काठमाडौं ।
मेटाले आफ्ना विभिन्न सामाजिक सञ्जाल प्लेटफर्ममा सशुल्क सदस्यता सेवा ल्याउने योजना बनाएको जानकारी गत महिना सार्वजनिक गरेको थियो। अब इन्स्टाग्राम प्लस सेवा विश्वव्यापी रूपमा सुरु भएको छ। कम्पनीले सशुल्क प्रयोगकर्ताले प्राप्त गर्ने सुविधाबारे थप जानकारी पनि सार्वजनिक गरेको छ।
यस सेवाका अधिकांश सुविधा सामग्रीलाई धेरै वा लक्षित दर्शकमाझ पुर्याउन केन्द्रित छन्। स्टोरी स्पटलाइट सुविधाले साथीहरूका लागि प्रयोगकर्ताको प्रोफाइललाई प्राथमिकतामा राख्छ भने स्टोरी एक्सटेन्डले २४ घण्टापछि हराउने स्टोरीलाई ४८ घण्टासम्म देखिने बनाउँछ। सदस्यहरूले विभिन्न दर्शक सूची बनाउन र कुनै स्टोरी कुन समूहले हेर्न पाउने भन्ने छनोट गर्न सक्नेछन्।
इन्ग्याजेटका अनुसार यसका साथै स्टोरी प्रकाशित गर्नुअघि पूर्वावलोकन गर्न सकिने, स्टोरी कति पटक पुनः हेरियो भन्ने तथ्यांक प्राप्त हुने तथा स्टोरी हेर्ने व्यक्तिहरूलाई खोज्न सकिने सुविधा पनि उपलब्ध हुनेछ। यदि कुनै सामग्री मुख्य फिडमा देखाउन नचाहेमा प्रयोगकर्ताले त्यसलाई सिधै आफ्नो प्रोफाइल वा हाइलाइट्समा प्रकाशित गर्न सक्नेछन्।
सेवामा केही व्यक्तिगत अनुकूलनका विकल्प पनि समावेश छन्। सदस्यहरूले विभिन्न एप आइकनमध्ये छनोट गर्न सक्नेछन् र आफ्नो बायोका लागि फरक फन्ट प्रयोग गर्न पाउनेछन्। उनीहरूले आफ्नो प्रोफाइलको शीर्ष भागमा छवटा सामग्री पिन गर्न सक्नेछन् भने साथीहरूको स्टोरीमा प्रतिक्रिया दिँदा एनिमेटेड ‘सुपर हार्ट’ पठाउन पनि सक्नेछन्।
मेटाले आगामी महिनाहरूमा थप सुविधा थपिने जनाएको छ। इन्स्टाग्राम प्लस सदस्यताको शुल्क प्रतिमहिना ३.९९ अमेरिकी डलर तोकिएको छ।
प्रकाशित: २३ जेष्ठ २०८३, शनिबार
