काठमाडौं ।
भारतमा सेमीकण्डक्टर उत्पादनको योजनालाई ठूलो धक्का लागेको छ। ताइवानको फक्सकनले धातुदेखि तेलसम्मका व्यवसायहरू भएको वेदान्तसँगको १९ अर्ब डलरभन्दा बढीको सेमीकण्डक्टर (अर्धचालक) उत्पादन गर्ने संयुक्त उद्यम रद्द गरेको छ।
फक्सकन र वेदान्त, जो प्रमुख कन्ट्र्याक्ट निर्माण कम्पनीहरू हुन्, र गुजरातमा सेमीकण्डक्टर र डिस्प्ले उत्पादन प्लान्टहरू स्थापना गर्न गत वर्ष एक सम्झौतामा हस्ताक्षर गरेका थिए।
फक्सकनले जारी गरेको विज्ञप्तिमा भनिएको छ, “फक्सकनले वेदान्तसँगको संयुक्त लगानीमा अगाडि नबढ्ने निर्णय गरेको छ।” कम्पनीले यो संयुक्त लगानीका लागि वेदान्तसँग एक वर्षभन्दा बढी समय काम गरेको जनाएको छ। तर, दुवै कम्पनीले आपसी सहमतिमा यो संयुक्त लगानी अन्त्य गर्ने निर्णय गरेका छन् । फक्सकनले यसमा वेदान्तको अब पूर्ण हिस्सेदारी हुने बताएको छ।
फक्सकन आईफोन निर्माता एप्पलको सबैभन्दा ठूलो सम्झौता निर्माता हो।
भारतीय प्रधानमन्त्री नरेन्द्र मोदीले इलेक्ट्रोनिक्स उत्पादनमा देशको स्थिति बलियो बनाउन चिप उत्पादनलाई प्राथमिकता दिएका छन्। यद्यपि, फक्सकनको यो उद्यमबाट फिर्ता हुँदा चिप उत्पादनका लागि विदेशी लगानीकर्ताहरूलाई देशमा ल्याउन गाह्रो हुन सक्छ।
हालै, अमेरिकी मेमोरी चिप निर्माता माइक्रोन टेक्नोलोजीले गुजरातमा चिप एसेम्बली र परीक्षण कारखाना स्थापना गर्न ८२.५ करोड डलर लगानी गर्ने बताएको थियो। यो कम्पनीको देशमा पहिलो कारखाना हुनेछ।
केन्द्र सरकार र गुजरात सरकारको सहयोगमा यस कारखानामा कुल २ अर्ब ७५ करोड डलर लगानी हुने माइक्रोनले बताएको छ। जसमध्ये ५० प्रतिशत केन्द्रीय सरकारबाट र २० प्रतिशत गुजरात सरकारबाट अनुदान लगानी प्राप्त हुनेछ। कारखानाको निर्माण यसै वर्ष सुरु हुने र पहिलो चरणको काम आगामी वर्षको अन्त्यसम्ममा सुरु हुने सम्भावना छ। यो आयोजनाबाट करिब ५ हजार रोजगारी सृजना हुनेछ ।
प्रकाशित: २६ असार २०८०, मंगलवार
