काठमाडौं ।
चिनियाँ प्रविधि कम्पनी अलिबाबाले चन्द्र नववर्षको अवसरमा आफ्नो क्वेन एआई च्याटबोट प्रवर्द्धन गर्न ३ अर्ब युआन (करिब ४३१ मिलियन अमेरिकी डलर) खर्च गर्ने घोषणा गरेको छ। यो अभियान फेब्रुअरी ६ देखि सुरु हुने बताइएको छ।
यो खर्च प्रतिस्पर्धी कम्पनीहरू टेन्सेन्ट र बाइदूले यसअघि घोषणा गरेको रकमभन्दा तीन गुणा बढी हो। टेन्सेन्टले १ अर्ब युआन र बाईदूले ५० करोड युआन खर्च गर्ने योजना सार्वजनिक गरेका थिए।
अलिबाबाको अभियानअन्तर्गत खाना, पेय पदार्थ, मनोरञ्जन तथा फुर्सदसम्बन्धी प्रोत्साहन प्रदान गरिनेछ भने “ठूला डिजिटल रातो खामहरू (रेड इन्भेलप) निरन्तर वितरण गरिने” कम्पनीले जनाएको छ। चन्द्र नववर्षको समय चिनियाँ प्रविधि कम्पनीहरूका लागि नयाँ प्रयोगकर्ता भित्र्याउने प्रमुख प्रतिस्पर्धात्मक अवधि मानिन्छ किनकि यस अवधिमा करोडौँ मानिस घर फर्कन्छन् र अनलाइन गतिविधि बढ्छ।
यसको चर्चित उदाहरण २०१५ मा टेन्सेन्टले वीच्याटमार्फत डिजिटल रातो खाम वितरण गरेको अभियान हो जसले त्यसबेला मोबाइल भुक्तानी बजारमा अगाडि रहेको अलिपेसँग प्रतिस्पर्धा गर्न वीच्याटपेलाई ठूलो मद्दत पुर्याएको थियो। यस वर्षको सार्वजनिक बिदा फेब्रुअरी १५ देखि सुरु भई ९ दिनसम्म चल्ने छ जुन अघिल्ला वर्षहरूको तुलनामा लामो हो।
डिपसीकको आर१ एआई मोडेल सार्वजनिक भएपछि चीनको एआई क्षेत्रमा प्रतिस्पर्धा झनै तीव्र बनेको छ। यसले एआईको तीव्र अपनत्व र घरेलु कम्पनीहरूबीच कडा प्रतिस्पर्धा निम्त्याएको छ। टेन्सेन्टको अभियान युनबाओ च्याटबोटमा केन्द्रित छ जहाँ प्रयोगकर्ताले एप अपडेट गरी वीच्याट वालेटमा झिक्न मिल्ने डिजिटल रातो खाम प्राप्त गर्न सक्छन्।
अलिबाबाले भने पुरस्कार नगद हुनेछ कि टाओबाओजस्ता प्लेटफर्ममा प्रयोग गर्न मिल्ने कुपन हुने भन्ने स्पष्ट पारेको छैन। यसैबीच डिपसीकले बलियो कोडिङ क्षमतासहितको भी४ मोडेल फेब्रुअरीको मध्यतिर सार्वजनिक गर्ने अपेक्षा गरिएको छ।
प्रकाशित: २० माघ २०८२, मंगलवार
