टोयोटाद्वारा नयाँ ल्यान्ड क्रूजर एफजे सार्वजनिक

काठमाडौं ।

टोयोटाले यस वर्षको जापान मोबिलिटी शो अघि नयाँ ल्यान्ड क्रूजर एफजे सार्वजनिक गरेको छ।

धेरै प्रतीक्षित अफ–रोडर ल्यान्ड क्रूजर २५० भन्दा करिब ११ इन्च छोटो छ, जसले खरिदकर्ताहरूका लागि सानो र सस्तो विकल्प प्रदान गर्छ । तर यो अमेरिका बाहेकका बजारका लागि मात्र उपलब्ध हुने टेलिग्राफले जनाएको छ।

नयाँ ल्यान्ड क्रूजर एफजे टोयोटाको हाइलक्स च्याम्प प्लेटफर्ममा आधारित छ, जुन अमेरिका उपलब्ध छैन, र यो ल्यान्ड क्रूजर २५० भन्दा करिब ११ इन्च छोटो छ।

यस एसयूभीको लम्बाइ १८०.१ इन्च, उचाइ ७३.० इन्च र चौडाइ ७७.२ इन्च रहेको छ भने ह्विलबेस १०१.६ इन्च छ।

यसमा २.७ लिटरको फोर–सिलिन्डर इन्जिन राखिएको छ, जसले १६१ अश्वशक्ति उत्पादन गर्छ । यो इन्जिनले पार्ट–टाइम फोर–ह्विल ड्राइभ प्रणाली र सिक्स–स्पीड ट्रान्समिसनमार्फत शक्ति पुर्‍याउँछ।

हाइलक्स च्याम्पजस्तै, नयाँ एफजे पनि कस्टमाइज गर्न मिल्ने गरी तयार गरिएको छ । यसमा उपकरण झुण्ड्याउनका लागि मोल्ले प्यानलहरू उपलब्ध छन्। प्रकाशित तस्बिरहरूमा यस एसयूभीमा एयर इन्टेक पाइपसमेत देखिन्छ। यसका अगाडिका र पछाडिका कुनामा रहेका बम्परहरू अलग गर्न मिल्ने छन्, जसले क्षतिग्रस्त भाग मात्र फेर्न सजिलो बनाउँछ र मर्मत क्षमता सुधार गर्छ।

एसयूभीको डिजाइन परम्परागत वर्गाकार छ, जसले ठूला ल्यान्ड क्रूजरका डिजाइन तत्वहरू समेटेको छ । यसमा गोलो बत्ती, बाक्लो ट्रिम र पछाडि राखिएको स्पेयर टायरले आकर्षक रूप दिएको छ । भित्री भागमा ठूलो गियरसिफ्ट र ल्यान्डस्केप–ओरियन्टेड ठूला ड्यासबोर्ड स्क्रिनसहितको परिचित टोयोटा–स्टाइल इन्टेरियर देखिन्छ।

टोयोटा हाल ल्यान्ड हपर नामक नयाँ विद्युतीय सवारी पनि विकास गर्दैछ, जुन पहाडी बाटाहरूमा चल्न र “ल्यान्ड क्रूजर पुग्न नसक्ने ठाउँसम्म पुग्न” सक्षम हुने दाबी गरिएको छ । कम्पनीले हपरको सार्वजनिक मिति भने तय गरेको छैन।

टोयोटाले नयाँ एफजेका आधारभूत विवरणबाहेक धेरै जानकारी सार्वजनिक गरेको छैन। कम्पनीले यसलाई जापानमा सन् २०२६ को मध्यतिर बजारमा ल्याउने योजना बनाएको छ । यो एसयूभी यसै महिना सुरु हुने जापान मोबिलिटी शोमा पहिलो पटक सार्वजनिक प्रदर्शनीमा देखाइनेछ।