एप्पल वाच सिरिज ७ भारतमा सार्वजनिक, अक्टोबर ८ देखि किन्न पाइने

काठमाडौं ।

एप्पलले आफ्नो वाच सिरिज ७ भारतमा पनि सार्वजनिक गरेको छ।

कम्पनीले यो सिरिज आईफोन १३ सँगै सार्वजनिक गरेकोमा भारत लगायत अन्य थुप्रै देशमा कहिले उपलब्ध हुने भन्ने खुलाइएको थिएन।

यसै क्रममा अब भने यो वाच भारतका ग्राहकहरुले पनि किन्न पाउने भएका हुन्। यो सिरिज कम्पनीको महंगो र सबैभन्दा प्रिमियम वाच हो।

अक्टोबर ८ बाट खरिद गर्न सकिने

यो वाचको बिक्री स्थानीय समय अनुसार ८ अक्टोबर साँझ ५ बजेबाट शुरु हुने बताइएको छ। अफलाइन खरिद गर्नका लागि भने अर्को एक हप्ता अर्थात् अक्टोबर १५ सम्म कुर्नुपर्नेछ। कम्पनीको सूची अनुसार यो मोडलको शुरुवाती मूल्य ४१, ९०० तथा सबैभन्दा बढी मूल्य ७३, ९०० भारुसम्म पर्ने बुझिएको छ।

यस्तो छ स्पेसिफिकेशन

एप्पलको वाच ७ सिरिजमा आउटडोर साइक्लिङका लागि अझ राम्रो सपोर्ट दिइएको छ। साइक्लिङ गर्न रोकेपछि वाचले वर्कआउट सेसनलाई आफैं काउन्ट बन्द गरिदिन्छ।

फल सपोर्ट फिचरले बाइक वा कुनै ट्रिपका क्रममा दुर्घटना भएमा इमरजेन्सी सेवासँग सम्पर्क गरिदिन्छ। फिटनेस प्लस एपका माध्यमबाट आफ्नो वर्कआउटलाई आफ्ना साथीहरुसँग शेयर गर्न सकिन्छ।

वाच एल्युमिनियम भेरिएशनका ५ कलर अप्शनमा ब्ल्याक, गोल्ड, ब्लू, रेड तथा डार्क ग्रीनमा किन्न सकिनेछ।