साउदी अरेबियाद्वारा १८ अर्ब डलरको डाटा सेन्टर बनाउने रणनीतिक योजना सार्वजनिक

काठमाडौं ।

साउदी अरेबियाको सञ्चार तथा सूचना प्रविधि मन्त्रालयले देशभर ठूला डाटा सेन्टरका लागि नेटवर्क निर्माण गर्न १८ अर्ब डलरको योजना सार्वजनिक गरेको छ।

सरकारले साउदी अरेबियालाई यस क्षेत्रकै डाटा सेन्टर हबका रुपमा विकसित गर्न खोजेको बताउँदै यो लक्ष्य प्राप्तिका लागि मन्त्रायलले यसका लागि निजी क्षेत्र तथा स्थानीय र बाह्य लगानीकर्तासँग साझेदारी गरिरहेको जनाएको छ।

यसबारेमा दूरसञ्चार तथा डिजिटल पूर्वाधार मन्त्री बस्सम अल बस्समले भनाक छन्, ‘हामी साउदी भिजन २०३० को आउँदो चरणमा स्थानीय च्याम्पियनहरुलाई ठूलो भूमिका निर्वाह गर्न सक्षम बनाउँदैछाैं। यसको मुख्य उद्देश्य क्लाउड सेवा प्रदायक, गेमिङ प्रकाशक, भिडियो स्ट्रिमिङ सेवा प्रदायक तथा कन्टेन्ट डेलिभरी नेटवर्क अपरेटरजस्ता डिजिटल लगानीकर्ताहरुलाई आफ्ना सेवा देशभर स्थानीयकरण गर्ने कुरामा आकर्षित गर्नका लागि आवश्यक सह-स्थान क्षमताका डाटा सेन्टरको वृद्धिलाई उकास्नु हो।’

गल्फ डाटा हब, अल मोआमार इन्फर्मेशन सिस्टम्स तथा साउदी एफएएस होल्डिङ कम्पनीलाई यसै हप्ता उक्त रणनीतिका मुख्य लगानीकर्ताको पहिलो समूहका रुपमा सार्वजनिक गरिएको थियो। यो परियोजनाका लागि अमेजन तथा गुगलजस्ता विश्वकै जायन्ट कम्पनीहरुसँग पनि छलफल भइरहेको बुझिएको छ।

‘यी तीन लगानीकर्ता मुख्य व्यावसायिक नियममा सहमत भइसकेका छन्। हामी आउँदा महिनाहरुमा यो परियोजनामा अन्य थुप्रै कम्पनी सहभागी हुने अपेक्षामा छै’, सन् २०३० सम्ममा १८ अर्ब डलर लगानी आकर्षित गर्ने लक्ष्यतर्फ इंगित गर्दै मन्त्रालयले बताएको छ।

मुलुकमा भिडियो स्ट्रिमिङ सेवाको माग अत्यधिक भएका कारण धेरैभन्दा धेरै डाटा सेन्टर बनाउनु परेको बुझिएको छ।

यो मागलाई पूरा गर्न मन्त्रालयको लगानी योजनाले यो दशकको अन्त्यसम्म १३०० मेगावाटको लक्ष्य पूरा गर्नेगरी डाटा सेन्टरको विकास गर्ने लक्ष्य लिएको छ।

साउदी अरेबियामा आगामी ५/६ वर्षमा ३६० मेगावाटसम्मको डाटा सेन्टर आवश्यक पर्ने देखिएकोमा हाल जम्मा ६० मेगावाट मात्र उपलब्ध रहेको बुझिएको छ।

हाल एसटीसी, मोबिली, अबुनय्यान तथा एदारत जस्ता संस्थाहरुले देशमा डाटा सेन्टर चलाइरहेका छन्। नयाँ डाटा सेन्टर बनेपछि यसमा मुख्य ग्राहक सरकार, ठूला प्राधिकरणहरु तथा दूरसञ्चार सेवा प्रदायकहरु हुनेछन्।

एसटीसीले गत डिसेम्बरमा लगभग १ अर्ब रियालको लगानीमा रियाध जेद्दाह तथा मदिनामा गरी तीन ओटा डाटा सेन्टर निर्माण गर्ने घोषणा गरेको थियो।

यो एसटीसीको डाटा सेन्टर रणनीतिको पहिलो चरण हो। कम्पनीले दोस्रो चरणमा थप ४ ओटा डाटा सेन्टर थपेर जम्मा ४०.८ मेगावाट क्षमताको योगदान गर्ने लक्ष्य लिएको छ।