काठमाडौं ।
एकसातामा नेपाल–चीन उत्तरी कोरलानाका हुँदै चिनियाँ कम्पनीका ६१४ ओटा विद्युतीय सवारीसाधन (इभी) नेपाल भित्रिएका छन्।
कोरलानाकास्थित लोमन्थाङ गाउँपालिका–१ न्हेचुङस्थित मुस्ताङ भन्सार कार्यालयका अनुसार जेठ ७ देखि १५ गतेसम्म कोरलानाका हुँदै नेपालतर्फ ६१४ ओटा ईभी नेपाल भित्रिएका हुन्।
भन्सार कार्यालयका प्रमुख विदुर चुँडालका अनुसार कोरलानाका हुँदै चीनबाट पैठारी गरिएका विद्युतीय सवारीसाधनमध्ये ६१४ ओटा इभीको भन्सार जाँचपास भइसकेको छ। नेपाल भित्रिएर भन्सार जाँचपास भइसकेका विद्युतीय सवारीसाधन बिवाइडी कम्पनीको रहेका उनले जानकारी दिनएका छन्।
तर चिनियाँ कम्पनीमार्फत बनेका त्यस्ता विद्युतीय सवारीसाधन कति संख्यामा नेपाल भित्रँदैछन् भन्ने यकीन जानकारी प्राप्त नभएको भन्सार प्रमुख चुँडालले बताएका छन्।
“हिउँदयामपछि पहिलो चरणमा नाकाबाट इभी भित्रिन थालेका छन्, अझै ठूलो संख्यामा यहाँबाट इभी नेपाल भित्रिने जानकारी पाएका छौँ” भनि बताउँदै उनले “बिवाइडीले कति ओटा इभी नेपाल भित्र्याउँदैछ भन्ने जानकारी छैन, नेपाल भित्रिएका कतिपय विद्युतीय सवारी भन्सार जाँचपासको चरणमा रहेको” थप जानकारी दिएका छन्।
त्यसैगरी कोरलानाकाबाट भित्रिएका इभीको भन्सार जाँचपास भई गन्तव्यतर्फ प्रस्थान गरेको र लोमान्थाङ हुँदै जोमसोम झर्ने क्रममा रहेको भन्सार प्रमुख चुँडालले जानकारी दिए छन्।
एकसतामा भन्सार जाँचपास भएका करिब २०० भन्दाबढी विद्युतीय सवारीसाधन मुस्ताङको जोमसोम आइपुगेका छन्।
नाकाबाट भित्रिएका सवारीसाधनमध्ये घरपझोङ–४ जोमसोमस्थित सार्वजिक बसपार्कमा पार्किङ गरी चार्जिङका लागि रोकिएको उनले बताएका छन्।
नेपाल–चीन कोरलानाकाबाट भित्रिएका इभीका लागि चार्जिक स्टेसन कम हुँदा ‘होल्डिङ’ गरी बस्नुपर्ने अवस्था रहेको भन्सार प्रमुख चुँडालको भनाइ छ। उनका अनुसार उपल्लो मुस्ताङको चराङमा एक र जोमसोममा दुई ओटा विद्युतीय सवारी चार्जिङ स्टेसन सञ्चालनमा रहेका छन्।
नेपाल–चीन उत्तरी कोरलानाका गत भदौ ३१ गतेदेखि पूर्ण रूपमा सञ्चालनमा ल्याइएको हो। तातोपानी नाका र रसुवागढी नाकाको विकल्पमा प्रयोग गरिएको यसनाका पूर्ण रूपमा सञ्चालनमा आएसँगै चीनतर्फ निकासी तथा पैठारी कारोबार वृद्धि भएको भन्सार प्रमुख चुँडालले जानकारी दिएका छन्। उनका अनुसार कोरलानाकाबाट गत पुस मसान्तसम्म दुई हजार ३२९ ओटा इभी नेपाल भित्रिएका छन्।
मुस्ताङ भन्सार कार्यालयका प्रमुख चुँडालका अनुसार गत भदौ ३१ गतेदेखि वैशाखसम्म यो नाका हुँदै निकासी तथा पैठारीबाट भन्सार राजस्व रु पाँच अर्ब ७८ करोड ६ लाख सङ्कलन भएको छ।
कोरलानाकाबाट विद्युतीय सवारीसाधनसहित अन्य सामानको चीनतर्फ निकासी तथा पैठारी हुँदा स्थानीय युवाले वैकल्पिक रोजगारी प्राप्त गरेका उनको भनाइ छ।
चीनबाट भित्रिने इभी तथा मालबाहक कन्टेनर सीमावर्ती स्थानीय चालकले चलाउने गर्दा स्थानीय युवाले रोजगारी पाएको उनले उल्लेख गरे।-रासस
प्रकाशित: १५ जेष्ठ २०८३, शुक्रबार
×
