ताजा समाचार

एन्थ्रोपिकको वार्षिक आम्दानी ६५ अर्ब डलर पुग्यो

एन्थ्रोपिकको वार्षिक आम्दानी ६५ अर्ब डलर पुग्यो
Global IME Bank

एन्थ्रोपिकको आम्दानी ऐतिहासिक गतिमा बढ्नुका साथै वृद्धि दर पनि तीव्र हुँदै गएको छ।

एआई मोडल निर्माता कम्पनीको वार्षिक आम्दानी रन रेट अर्थात् हालैको छोटो अवधिको आम्दानीका आधारमा पूरै वर्षको आम्दानीको अनुमान जुलाईको अन्त्यमा ६५ अर्ब डलरभन्दा बढी पुगेको ब्लुमबर्गले सोमबार जनाएको छ। यो मे महिनाको ४७ अर्ब डलर र गत वर्षको अन्त्यमा रहेको ९ अर्ब डलरभन्दा धेरै हो।

एन्थ्रोपिकले यसबारे टिप्पणीका लागि गरिएको अनुरोधमा तत्काल प्रतिक्रिया नदिएको टेकक्रञ्चले उल्लेख गरेको छ।

कम्पनीका लगानीकर्ताहरूले बाँकी वर्षमा पनि आम्दानी करिब यही दरमा बढ्ने अपेक्षा गरेका छन्। फाइनान्सियल टाइम्सका अनुसार सन् २०२६ को अन्त्यसम्म एन्थ्रोपिकको वार्षिक आम्दानी १०० अर्बदेखि १२० अर्ब डलरसम्म पुग्न सक्छ।

यसैबीच, प्रतिस्पर्धी कम्पनी ओपनएआईको आम्दानी पनि दोब्बर हुँदै ४० अर्ब डलर पुगेको छ। ब्लुमबर्गका अनुसार सन् २०२५ को अन्त्यमा ओपनएआईको आम्दानी २० अर्ब डलर थियो।

दुवै कम्पनीले आफ्नो आम्दानी मापन गर्ने तरिका फरक तरिकाले प्रयोग गर्न सक्ने भए पनि एन्थ्रोपिकको आम्दानी वृद्धिले ओपनएआईको तुलनामा लगानीकर्तालाई बढी आकर्षित गरेको छ।

दुवै कम्पनीले गोप्य रूपमा आईपीओसम्बन्धी कागजात दायर गरेका छन्। एन्थ्रोपिक ओपनएआईभन्दा अघि नै सार्वजनिक सेयर बजारमा प्रवेश गर्ने अपेक्षा गरिएको छ। यो सम्भवतः यसै शरद ऋतुमा हुन सक्छ।

फाइनान्सियल टाइम्सका अनुसार एन्थ्रोपिकले सार्वजनिक बजारमा २ ट्रिलियन डलर वा त्यसभन्दा बढी मूल्यांकन हासिल गर्ने लक्ष्य राखेको छ। यस्तो भएमा यो अहिलेसम्मकै सबैभन्दा ठूलो बजार प्रवेश हुनेछ।

एन्थ्रोपिकको पछिल्लो मूल्यांकन मे महिनाको अन्त्यमा ९६५ अर्ब डलर गरिएको थियो। त्यतिबेला कम्पनीले ६५ अर्ब डलरको लगानी जुटाएको थियो।

Sajilo Visa
easy care