काठमाडौं ।
अमेरिका स्थित सान डिएगोको एक संघीय जूरीले शुक्रबार ‘ट्याक्सन टेक्नोलोजी’ लाई ५.७ अर्ब डलरभन्दा बढी क्षतिपूर्ति भराउने फैसला सुनाएको छ। एप्पलले ‘ह्याप्टिक्स’ सम्बन्धी दुईओटा पेटेन्टको दाबी उल्लंघन गरेको ठहर गर्दै जूरीले यो निर्णय गरेको हो।
ट्याक्सनले सन् २०२१ मा क्यालिफोर्नियाको दक्षिणी जिल्लास्थित अमेरिकी जिल्ला अदालतमा एप्पलविरुद्ध मुद्दा दायर गरेको थियो।
उजुरीका अनुसार, एप्पलले आफ्नो ‘भाइब्रेसन’ (कम्पन) प्रविधि उल्लंघन गर्ने उपकरणहरू बिक्री गरेर ट्याक्सनको आविष्कार र सफलताको अनुचित फाइदा उठाइरहेको कम्पनीले आरोप लगाएको थियो। सुरुमा सन् २०२३ मा एप्पलले मुद्दा खारेज गराउन सफलता पाएको थियो, तर पछि ‘फेडरल सर्किट’ (अदालत) ले उक्त मुद्दालाई पुनः अघि बढाउने निर्णय गरेको सीएनबीसीले रिपोर्टमा भनेको छ।
“जूरीले गरेको विचारप्रति हामी धन्यवाद दिन्छौं, तर आजको फैसला र तोकिएको क्षतिपूर्तिसँग हामी दृढतापूर्वक असहमत छौं; यी निर्णयहरू तथ्यद्वारा समर्थित छैनन्,” एप्पलले विज्ञप्तिमा भन्यो, “एप्पलको ‘ट्याप्टिक इन्जिन’ ट्याक्सनको प्रविधिभन्दा आधारभूत रूपमै फरक छ, जुन कुरा सुनुवाइको क्रममा ट्याक्सन आफैंले एप्पलका उत्पादनहरूमा गरेको परीक्षणबाट पुष्टि भएको थियो। एप्पलले ट्याक्सनको प्रविधि प्रयोग गर्दैन र हामी यस निर्णयविरुद्ध पुनरावेदन गर्नेछौं।”
यो मुद्दा अमेरिकी पेटेन्ट नम्बर १०,६५९,८८५ र १०,८२०,११७ मा केन्द्रित थियो। यी दुवै पेटेन्ट ‘भाइब्रेसन’ (कम्पन) मा आधारित ‘ट्याक्टाइल ट्रान्सड्यूसर’ प्रविधिसँग सम्बन्धित छन्, जसले प्रयोगकर्ताहरूलाई आफ्नो ‘इनपुट’ (निर्देशन) अनुसार डिभाइसले प्रतिक्रिया दिएको महसुस गराउन मद्दत गर्छन्। ट्याक्सनले तर्क गर्यो कि एप्पल वाच र आईफोनमा जडान गरिएको एप्पलको ‘ट्याप्टिक इन्जिन’ ले उचित अनुमति वा अधिकार बिना नै आफ्ना आविष्कारहरूको प्रयोग गर्छ।
जूरीसहितको सुनुवाइ प्रक्रिया सेप्टेम्बर १४ मा सुरु भएको थियो र कारबाही सकिएपछि सात सदस्यीय जूरीले दुई दिनसम्म छलफल गर्यो। उनीहरू शुक्रबार दिउँसो १:१५ बजे (प्यासिफिक समय) अदालतमा फर्किए र ट्याक्सनको पक्षमा फैसला सुनाए।
जूरीले एप्पलको तर्फबाट भएको पेटेन्ट उल्लंघनलाई ‘जानबुझिकन गरिएको’ भनेर ठहर गरेन।
प्रकाशित: ११ आश्विन २०८३, आईतवार
