काठमाडौं ।
रिलीज भएदेखि धेरै आलोचना भोग्नु परेपनि माइक्रोसफ्ट विन्डोज ११ ले अर्को ठूलो सफलता हासिल गरेको छ। विन्डोज ११ को सक्रिय प्रयोगकर्ताहरूको संख्या अब एक अर्ब पुगेको छ। माइक्रोसफ्टको अपरेटिङ सिस्टम आफ्नो पूर्ववर्ती विन्डोज १० भन्दा छिटो यो आंकडामा पुगेको हो।
माइक्रोसफ्टका सीईओ सत्य नाडेलाले त्रैमासिक नतिजा प्रस्तुत गर्ने क्रममा विन्डोज ११ लाई एक अर्ब प्रयोगकर्ताहरू पुग्न केवल चार वर्ष चार महिना लागेको पुष्टि गरेको र विन्डोज १० को लागि चार वर्ष आठ महिना समय लागेको बताए।
सन् २०१५ मा विन्डोज १० रिलीज हुँदा माइक्रोसफ्टले दुई देखि तीन वर्ष भित्र एक अर्ब डिभाइसहरूमा पुग्ने लक्ष्य राखेको थियो। तर विन्डोज फोन प्लेटफर्मको असफलतासहित धेरै प्राविधिक चुनौतीहरूका कारण यो लक्ष्य प्राप्त गर्न ढिलाइ भएको थियो।
आफ्नो पूर्ववर्तीको विपरीत विन्डोज ११ ले अक्टोबर २०२१ मा उच्च हार्डवेयर आवश्यकताहरू (जस्तै टीपीएम २.०) र प्रयोगकर्ता इन्टरफेसमा परिवर्तनहरूका कारण शंकास्पद रुपमा डेब्यु गरेको थियो।
यद्यपि धेरै नयाँ कम्प्युटरहरू पहिले नै विन्डोज ११ इन्स्टलका साथ आउने र विन्डोज १० को लागि समर्थनको अन्त्यले प्रयोगकर्ताहरूलाई नयाँ संस्करणमा स्तरोन्नति गर्न बाध्य पारिरहेको टेलिग्राफले रिपोर्ट गरेको छ।
यो उपलब्धिले सबैभन्दा आलोचित अपरेटिङ सिस्टमले पनि बजारमा ठूलो लोकप्रियता प्राप्त गर्न सक्छ भनेर देखाएको छ र विन्डोज ११ पछिल्लो दशकमा माइक्रोसफ्टको सबैभन्दा ठूलो सफलता मध्ये एक भएको छ।
प्रकाशित: २० माघ २०८२, मंगलवार
