चाईल्डसेफनेटले मलेसियाका ५०० स्कूलहरुमा साइबर सुरक्षा तालिम दिने

काठमाडौं ।

अनलाईन बाल सुरक्षाको लागि कार्यरत अग्रणी संस्था चाइल्डसेफनेटले मलेसियाली संस्था टेक्निज्मसंगको सहकार्यमा मलेसियामा अनलाईन बाल सुरक्षा कार्यक्रम सुरु गरेको छ। यस कार्यक्रम अन्तर्गत  मलेसियामाका ५०० स्कूलहरुमा साईबर सुरक्षाबारे तालिम सञ्चालन गरिनेछन्।

चाईल्डसेफनेटद्वारा प्रशिक्षित स्थानीय प्रशिक्षकहरुले चाईल्डसेफनेटका सामग्री प्रयोग गरि मलेसियामा देशव्यापी साइबर सुरक्षा तालिम सञ्चालन गरिने यस कार्यक्रमबाट ८० हजारभन्दा बढी प्राथमिक तथा माध्यमिक तहका बालबालिका प्रत्यक्ष रूपमा लाभान्वित हुने कम्पनीको दावी छ। उनीहरुले सुरक्षित रूपमा ईन्टरनेट प्रयोग गर्न र अनलाईन यौन शोषणबाट सुरक्षित रहन सिक्ने छन्।

चाईल्डसेफनेटका संस्थापक तथा अध्यक्ष अनिल रघुवंशीका अनुसार संस्थाले नेपालका चालिसभन्दा बढी जिल्लामा साईबर सुरक्षाबारे तालिम संचालन गरिसकेको छ र यस वर्ष देखिँ नेपाल बाहिर पनि कार्यक्रम सुरु गरेको छ।

चाइल्डसेफनेटले मलेसियाको साईबरजाया सहरमा तीनदिने प्रशिक्षक प्रशिक्षण सञ्चालन गरिसकेको छ, जसले प्रशिक्षकहरूलाई प्रभावकारी रुपमा साइबर सुरक्षाबारे तालिम र सचेतना कार्यक्रम सञ्चालन गर्न आवश्यक ज्ञान र शीप प्रदान गरेको छ।

यसका साथै, दुवै संस्थाले मलेसियाका बालबालिकाहरूको आवश्यकताअनुसार विशेष साइबर सुरक्षा सचेतना सामग्रीहरू संयुक्त रूपमा विकास गरेका छन्। यसै क्रममा चाईल्डसेफनेटले बालबालिकाको अनलाइन सुरक्षासम्बन्धी एक पुस्तक तयार पारेको छ।

मले र तमिल भाषामा उपलब्ध हुने यस पुस्तक प्रथम चरणमा अस्सी हजार प्रति प्रकाशन हुने र मलेसियाभरि वितरण गरिनेछ, जसले बालबालिकाहरू, अभिभावकहरू, र शिक्षकहरूलाई सुरक्षित रूपमा डिजिटल प्रविधि प्रयोग गर्न मद्दत गर्नेछ।

“डिजिटल स्पेसमा बालबालिकाको सुरक्षा सबैको साझा जिम्मेवारी हो। चाइल्डसेफनेटसँगको हाम्रो सहकार्यले बालबालिकालाई अनलाइन सुरक्षा सम्बन्धी ज्ञान र सीप प्रदान गर्ने हाम्रो प्रतिबद्धता झल्काउँछ। यो साझेदारी एक महत्वपूर्ण कोसेढुंगा हो, र हामी मलेसियाबाट अन्य एशियाली देशहरूमा हाम्रो प्रयास विस्तार गर्ने आशा राख्छौं,” टेक्निज्मका प्रबन्ध निर्देशक डा. कविथाले भनिन्।

सहकार्यका उद्देश्यहरू

विद्यार्थीहरूलाई सशक्त बनाउने – साइबर दुर्व्यवहार, अनलाइन दुर्व्यवहारकर्ता (predators), डिजिटल ठगीजस्ता साइबर खतराहरू चिन्न र तिनको सामना गर्न सक्ने क्षमता विकास गराउने।

