जर्मन प्रतिस्पर्धा नियामकद्वारा एप्पलमाथि एप ट्र्याकिङ उपकरण दुरुपयोगको आरोप

काठमाडौं ।

जर्मनीको एन्टिट्रस्ट प्राधिकरणले एप्पलविरुद्ध यसको एप ट्र्याकिङ उपकरणमार्फत बजार शक्तिको दुरुपयोग गरेको आरोप लगाएको छ। यदि एप्पलले आफ्नो व्यापारिक अभ्यास परिवर्तन नगरेमा यो कदमले कम्पनीलाई दैनिक जरिबानाको जोखिममा पार्न सक्ने रोयटर्सले उल्लेख गरेको छ।

फेडरल कार्टेल अफिसले तीन वर्षको अनुसन्धानपछि यो कदम चालेको हो। अनुसन्धानको केन्द्रबिन्दु एप्पलको एप ट्र्याकिङ ट्रान्सपरेन्सी (एटीटी) फिचर रहेको छ, जसले प्रयोगकर्ताहरूलाई विभिन्न एपहरू मार्फत विज्ञापनदाताहरूले उनीहरूलाई ट्र्याक गर्नबाट रोक्ने अनुमति दिन्छ।

अमेरिकी प्रविधि कम्पनी एप्पलले यो फिचर प्रयोगकर्ताहरूलाई आफ्नो गोपनीयता नियन्त्रण गर्न सक्षम बनाउने उद्देश्यले ल्याइएको दावी गरे पनि मेटा प्लेटफर्म्स, एप विकासकर्ता र विज्ञापनमा निर्भर स्टार्टअपहरूले यसको आलोचना गरेका छन्।

“एप ट्र्याकिङ उपकरणले प्रतिस्पर्धी एप प्रकाशकहरूलाई विज्ञापनका लागि महत्त्वपूर्ण प्रयोगकर्ता डाटामा पहुँच प्राप्त गर्न निकै कठिन बनाइदिन्छ,” कार्टेल अफिसका अध्यक्ष आन्द्रेयास मुन्ड्टले एक विज्ञप्तिमा भने।

एप्पलले रोयटर्सलाई इमेलमार्फत प्रतिक्रिया दिँदै एटीटी फिचरको बचाउ गरेको छ। “हामी आफैंलाई कुनै पनि तेस्रो पक्ष डेभलपरलाई आवश्यक पर्नेभन्दा उच्च मापदण्डमा राख्छौं,” एप्पलले भने। साथै, “हामी प्रयोगकर्ताहरूलाई पारदर्शिता र डाटा नियन्त्रण सुनिश्चित गर्न फेडरल कार्टेल अफिससँग रचनात्मक रूपमा छलफल जारी राख्नेछौं,” कम्पनीले थप्यो।

एप्पलले जर्मन नियामकको आरोपपत्रमा उठाइएका चिन्ताहरू समाधान गर्नुपर्नेछ। यदि एप्पलले अन्तिम निर्णय आउँदासम्म आफ्ना व्यापारिक अभ्यासहरू परिवर्तन गरेन भने, थप कानुनी कारबाही र दैनिक जरिवाना लाग्न सक्छ। यो निर्णय सन् २०२४ मै आउन सक्ने भए पनि सम्भावित रूपमा सन् २०२५ मा आउने अपेक्षा गरिएको छ।

यस मामिलाको सुरुवात प्रकाशक, प्रसारक, विज्ञापनदाता, तिनीहरूको एजेन्सीहरू र विज्ञापन प्रविधि कम्पनीहरूका तर्फबाट आएका उजुरीहरूबाट भएको थियो।

“आजको आरोप ऐतिहासिक छ। एप्पलका उपायहरूले यसको इकोसिस्टममा कृत्रिम अपारदर्शिता सिर्जना गरेको छ, जसका कारण एपहरूको विकल्प कम भयो, लागत बढ्यो, र विज्ञापन ठगीबाट सुरक्षा कम भयो, जबकि एप्पलको सेवा राजस्व बढ्यो,” कानुनी फर्म हाउसफेल्डका साझेदार थोमस हपनरले भने।

“पहिलो पटक एप्पलले झूटा गोपनीयता बहानामा प्रतिस्पर्धा सीमित गर्न सक्दैन भन्ने यो स्पष्ट भएको छ,” उनले थपे।

जर्मनीको एन्टिट्रस्ट नियम उल्लङ्घन गर्नेलाई वार्षिक कारोबारको १० प्रतिशतसम्मको जरिवाना लाग्न सक्ने जोखिम रहन्छ।