन् । अधिकारीहरूको यो चिन्तालाई ध्यानमा राख्दै, मोबाइल सेवा कम्पनी एटी एण्ड टी र भेरिजोनले केही एयरपोर्टहरू नजिक फाइभजी सेवाको उपलब्धतालाई सीमित गर्नेछन।
विमानको उचाइ मापन गर्ने क्षमता प्रभावित हुन सक्छ
केही एयरलाइन्सका सीईओले अमेरिकी यातायात सेक्रेटरीलाई पत्र लेखेका छन् जसमा आवश्यक स्तरोन्नति वा उड्डयन उपकरणमा परिवर्तन नगरी फाइभजी लागू गरियो भने ठूलो दुर्घटना हुनसक्ने बताएका छन्। ५जी प्रविधिका कारण विमानको उचाइ नाप्ने क्षमतामा असर पर्न सक्छ।
युनाइटेड एयरलाइन्सका सीईओ स्कट किर्बीले यदि दूरसञ्चार कम्पनीहरूले एयरपोर्टहरू नजिक फाइभजी प्रविधि प्रयोग गरेमा उनीहरूको सञ्चालनमा नकारात्मक असर पर्ने चेतावनी दिएका छन्। महत्त्वपूर्ण एयरपोर्टहरू नजिक ५जी प्रविधिको प्रयोगबाट बच्नुपर्ने उनको सुझाब छ। मोबाइल सेवा कम्पनी एटी एण्ड टी र भेरिजोनले एयरलाइन्सको चेतावनीका कारण ५जीको सुरुवात दुई पटक स्थगित गरेका छन्।
हजारौं उडान अवरुद्ध हुने डर
अमेरिकी उड्डयन नियामक एफएएले बताएअनुसार यसले ट्रान्सपोन्डरहरूलाई निश्चित ५जी क्षेत्रहरूमा सञ्चालन गर्न अनुमति दिएको छ। फाइभजीको सी–ब्यान्डबाट प्रभावित हुन सक्ने ८८ विमानस्थलमध्ये ४८ वटा नयाँ प्रविधिका लागि स्वीकृत भएका छन् । अप्रमाणित उपकरणका कारण यी विमानस्थलमा हजारौं उडान अवरुद्ध हुन सक्नेमा एयरलाइन्सहरू चिन्तित छन् । हालको फाइभजी वायरलेसका कारण एक वर्षमा १५ हजार उडान र १२.५ लाख यात्रु प्रभावित हुने युनाइटेड एयरलाइन्सले सोमबार जनाएको छ।
प्रकाशित: ५ माघ २०७८, बुधबार
