काठमाडौं ।
उबर इट्सले ग्राहकलाई छिटो र सजिलो रूपमा किराना सामानको कार्ट बनाउन सहयोग गर्ने नयाँ एआई सुविधा ‘कार्ट असिस्टेन्ट’ सार्वजनिक गरेको छ। कम्पनीले बुधबार यो सुविधा घोषणा गरेको हो र यसको बीटा संस्करण एपमा उपलब्ध भइसकेको छ।
नयाँ च्याटबोट प्रयोग गर्न प्रयोगकर्ताले उबर इट्स एपमा कुनै किराना पसल खोजेर त्यसको पृष्ठमा देखिने बैजनी रंगको ‘कार्ट असिस्टेन्ट’ आइकनमा ट्याप गर्नुपर्छ। त्यसपछि किनमेल सुरु गर्न सकिन्छ।
ग्राहकले सामानको सूची टाइप गर्न वा त्यसको तस्बिर अपलोड गर्न सक्छन्। कार्ट असिस्टेन्टले आवश्यक सामान स्वतः कार्टमा थपिदिन्छ। हस्तलिखित सूचीको फोटो वा परिकार र त्यसका सामग्रीको स्क्रिनसटसमेत अपलोड गर्न सकिन्छ। त्यसपछि प्रयोगकर्ताले आफ्नो मनपर्ने ब्रान्ड रोजेर सामान परिवर्तन गर्न वा थप सामग्री थप्न सक्छन्।
उबर इट्सका अनुसार कार्ट असिस्टेन्टले अघिल्ला अर्डरको आधारमा प्रयोगकर्ताको परिचित वस्तुलाई प्राथमिकता दिन्छ, जस्तै नियमित रूपमा किन्ने दूध वा मनपर्ने ओटमिल, जसले अनुभवलाई अझ व्यक्तिगत बनाउँछ।
“प्रयोगकर्ताले छिटो किनमेल गर्ने तरिका चाहेको बताएका थिए र हामीलाई थाहा छ समय कति महत्वपूर्ण हुन्छ,” उबरका प्रमुख प्राविधिक अधिकृत प्रविन नेप्पल्ली नागाले विज्ञप्तिमा भने। “कार्ट असिस्टेन्टले केही सेकेन्डमै सोचदेखि भुक्तानीसम्म पुर्याउन मद्दत गर्छ।”
यो सुविधा मार्फत उबर इट्सले एआई च्याटबोट समावेश गरिरहेका अन्य खाद्य तथा किराना डेलिभरी एपसँग प्रतिस्पर्धा गर्न सहज हुने अपेक्षा गरिएको टेकक्रञ्चले जनाएको छ।
उदाहरणका लागि, इन्स्टाकार्टले सन् २०२३ मा ओपनएआईको च्याटजीपीटीमा आधारित एआई खोज उपकरण सार्वजनिक गरेको थियो, जसले ग्राहकलाई समय बचत र व्यक्तिगत सिफारिस दिन सहयोग गर्छ। सोही वर्ष डोरड्यासले ‘ड्यासएआई’ नामक एआई च्याटबोट परीक्षण गरिरहेको खबर आएको थियो।
गत वर्ष उबर इट्स र डोरड्यास दुवैले च्याटजीपीटीसँग एकीकृत भएर खाना अर्डर प्रक्रिया सहज बनाएका थिए। उबर इट्समा अमेरिकी प्रयोगकर्ताले च्याटजीपीटीमै स्थानीय रेस्टुरेन्ट र मेनु हेरेर अर्डर सुरु गर्न सक्छन् र भुक्तानी उबर इट्स एपमा पूरा गर्न सक्छन्। डोरड्यासको एकीकरणले प्रयोगकर्तालाई भोजन योजना माग्न र आवश्यक सबै सामग्री स्वतः कार्टमा थप्न अनुमति दिन्छ।
ब्लूमबर्गले सन् २०२३ मा उबर इट्सले बजेट र खानाको रोजाइबारे सोधेर अर्डर गर्न सहयोग गर्ने एआई च्याटबोट विकास गरिरहेको रिपोर्ट गरेको थियो।
समग्रमा, उबर इट्सले एआईमा तीव्र लगानी गरिरहेको छ। यसअन्तर्गत व्यापारीका लागि एआईद्वारा तयार गरिएका मेनु विवरण, सुधारिएका खानेकुराका तस्बिर र ग्राहक समीक्षाको सारांशजस्ता उपकरण पनि समावेश छन्।
प्रकाशित: १ फाल्गुन २०८२, शुक्रबार