डिजिटल प्रतिरोधात्मकता निर्माण गर्ने – बालबालिकामा आलोचनात्मक सोच कौशल (critical thinking skills) विकसित गरी अनलाइन सुरक्षाको प्रवर्द्धन गर्ने।

शिक्षकहरू र अभिभावकहरूलाई सहयोग गर्ने – बालबालिकालाई डिजिटल यात्रा मार्गदर्शन गर्नका लागि आवश्यक स्रोत सामग्री र तालिम प्रदान गर्ने ।

सुरक्षित अनलाइन वातावरण सिर्जना गर्ने – बालबालिकामा जिम्मेवार रुपमा इन्टरनेट प्रयोग गर्ने संस्कार विकास गर्ने ।

“चाइल्डसेफनेट र टेक्निज्मबीचको सहकार्यले मलेसियाका बालबालिकालाई प्रविधिमार्फत गरिने अनलाइन हिंसा, जस्तै अनलाइन यौन दुर्व्यवहार, घृणास्पद सन्देश, गलत र भ्रामक सूचना र वयस्क  सामग्रीको जोखिमबाट जोगाउन मद्दत गर्नेछ,” चाइल्डसेफनेटका संस्थापक तथा अध्यक्ष अनिल रघुवंशीले बताए।

प्रविधि र स्रोतहरूको संयोजन गर्दै, टेक्निज्म र चाइल्डसेफनेटले साइबर सुरक्षा शिक्षामा नयाँ मानक स्थापित गरिरहेका छन्, जसले डिजिटल विश्वका चुनौतीहरूको सामना गर्न बालबालिकालाई तयार पार्नेछ। यो पहल दुबै संस्थाको बाल संरक्षण, शिक्षा, र डिजिटल साक्षरताप्रति प्रतिबद्धतालाई प्रतिबिम्बित गर्छ।

सन् २०१८ मा नेपालमा स्थापना भएको चाइल्डसेफनेट बालबालिका र युवा पुस्तालाई अनलाइन जोखिमबाट जोगाउन समर्पित एक अग्रणी संस्था हो। यसले पैरवी, अनुसन्धान, सचेतना अभियान, र क्षमता विकास कार्यक्रमहरू मार्फत सुरक्षित इन्टरनेट प्रवर्द्धन गर्दछ।

यसका पहलहरू अनलाइन यौन शोषण, साइबर दुव्र्यवहार, डिजिटल लत, र अन्य साइबर खतराहरू रोक्न केन्द्रित छन्, जसले बालबालिका र युवाहरूलाई अनलाइन विश्व सुरक्षित र जिम्मेवार रूपमा प्रयोग गर्न सक्षम बनाउँछ। चाइल्डसेफनेट नेपालमा र अन्तर्राष्ट्रिय रूपमा बाल अनलाइन सुरक्षा प्रवर्द्धन गर्न कार्यरत छ।

सन् २०२१ मा स्थापना भएको टेक्निज्म एसडीएन बीएचडी मलेसियाभरि व्यक्तिहरू र संस्थाहरूलाई शिक्षित गर्ने र सशक्त बनाउने लक्ष्यसहित तालिम तथा व्यवसाय परामर्शमा केन्द्रित उत्कृष्टता केन्द्रको रूपमा खडा भएको छ। यो उच्च-गुणस्तरको तालिम, परियोजना व्यवस्थापन, र आईटी परामर्श प्रदान गर्न विशेषीकृत छ।

टेक्निज्मले साइबर सुरक्षा शिक्षालाई समावेशी र सबैका लागि पहुँचयोग्य बनाउनुपर्ने विश्वास राख्छ। यसका विशेष कार्यक्रमहरूले विद्यालयका बालबालिका, किशोर-किशोरी, र अभिभावकहरूलाई लक्षित गर्दै डिजिटल सुरक्षाका लागि समग्र दृष्टिकोण तयार पार्छन्, जसले प्रत्येक समूहलाई अनलाइन विश्वका चुनौतीहरूको सामना गर्न तयार पार्दछ।