फुल सेल्फ-ड्राइभिङ प्रणालीले ट्राफिक नियम उल्लङ्घन गरेकामा २९ लाख टेस्ला गाडीमाथि कारबाही शुरु

काठमाडौं ।

अमेरिकी राष्ट्रिय राजमार्ग यातायात सुरक्षा प्रशासन (एनएचटीएसए) ले बिहीबार टेस्लाका २८ लाख ८८ हजार गाडीहरूको अनुसन्धान सुरु गरेको छ, जसमा कम्पनीको ‘फुल सेल्फ-ड्राइभिङ’ (एफएसडी) प्रणाली जडान गरिएको छ। यो कदम ५० भन्दा बढी यातायात सुरक्षा उल्लङ्घन र केही दुर्घटनाका रिपोर्टहरू आएपछि लिइएको हो।

सुरक्षा निकायका अनुसार चालकले आवश्यक परेमा ध्यान दिनु र हस्तक्षेप गर्नुपर्ने सहायक प्रणाली एफएसडी ले कहिलेकाहीँ “यातायात सुरक्षा नियम उल्लङ्घन गराउने व्यवहार उत्पन्न गरेको” पाइयो।

एनएचटीएसए का अनुसार, केही टेस्ला गाडीहरूले रातो बत्तीमा रोकिनुको सट्टा सडक पार गरेका र लेन परिवर्तनका क्रममा गलत दिशातर्फ गएका घटना रिपोर्ट भएका छन्।

संस्थाले हालसम्म एफएसडी प्रयोग गर्दा भएका ५८ वटा यातायात सुरक्षा उल्लङ्घनका रिपोर्ट समीक्षा गरिरहेको छ, जसमा १४ वटा दुर्घटना र २३ जना घाइते भएका छन्।

यदि प्रारम्भिक अनुसन्धानले गाडीहरूमा सुरक्षा जोखिम रहेको देखायो भने, एनएचटीएसए ले रिकल (फिर्ता बोलाउने प्रक्रिया) सुरु गर्न सक्ने जनाएको छ।

एजेन्सीका अनुसार, छ वटा घटनामा एफएसडी सक्रिय अवस्थामा रहेका टेस्ला गाडीहरू रातो बत्ती भएको चोकमा प्रवेश गरेका र अन्य सवारीसँग ठोक्किएका छन्। तीमध्ये चारवटामा कम्तीमा एक जना वा बढी व्यक्ति घाइते भएका थिए।

ह्यूस्टनका एक चालकले २०२४ मा दिएको उजुरीमा भनेका थिए, “एफएसडी ले ट्राफिक सिग्नलहरू ठीकसँग चिन्दैन। यसले रातो बत्तीमा अघि बढ्छ र हरियो बत्तीमा रोकिन्छ।” उजुरीमा थपिएको थियो, “टेस्लाले समस्या देखे पनि यसलाई सुधार्न वा स्वीकार गर्न चाहँदैन।”

एनएचटीएसए ले रेलवे क्रसिङ नजिक एफएसडी को व्यवहार पनि अध्ययन गर्ने जनाएको छ। गत महिनामा डेमोक्र्याट सिनेटर एड मार्की र रिचर्ड ब्लुमेन्थाले नजिकका दुर्घटनाका रिपोर्ट बढ्दै गएको भन्दै एनएचटीएसए लाई अनुसन्धान गर्न आग्रह गरेका थिए।

टेस्लाले यस विषयमा कुनै प्रतिक्रिया नदिए पनि कम्पनीले यसै साताको सुरुमा एफएसडी सफ्टवेयर अपडेट जारी गरेको छ।