अनलाइन प्लेटफर्महरूको प्रतिबद्धतालाई अफकमले गर्यो प्रशंसा: यूट्युब र टिकटक परेनन्

काठमाडौं ।

बेलायतको सञ्चार नियामक अफकमले केही अनलाइन प्लेटफर्महरूले बालबालिकालाई लक्षित ग्रूमिङविरुद्ध कडा उपाय अपनाउने प्रतिबद्धता जनाएको भन्दै प्रशंसा गरेको छ तर यूट्युब र टिकटक त्यसमा समावेश छैनन्।

“Update: tech firms’ responses to our call for action to protect children” शीर्षकको प्रतिवेदनमा अफकमले विभिन्न सामाजिक सञ्जाल प्लेटफर्महरूले आफ्ना निर्देशन कत्तिको पालना गरेका छन् भन्ने विवरण दिएको छ। विशेषगरी बालबालिकालाई खराब नियत भएका अपरिचित व्यक्तिबाट जोगाउने विषयमा प्रतिवेदन केन्द्रित छ। मेटा, रोब्लक्स र स्न्यापलाई प्रयास गरेको भन्दै प्रशंसा गरिएको छ भने यूट्युब र टिकटक अपेक्षाअनुसार नपुगेको बताइएको छ।

टेलिकम डटकमका अनुसार बालबालिकाका लागि आफ्ना सिफारिस आधारित फिडलाई कसरी सुरक्षित बनाउने भन्ने स्पष्ट योजना प्रस्तुत गर्न नसकेको भन्दै अब यूट्युब र टिकटकमाथि अफकमले थप निगरानी गर्ने भएको छ। मार्च १२ मा पठाइएको पत्रको जवाफ यी दुई कम्पनीले पर्याप्त रूपमा नदिएको अफकमको भनाइ छ। ती प्लेटफर्महरूले आफूहरूले पहिले नै पर्याप्त सुरक्षा उपाय अपनाइसकेको दाबी गरेका छन्, तर अफकम त्यससँग सहमत छैन।

अफकम प्रमुख मेलानी डावसले भनिन्, “बालबालिकाले सबैभन्दा धेरै समय बिताउने टेक प्लेटफर्ममाथि अफकमले सार्वजनिक र निजी रूपमा दिएको दबाबका कारण विशेषगरी ग्रूमिङविरुद्ध केही महत्वपूर्ण सुरक्षा सुधार भएका छन्। तर अझ धेरै परिवर्तन आवश्यक छ, र हानिको स्पष्ट प्रमाण हुँदाहुँदै पनि कम्पनीहरूले कम उमेरका बालबालिकालाई आफ्ना प्लेटफर्मबाट टाढा राख्न तथा उनीहरूको फिडलाई सुरक्षित बनाउन आवश्यक कदम नचालेकोमा हामी गम्भीर रूपमा चिन्तित छौं।”

उनले थपिन्, “हामी आफ्नो सम्पूर्ण अधिकार र प्रभाव प्रयोग गरेर थप परिवर्तन गराउन प्रतिबद्ध छौं। बालबालिकाको सुरक्षा र सामाजिक सञ्जालबारे सरकारले गरिरहेको राष्ट्रिय छलफलमा पनि हामी आफ्ना प्रमाण र अनुभव प्रस्तुत गर्नेछौं।”

अफकमले यूट्युब र टिकटक कहाँ कमजोर देखिए भन्नेबारे विस्तृत जानकारी भने दिएको छैन। नियामकले विशेषगरी उनीहरूले आफ्नो मागअनुसार पर्याप्त प्रतिबद्धता नजनाएकोमा असन्तुष्टि जनाएको देखिन्छ।

प्रतिवेदनमा भनिएको छ, “विशेषगरी टिकटक र यूट्युबले बालबालिकालाई हानिकारक सामग्री देखिन नदिन कुनै महत्वपूर्ण परिवर्तन गर्ने प्रतिबद्धता जनाएनन्। उनीहरूले आफ्ना फिड पहिले नै बालबालिकाका लागि सुरक्षित रहेको दाबी गरेका छन्। तर आज प्रकाशित हाम्रो प्रमाणले ती अझै पर्याप्त सुरक्षित नरहेको देखाउँछ।”

अफकमको विज्ञप्तिमा एनएसपीसीसीका प्रमुख कार्यकारी क्रिस शर्वुडले भने, “टेक कम्पनीहरूले अझै पनि आफ्ना एल्गोरिदमको हानिकारक प्रकृतिलाई स्वीकार गर्न र समाधान गर्न असफल हुनु गम्भीर चिन्ताको विषय हो। यी प्रणालीहरू बालबालिकाको अनलाइन अनुभवको केन्द्रमा छन्। बालबालिकाको सुरक्षा र कल्याणलाई प्लेटफर्म डिजाइनको केन्द्रमा राख्ने परिवर्तनका लागि यी सेवाहरूले अझ धेरै काम गर्नुपर्छ र त्यसका लागि जिम्मेवार बनाइनुपर्छ।”

बालबालिकालाई सामाजिक सञ्जाल प्रयोग गर्दा सुरक्षित राख्नुपर्नेमा सबै सहमत भए पनि त्यसलाई प्रभावकारी कार्यमा कसरी रूपान्तरण गर्ने भन्ने अझ स्पष्ट हुन सकेको छैन। यूट्युब र टिकटकले अफकमसँग थप छलफल गर्ने अपेक्षा गरिएको छ, तर यस्तो छलफल अझै किन आवश्यक भइरहेको छ भन्ने प्रश्न पनि उठेको छ।