Technology Khabar १३ श्रावण २०७८, बुधबार
काठमाडौं ।
फेसबुक मातहतको सहायक एप इन्स्टाग्रामले सुरक्षालाई मध्यनजर गर्दै एपमा केही परिवर्तन ल्याउने भएको छ।
यो परिवर्तन अनुसार अबदेखि १६ र केही देशहरुमा १८ वर्षमुनिको जो कोहीले इन्स्टाग्राम एकाउन्ट साइन अप गर्दा उनीहरुका एकाउन्ट स्वत: प्राइभेट हुनेछ। तर पब्लिक गर्ने अप्शन भने उपलब्ध नै हुनेछ।
यो उमेरभन्दा मुनिका जो कोही पब्लिक एकाउन्टमा छन् भने उनीहरुलाई प्राइभेटमा स्विच गर्न प्रोत्साहन गर्ने खालका नोटिफिकेशन पठाइने पनि कम्पनीले जनाएको छ।
इन्स्टाग्राम युवा यूजरहरुका एकाउन्ट प्राइभेट बनाउन लागिपरिरहेको छ। गत मार्चमा भर्खरै साइन अप गर्दै गरेका नाबालिगहरुलाई यसले आफ्ना एकाउन्ट प्राइभेट बनाउनुका फाइदाबारेको मेसेज पठाउन शुरु गरेको थियो। अहिले उसले ‘प्राइभेट’ लाई डिफल्ट बनाउन प्रयास गरिरहेको छ।
फेसबुकले पनि विज्ञापनकर्ताहरुले १८ वर्षमुनिका लाई लक्षित गर्ने आधारहरुबारे केही परिवर्तन ल्याउने योजनामा रहेको छ।
यसअघि कुनै पनि उमेर समूहका यूजरलाई उसको रुची र गतिविधि, उसको वेब ब्राउजिङ हिस्ट्री, एपको प्रयोग आदिका आधारमा विज्ञापनको लक्ष्य बनाउन सकिन्थ्यो।
तर अब भने विज्ञापनकर्ताहरुले १८ वर्षमुनिका यूजरलाई अन्य आधारमा नभइ उनीहरुको उमेर, लिङ्ग र ठाउँका आधारमा मात्र लक्षित गर्न सक्नेछन्।
यो नियमा फेसबुक, मेसेन्जर र इन्स्टाग्राम सबैमा लागू हुनेछ।
इन्स्टाग्रामका हकमा भने कम्पनीले १६ वर्षमुनिका यूजरसँग अन्य व्यक्तिले कत्तिको दु:ख दिने हिसाबले कुराकानी गरेका छन् त्यसका आधारमा उनीहरुका सर्चमा वा एक्सप्लोर, रील्स वा एकाउन्ट सजेस्टेड फर यू पेजमा पनि १६ वर्षमुनिका यूजर एकाउन्ट नदेखिने बनाउने बताएको छ।
प्रकाशित: १३ श्रावण २०७८, बुधबार
