काठमाडौं ।
भोडाफोनले ठगी (स्क्याम) विरुद्ध लड्न नयाँ एआई उपकरण सार्वजनिक गरेको छ।
भोडाफोनले स्क्याम कल प्रोटेक्शननामको नयाँ सुविधा सुरु गरेको छ, जसले एआई प्रयोग गरेर सम्भावित ठगी, स्प्याम र झन्झटिला फोन कलहरू पहिचान र चिन्ह लगाउँछ।
यो प्रणाली भोडाफोन को डिजिटल सुरक्षा सेवा सेक्योर नेट मोबाइल मा समावेश गरिएको छ र सिधै नेटवर्कमै बनाइएको छ। यसले ब्याकग्राउन्डमा स्वतः काम गर्दै आउने कलहरूको विश्लेषण गर्छ, शंकास्पद गतिविधि पत्ता लगाउँछ र उच्च जोखिम भएका नम्बरहरू प्रयोगकर्तालाई देखाउँछ। यदि कुनै कल शंकास्पद देखिएमा, प्रयोगकर्ताको स्क्रिनमा यो सम्भावित ठगी कल हो भनेर सूचना देखिन्छ।
टेलिकम्स डटकमका अनुसार भोडाफोनको सेक्योर नेट मोबाइल मा उन्नत अभिभावकीय नियन्त्रण, २४ घण्टा पहिचान निगरानी र रियल-टाइम भाइरस तथा मालवेयर सुरक्षा पनि समावेश छन्।
कम्पनीका अनुसार स्क्याम कल प्रोटेक्शनथपिएपछि यो सेवा प्रयोगकर्तालाई आउने कलदेखि अनलाइन गतिविधिसम्म सबै क्षेत्रमा सुरक्षा दिने एकीकृत प्रणाली बनेको छ, जसका लागि अतिरिक्त एप वा जटिल सेटअप आवश्यक पर्दैन।
भोडाफोनथ्रीका कन्ज्युमर निर्देशक रोब विन्टरश्लाडेनले भने, “स्क्याम कलहरू चिन्न दिनदिनै गाह्रो हुँदै गएको छ र मानिसहरू सजिलै झुक्किन सक्छन्। सेक्योर नेट मोबाइल मा रहेको स्क्याम कल प्रोटेक्शनले कलहरू निगरानी गर्दै चिनिएका र शंकास्पद स्क्याम कलहरूलाई चिन्ह लगाएर प्रयोगकर्तालाई थप सुरक्षा दिन्छ।”
धेरै टेलिकम कम्पनीहरूले अहिले एआई प्रयोग गरेर यस्ता स्क्याम कलहरू रोक्ने प्रयास गरिरहेका छन् जसले कहिलेकाहीँ आर्थिक नोक्सानीसमेत गराउन सक्छ।
गत महिना भर्जिन मिडिया ओटूले आफ्नो कल डिफेन्स प्रणालीमार्फत ओटू प्रयोगकर्ताका लागि १ अर्बभन्दा बढी शंकास्पद स्क्याम र स्प्याम कलहरू चिन्ह लगाएको जनाएको थियो। यो प्रणाली हियासँगको सहकार्यमा विकास गरिएको हो।
यसले अपरिचित नम्बरबाट आउने कल हुँदा स्वतः सक्रिय भएर एआई मार्फत नम्बरको व्यवहार विश्लेषण गर्छ र स्क्याम वा स्प्याम हुन सक्ने सम्भावना पत्ता लगाउँछ। यदि त्यस्तो ठहरिएमा फोनको स्क्रिनमा चेतावनी देखाइन्छ र चिनिएका ठगी कलहरू सिधै ब्लक पनि गरिन्छ।
गत वर्षको अन्त्यतिर बेलायती नियामक अफकम ले धेरै मोबाइल सेवा प्रदायकहरूले स्क्याम सन्देश रोक्न प्रयास गरेको स्वीकार गरे पनि अझ धेरै गर्नुपर्ने आवश्यकता रहेको बताएको थियो।
यसका लागि उसले मोबाइल अपरेटरहरूमा केही नियम लागू गरेको छ, जसमा प्रिपेड सिममा सन्देश पठाउने सीमा तोक्ने, धेरै नम्बरमा एकैपटक सन्देश पठाउन कठिन बनाउने, र प्रयोगकर्ता तथा कानून कार्यान्वयन निकायबाट प्राप्त रिपोर्टका आधारमा ठगीमा प्रयोग भएका नम्बरहरू ब्लक गर्ने जस्ता उपायहरू समावेश छन्।
घोषणासँगै सार्वजनिक गरिएको सर्वेक्षण अनुसार बेलायतका ५० प्रतिशत मोबाइल प्रयोगकर्ताले २०२४ नोभेम्बरदेखि गत वर्षको फेब्रुअरीसम्म एसएमएस वा आईमेसेज मार्फत शंकास्पद सन्देश प्राप्त गरेका थिए।
प्रकाशित: ४ बैशाख २०८३, शुक्रबार
