काठमाडौं ।
टेलिनोरले फाइबर सेवा प्रदायक ग्लोबलकनेक्टको उपभोक्ता व्यवसाय खरिद गर्ने सम्झौताले अन्ततः नर्वेको प्रतिस्पर्धा नियामक निकायबाट स्वीकृति प्राप्त गरेको छ।
तर टेलिकम्स डटकमका अनुसार यो स्वीकृति पाउन टेलिनोरले केही महँगो मूल्य चुकाउनुपरेको छ, जबकि यो सम्झौताले देशको स्थिर ब्रोडब्यान्ड बजारमा ठूलो प्रभाव पार्ने सम्भावना कम देखिएको थियो।
गत जुलाईमा टेलिनोरले ग्लोबलकनेक्टका १ लाख ४० हजार ग्राहकसहित उक्त व्यवसाय ६ अर्ब नर्वेजियन क्रोनर (६३ करोड ५० लाख अमेरिकी डलर) मा खरिद गरेको थियो। तर नर्वेजियन प्रतिस्पर्धा प्राधिकरण (एनसीए) लाई सन्तुष्ट पार्न टेलिनोरले १५ हजार ग्राहक हस्तान्तरण गर्न सहमति जनाएको छ, जुन ग्लोबलकनेक्टको कुल ग्राहक आधारको झण्डै ११ प्रतिशत हो।
विशेष रूपमा जहाँ टेलिनोरको फाइबर सेवा पनि उपलब्ध छ त्यस्ता स्थानमा रहेको ग्लोबलकनेक्टको फाइबर पूर्वाधार अर्को सेवा प्रदायकलाई बिक्री गरिनेछ।
यसअन्तर्गत करिब ६ हजार ग्राहक समेटिनेछन्। साथै, टेलिनोरको नेटवर्कमार्फत सेवा पाउँदै आएका करिब ९ हजार ग्लोबलकनेक्ट ग्राहक पनि प्रतिस्पर्धी इन्टरनेट सेवा प्रदायकलाई हस्तान्तरण गरिनेछन्।
यसका अतिरिक्त, टेलिनोरले ग्लोबलकनेक्टको फाइबर नेटवर्क थोक सेवाको आधारमा अन्य सेवा प्रदायकलाई उपलब्ध गराउन पनि सहमति जनाएको छ।
टेलिनोरकी प्रमुख कार्यकारी अधिकृत बेनेडिक्टे शिलब्रेड फास्मरले भनिन्, “यो कारोबारले नर्वेको ब्रोडब्यान्ड बजारमा टेलिनोरको स्थिति बलियो बनाउँछ र ग्राहक तथा बजार विकासका लागि पनि सकारात्मक छ।”
उनले थपिन्, “हामीलाई यी सर्तहरू आवश्यक थिए भन्ने कुरासँग सहमत छैनौं, तर समाधानमा पुग्न सकेकामा खुशी छौं। अब हामी टेलिनोर परिवारमा १ लाख २५ हजार नयाँ ग्राहकलाई स्वागत गर्न उत्सुक छौं।”
दूरसञ्चार नियामक एनकोमका अनुसार सन् २०२५ को अन्त्यसम्म नर्वेमा झण्डै २५ लाख स्थिर ब्रोडब्यान्ड ग्राहक थिए, जसमध्ये १९ लाख ग्राहक फाइबर सेवामा आधारित थिए।
स्थिर ब्रोडब्यान्ड बजारमा अल्टिबक्स ३३.६ प्रतिशत बजार हिस्सासहित अग्रस्थानमा रहेको छ, जुन सन् २०२४ को ३३ प्रतिशतबाट बढेको हो। टेलिनोरको बजार हिस्सा भने २७.५ प्रतिशतबाट घटेर २६.६ प्रतिशतमा पुगेको थियो।
ग्लोबलकनेक्टका १ लाख २५ हजार ग्राहक थपिएपछि टेलिनोरको बजार हिस्सा करिब ३१.६ प्रतिशत पुग्नेछ। यदि ग्राहक हस्तान्तरण गर्न नपरेको भए यसको हिस्सा ३२.२ प्रतिशत पुग्थ्यो, तर त्यसले पनि अल्टिबक्सलाई उछिन्न सक्ने थिएन। साथै, कुनै सर्त नलगाइएको अवस्थामा पनि अल्टिबक्स र टेलिनोरको संयुक्त बजार हिस्सा कुल बजारको दुई तिहाइभन्दा कम नै रहने थियो।
यद्यपि, एनसीएले गत मार्चको अन्त्यतिर स्थिर ब्रोडब्यान्ड बजारमा ५.६ प्रतिशत हिस्सा रहेको फाइबर अपरेटर ग्लोबलकनेक्टलाई टेलिनोरले खरिद गर्दा प्रतिस्पर्धामा असर पर्न सक्ने चिन्ता व्यक्त गरेको थियो।
एनसीएका विभागीय निर्देशक गेर्मुन्ड नेसेले भने, “टेलिनोरले ग्लोबलकनेक्टको आवासीय ग्राहक व्यवसाय खरिद गर्दा प्रतिस्पर्धा कमजोर हुने र उपभोक्ताका लागि ब्रोडब्यान्ड सेवा महँगो हुन सक्ने विषयमा नर्वेजियन प्रतिस्पर्धा प्राधिकरण चिन्तित थियो।”
उनले थपे, “कम्पनीहरूले अहिले सुधारात्मक उपायसहित प्रस्ताव ल्याएका छन्, जसले प्राधिकरणका चिन्ता कम गरेको छ। त्यसैले कम्पनीहरूले प्रस्ताव गरेका सर्तसहित यो खरिदलाई स्वीकृति दिन सकिने निष्कर्षमा पुगेका छौं।”
यद्यपि प्रक्रिया अझै पूर्ण रूपमा समाप्त भएको छैन। उल्लेखित ग्राहक तथा दोहोरो नेटवर्क खरिद गर्ने प्रस्तावित कम्पनीहरूलाई पनि एनसीएले अन्तिम स्वीकृति दिन बाँकी छ।
फास्मरले भनिन्, “अब हाम्रो ध्यान कारोबार सम्पन्न गर्ने र नयाँ ग्राहकलाई उत्कृष्ट सेवा प्रदान गर्नेमा केन्द्रित छ। ग्राहक र कर्मचारी दुवैका लागि सहज संक्रमण सुनिश्चित गर्न तथा टेलिनोरबाट अपेक्षा गरिएको गुणस्तर र विश्वसनीयता कायम राख्न हामी प्रतिबद्ध छौं।”
सबै प्रक्रिया योजना अनुसार अघि बढेमा टेलिनोरले यो कारोबार आगामी शरद ऋतुमा अन्तिम रूप दिने अपेक्षा गरेको छ।
प्रकाशित: २६ जेष्ठ २०८३, मंगलवार
