सन् २०१८ मा डाटा उल्लङ्घन गरेको अभियोगमा ईयूद्वारा मेटामाथि २६ अर्ब डलर जरिवाना

काठमाडौं ।

युरोपेली संघको प्रमुख डाटा गोपनीयता नियामकले मेटालाई २०१८ मा फेसबुकको सुरक्षा उल्लङ्घनका लागि मंगलबार २५१ मिलियन यूरो (२६३.५ मिलियन डलर) जरिवाना गरेको छ। यो उल्लङ्घनले २९ मिलियन प्रयोगकर्तालाई प्रभावित पारेको थियो।

त्यस समयमा मेटाले आयरल्याण्डको डाटा संरक्षण आयोग (डीपीसी) लाई सूचित गरेको थियो कि साइबर आक्रमणकारीहरूले फेसबुकको कोडमा रहेको कमजोरीको फाइदा उठाएर भ्यू एज”” फिचरमा पहुँच पाएका थिए। यो फिचरले प्रयोगकर्ताहरूलाई आफ्नो प्रोफाइल अरू कसरी देखिन्छ भनेर हेर्न अनुमति दिन्छ।

रोयटर्सका अनुसार यसले प्रयोगकर्ताहरूको पूरा नाम, सम्पर्क विवरण, स्थान, कार्यस्थल, जन्ममिति, धर्म, लिङ्ग, र उनीहरूको बच्चाहरूको व्यक्तिगत जानकारी उल्लङ्घन भएको डीपीसीले जनाएको छ।

“प्रोफाइल जानकारी अनधिकृत रूपमा बाहिर खुलाउन दिनु यस उल्लङ्घनको कमजोरीले यस्ता डाटाको दुरुपयोग हुने गम्भीर जोखिम सिर्जना गर्‍यो,” डीपीसीका उप आयुक्त ग्राहम डोयलले विज्ञप्तिमा भने।

डीपीसीले मेटाले समस्या पत्ता लगाएको केही समयमै यसको समाधान गरेको बताएको छ। विश्वभर प्रभावित २९ मिलियन फेसबुक खातामध्ये लगभग ३ मिलियन युरोपेली संघ र युरोपियन इकोनोमिक क्षेत्रका थिए।

आयरल्याण्डमा ठूला अमेरिकी इन्टरनेट कम्पनीहरूको कार्यालय रहेको कारण डीपीसी युरोपेली संघका धेरै कम्पनीहरूको प्रमुख नियामक निकाय हो।

डीपीसीले हालसम्म मेटालाई २०१८ मा लागू गरिएको जेनेरल डाटा प्रोटेक्शन रेगुलेशन (जीडीपीआर) अन्तर्गत लगभग ३ अर्ब यूरो जरिवाना गरिसकेको छ। यसमा २०२३ मा लगाइएको १.२ अर्ब यूरोको कीर्तिमानी जरिवाना पनि समावेश छ, जसलाई मेटाले अपिल गरिरहेको रोयटर्सले उल्लेख गरेको छ।

मेटाले मंगलबारको निर्णयमा पनि अपिल गर्ने बताएको छ। मेटाका प्रवक्ताले भने, “समस्या पत्ता लग्नेबित्तिकै हामीले तुरुन्तै समाधानका उपायहरू अवलम्बन गर्यौं र प्रभावित व्यक्तिहरू तथा आयरिश डाटा संरक्षण आयोगलाई जानकारी दियौं।”

मेटाले आफ्ना प्लेटफर्महरूमा प्रयोगकर्ताहरूको सुरक्षाका लागि विभिन्न उपायहरू अपनाएको दावी गरेको छ।