काठमाडौं ।
चिनियाँ टेलिकम कम्पनी ह्वावेको आम्दानी २०२५ मा लगभग स्थिर देखिएको छ। यूरोप, मध्यपूर्व तथा अफ्रिका क्षेत्रमा वृद्धिका भए पनि आम्दानीमा भने खासै बढोत्तरी भएको छैन। कम्पनीले गत वर्ष आफ्नो आम्दानी केवल २.२ प्रतिशतले बढाउन सफल भयो, जुन अपेक्षा र यसको प्रतिस्पर्धीहरूसँग मिल्दोजुल्दो नै हो।
ह्वावे आफ्नो खुलापन र पारदर्शिताका लागि खासै चिनिँदैन, त्यसैले वर्षमा एकपटक वार्षिक प्रतिवेदनमार्फत केही तथ्यांक सार्वजनिक गर्दा चासो लाग्ने गर्छ।
टेलिकम्स डटकमका अनुसार २०२५ मा कम्पनीले ८८१ अर्ब चिनियाँ युआन आम्दानी गरेको छ जुन अघिल्लो वर्षको तुलनामा केवल २.२ प्रतिशत वृद्धि हो र एरिक्सन तथा नोकियाजस्ता कम्पनीहरूको एक अंकको प्रतिशत वृद्धिसँग मिल्दोजुल्दो हो।
उल्लेखनीय कुरा के हो भने ह्वावेको आम्दानी एरिक्सनको भन्दा करिब पाँच गुणा बढी छ। साथै ह्वावेले गत वर्ष अनुसन्धान तथा विकासमा १९२.३अर्ब चिनियाँ युआन खर्च गरेको छ, जुन एरिक्सनले खर्च गरेको ४८.३ अर्ब स्विडिश क्रोनरभन्दा पनि करिब पाँच गुणा बढी हो।
“२०२५ मा ह्वावे को समग्र प्रदर्शन स्थिर रह्यो,” घुम्ती अध्यक्ष मेङ वाञ्जोउले सामान्य शैलीमा बताइन् र सबैको प्रयासप्रति धन्यवाद व्यक्त गरिन्।
यससँगै उनी केही समयका लागि पदबाट बाहिरिँदै छन् र उनको ठाउँमा नयाँ रूपमा डेभिड वाङ आउनेछन्। पहिले तीन जना शीर्ष अधिकारीले पालैपालो ६–६ महिनाका लागि अध्यक्ष बन्ने व्यवस्था थियो।
पछिल्ला वर्षहरूमा भने केन हु यस दौडबाट बाहिरिए र मेङले एरिक हुसँग पालैपालो जिम्मेवारी साट्दै आएकी थिइन्। थप जटिलता के छ भने वार्षिक प्रतिवेदनमा बोर्ड अध्यक्ष लियाङ हुआको टिप्पणी पनि समावेश गरिएको छ। सम्भवतः ह्वावेभित्र भने यो सबै स्पष्ट होला।
विविधिकरणका प्रयासहरू जारी रहे पनि ह्वावेको आम्दानी अझै पनि नेटवर्क उपकरण र स्मार्टफोनबाट नै बढी आउने गर्छ। तर, यसको सानो अटोमोटिभ व्यवसाय र नवीकरणीय ऊर्जा क्षेत्रमा भने राम्रो वृद्धि देखिएको छ। अर्कोतर्फ, क्लाउड व्यवसायले आफ्नो उच्च बिन्दु पार गरिसकेको देखिन्छ भने ‘अन्य’ शीर्षकअन्तर्गतका व्यवसायहरू निकै घटेका छन्।
क्षेत्रगत रूपमा हेर्दा ह्वावे लामो समयदेखि चिनियाँ बजारमा निकै निर्भर रहँदै आएको छ, जसमा अमेरिकाको नेतृत्वमा अन्य बजारहरूमा प्रतिबन्ध लगाउने प्रयासको पनि भूमिका छ।
त्यसका बाबजुद ईएमईए अर्थात् यूरोप, मध्यपूर्व र अफ्रिका क्षेत्र अझै कम्पनीका लागि ठूलो रहेको देखिन्छ, जहाँ गत वर्ष ८.८ प्रतिशतको प्रभावशाली वृद्धि भएको छ। यसको ठूलो हिस्सा मध्यपूर्व र अफ्रिका क्षेत्रबाट आएको भए पनि युरोपमा प्रतिस्पर्धा गर्न पाउँदा ह्वावेले राम्रो प्रदर्शन गर्ने गर्छ।
“हामी अनिश्चितताले भरिएको भविष्यतर्फ अघि बढिरहेका छौं, त्यसैले आफ्नो रणनीतिप्रति प्रतिबद्ध रहनु र रणनीतिक ध्यान कायम राख्नु आवश्यक छ,” मेङले निष्कर्षमा भनिन्। “हामी रणनीतिलाई कार्यान्वयनमा रूपान्तरण गर्नेछौं, विकासकर्ता इकोसिस्टमलाई अझ विस्तार गर्नेछौं र उच्च गुणस्तरीय विकासलाई अघि बढाउनेछौं।”
प्रकाशित: २० चैत्र २०८२, शुक्रबार
