नयाँ लेजर इन्टरनेट प्रविधि ‘तारा’ ले मस्कको स्टारलिङ्कलाई चुनौती दिन कत्तिको सक्षम छ?

काठमाडौं ।

प्रकाशमा आधारित इन्टरनेट परियोजना ‘तारा’ एक स्वतन्त्र कम्पनी बन्ने भएको छ।

‘तारा’को प्रविधिले डाटा प्रसारण गर्न लेजरहरू प्रयोग गर्दछ र ग्रामीण क्षेत्रहरूलाई इन्टरनेटमार्फत जोड्ने कुरामा इलन मस्कको स्टारलिङ्कको प्रतिद्वन्द्वीको रूपमा परिकल्पना गरिएको छ।

अल्फाबेटले तारामा अल्पसंख्यक हिस्सेदारी राख्ने भएको छ, जसले सिरिज एक्स क्यापिटलबाट पनि कोष सुरक्षित गरेको फाइनान्सियल टाइम्सले रिपोर्ट गरेको छ।

कम्पनीसँग हाल दुई दर्जन कर्मचारीहरू रहेको र १२ देशहरूमा सञ्चालन भइरहेको बताइएको छ जसले प्रजातान्त्रिक गणतन्त्र कंगोको राजधानीलाई जडान गर्नेदेखि लिएर सन् २०२४ कोचेला महोत्सवमा ओभरलोड नेटवर्क बढाउनेसम्म सबै कुरामा काम गरिरहेको छ भनि विदेशी मिडियालाई उद्धृत गर्दै टेलिग्राफले उल्लेख गरेको छ।

‘तारा’को हालको प्रविधिमा एउटा ट्राफिक लाइट आकारको टर्मिनलबाट अर्कोमा प्रकाशको साँघुरो किरण चम्काउने प्रविधि समावेश रहेको बताइएको छ जसले २० किलोमिटरको दूरीमा प्रति सेकेन्ड २० गिगाबिटसम्म प्रसारण गर्ने क्षमता भएको उल्लेख गरिएको छ।

टर्मिनलहरू टावरहरूमा जडान गर्न सकिन्छ जुन फाइबर तैनाथ गर्नुभन्दा छिटो र सस्तो हुने उल्लेख गरिएको छ। विशेष गरी टापु, नदी पार गर्न, वा पुग्न गाह्रो स्थानमा सिग्नल चाहिने ठाँउहरुमा यो तैनाथ गर्न सकिने बताइएको छ।

गत महिना कम्पनीले आफ्नो प्रविधिलाई धेरै कम्प्याक्ट चिपमा संकुचित गरेको घोषणा गरेको छ भने सन् २०२६ मा लन्च गर्ने अपेक्षा गरिएको छ।

ताराको टावर–आधारित अप्टिकल प्रविधिले स्टारलिङ्कको भूउपग्रहहरू भन्दा फरक काम गर्ने उल्लेख गर्दा यसको संस्थापक, महेश कृष्णस्वामीले यसलाई ग्रामीण कनेक्टिभिटी व्यवसायमा प्रतिद्वन्द्वीको रूपमा राखेको टेलीग्राफले उल्लेख गरेको छ।