सामाजिक सञ्जालमा ‘ज्ञान’ बाँड्नु अघि आधिकारिक सर्टिफिकेट आवश्यक, चीनमा अब इन्फ्लूएन्सरहरूका लागि नयाँ नियम

काठमाडौं ।

चिनियाँ सरकारले सामाजिक सञ्जालमा विभिन्न विषयहरूमा “ज्ञान” प्रदान गर्ने इन्फ्लूएन्सरहरू माथि कडाई गरेको छ। चीनले अब सामाजिक सञ्जालमा डाक्टर, वकिल, शिक्षक वा वित्तीय गुरुको रूपमा प्रस्तुत भएर सल्लाह दिनेहरू माथि ठूलो कदम चालेको हो।

अक्टोबर २५, २०२५ देखि लागू हुने नयाँ नियमहरू अन्तर्गत, कुनै पनि व्यावसायिक क्षेत्रमा सल्लाह दिन चाहने कुनै पनि सामग्री सिर्जनाकर्ता अर्थात कन्टेन्ट क्रिएटरले पहिले आफ्नो आधिकारिक डिग्री वा इजाजतपत्र देखाउनुपर्नेछ।

चीनको साइबरस्पेस प्रशासनले जनतालाई नक्कली जानकारी र गलत सल्लाहबाट जोगाउन यो कदम चालिएको बताएको छ।

यसअघि, जो कोहीले पनि सामाजिक सञ्जाल खाता सिर्जना गर्न र आफ्नो विचार व्यक्त गर्न सक्थे।

चिनियाँ सरकारको यो नयाँ कदमले यस कम्युनिष्ट राष्ट्रमा अनलाइन सामग्रीलाई पुन: आकार दिन सक्ने बताईएको छ। केहीलले  यसलाई अनलाइन सामग्रीलाई नियन्त्रण गर्ने तरिकाको रुपमा वर्णन गरेका छन्।

वीच्याट चीनको सबैभन्दा लोकप्रिय सामाजिक सन्देश साइट हो, जसमा १.३ अर्ब मासिक प्रयोगकर्ताहरू छन्।

यो एपले सन्देश, भुक्तानी, मिनी-एपहरू र सामाजिक सञ्जाल सबैलाई एकै ठाउँमा जोड्दछ। टिकटकको चिनियाँ संस्करण डुयिन, चीनमा पनि लोकप्रिय छ। यसलाई छोटो भिडियोहरूको राजाको रूपमा चिनिन्छ, जसमा ७० करोड प्रयोगकर्ताहरू छन्।

चीनमा माइक्रोब्लगिङ प्लेटफर्म वेईबो पनि छ, जुन एक्स (पहिलेको ट्विटर) जस्तै छ। यसमा ६० करोडभन्दा बढी प्रयोगकर्ताहरू छन्।

द मिन्टका अनुसार, साइबरस्पेस एडमिनिस्ट्रेशन अफ चाइना (सीएसी) ले गलत सूचनालाई रोक्ने र जनतालाई गलत वा भ्रामक सल्लाहबाट जोगाउने लक्ष्य राखेको छ। चिनियाँ एप्सले अब सिर्जनाकर्ताहरूको प्रमाणहरू प्रमाणित गर्ने र तिनीहरूको पोस्टहरूमा उपयुक्त घोषणाहरू छन् भनी सुनिश्चित गर्ने जिम्मेवारी लिनेछन्।

चीनको साइबरस्पेस एडमिनिस्ट्रेशन चीनको एक प्रमुख सरकारी निकाय हो, जसलाई आधिकारिक रूपमा राष्ट्रिय इन्टरनेट सूचना कार्यालय भनेर चिनिन्छ। सीएसीलाई चीनको राष्ट्रिय इन्टरनेट नियामक र सेन्सर मानिन्छ, जसले इन्टरनेट गतिविधिहरूमा केन्द्रीकृत नियन्त्रण सुनिश्चित गर्दछ।

सिर्जनाकर्ताहरूले के गर्नुपर्नेछ?

सिर्जनाकर्ताहरूले अब स्पष्ट रूपमा भन्नुपर्नेछ कि उनीहरूले साझा गर्ने जानकारी अध्ययनको निष्कर्ष हो। जब उनीहरूको भिडियोहरूले एआई उत्पन्न सामग्री प्रयोग गर्छन् त्यस बेला पनि उनीहरूले खुलासा गर्नुपर्छ।

शैक्षिक सामग्रीको रूपमा लुकेका गोप्य प्रचारहरूलाई रोक्नको लागि सीएसीले चिकित्सा उत्पादनहरू, खाद्य पूरकहरू, र स्वास्थ्य खाद्य पदार्थहरूको विज्ञापनहरूमा पनि प्रतिबन्ध लगाएको छ।

केही चिनियाँ विज्ञहरूले नयाँ कानूनको स्वागत गरेका छन्, र यी नयाँ पहलहरूले अनलाइन छलफलको विश्वसनीयता बढाउने बताएकाछन्।

एक वेईबो प्रयोगकर्ताले भने, “वास्तविक विशेषज्ञता भएका व्यक्तिहरूले कुराकानीको नेतृत्व गर्ने समय आएको छ।”