काठमाडौं ।
विश्वको सबैभन्दा ठूलो उन्नत एआई चिप उत्पादक टीएसएमसीले जनवरी–मार्च अवधिमा शुद्ध नाफा करिब ५० प्रतिशत बढ्दै लगातार चौथो त्रैमासिकमा कीर्तिमानी आम्दानी हासिल गर्ने सम्भावना रहेको छ। यसको मुख्य कारण एआई पूर्वाधारप्रतिको तीव्र माग हो।
विश्लेषकहरूका अनुसार ताइवान सेमीकण्डक्टर म्यानुफुयाक्चरिङ कम्पनीको एआई चिप उत्पादनका लागि प्रयोग हुने ३-न्यानोमिटर प्रविधि र यसको उन्नत प्याकेजिङ प्रविधिप्रतिको माग कम्पनीको हालको उत्पादन क्षमताभन्दा बढी रहेको छ।
यसले एशियाको सबैभन्दा मूल्यवान कम्पनीलाई नयाँ उचाइमा पुर्याएको छ। एनभिडिया र एप्पलजस्ता कम्पनीहरूको प्रमुख आपूर्तिकर्ता रहेको टीएसएमसीको बजार मूल्य अहिले करिब १.६ ट्रिलियन डलर पुगेको छ, जुन दक्षिण कोरियाली प्रतिस्पर्धी सामसङ इलेक्ट्रोनिक्सको भन्दा झण्डै दोब्बर हो।
एलएसईजीएस्टिमेटका अनुसार १९ विश्लेषकहरूको अनुमानमा आधारित, टीएसएमसीले बिहीबार उक्त त्रैमासिकका लागि ५४२.६ अर्ब ताइवान डलर (करिब १७.१ अर्ब डलर) शुद्ध नाफा सार्वजनिक गर्ने अपेक्षा गरिएको छ। स्मार्टएस्टिमेटले बढी सटीक अनुमान गर्ने विश्लेषकहरूको पूर्वानुमानलाई बढी महत्व दिन्छ।
कम्पनीले दोस्रो त्रैमासिक र अद्यावधिक वार्षिक मार्गदर्शन सार्वजनिक गर्ने आम्दानीसम्बन्धी बैठकको समय तालिका तय गरेको छ।
रोयटर्सका अनुसार यदि नाफा ५०५.७ अर्ब ताइवान डलरभन्दा बढी भयो भने, त्यो कम्पनीको इतिहासकै सबैभन्दा उच्च त्रैमासिक शुद्ध आम्दानी हुनेछ र लगातार नवौं त्रैमासिक नाफा वृद्धि हुनेछ।
गत हप्ता कम्पनीले पहिलो त्रैमासिक आम्दानीमा वार्षिक आधारमा ३५ प्रतिशत वृद्धि भएको जनाएको थियो जुन बजारको अनुमानभन्दा बढी हो।
आगामी अवस्थाबारे मक्वायर क्यापिटलका एशिया प्रविधि अनुसन्धान प्रमुख आर्थर लाईले ग्राहकलाई दिएको नोटमा २०२६ को दोस्रो त्रैमासिकमा त्रैमासिक-त्रैमासिक आम्दानी अझ बढ्ने अपेक्षा गरिएको बताएका छन्, जसको कारण निरन्तर एआई माग र उन्नत प्रविधिमा कम्पनीको अग्रता हो।
मध्यपूर्वको युद्धले हेलियम र नियोनजस्ता सेमिकन्डक्टर उत्पादन सामग्रीको आपूर्ति अवरुद्ध हुन सक्ने जोखिम रहेको भए पनि टीएसएमसी त्यसलाई सामना गर्न सक्षम देखिएको छ।
आईडीसीका वरिष्ठ अनुसन्धान प्रबन्धक ग्यालेन जेङका अनुसार, टीएसएमसीको विविध स्रोत र सुरक्षा भण्डारणले छोटो अवधिका अवरोधहरू व्यवस्थापन गर्न पर्याप्त हुनेछ।
टीएसएमसीले २०२६ को पूँजीगत खर्च योजना कायम राख्छ वा बढाउँछ भन्ने विषयमा पनि ध्यान केन्द्रित गरिएको छ किनकि यसले दीर्घकालीन एआई मागप्रति व्यवस्थापनको विश्वास झल्काउँछ।
कम्पनीले अमेरिकाको एरिजोना राज्यमा चिप कारखाना निर्माण गर्न १६५ अर्ब डलर लगानी गरिरहेको छ। कम्पनीले जापानमा आफ्नो योजना पनि संशोधन गर्दै त्यहाँ ३-न्यानोमिटर चिप उत्पादन गर्ने तयारी गरेको छ, जहाँ पहिले परिपक्व प्रविधिमा ध्यान केन्द्रित गरिएको थियो।
ताइपेईमा सूचीकृत टीएसएमसी का सेयर यस वर्ष हालसम्म २८ प्रतिशतले बढेका छन्, जुन समग्र बजारको २२ प्रतिशत वृद्धिभन्दा बढी हो।
प्रकाशित: १ बैशाख २०८३, मंगलवार
