काठमाडौं ।
फ्रान्सले आफ्नो केही सरकारी कम्प्युटरहरूमा प्रयोग भइरहेको विन्डोज अपरेटिङ सिस्टम हटाएर ओपन सोर्स लिनक्समा सार्ने योजना बनाएको जनाएको छ। यस कदमले अमेरिकी प्रविधिमाथिको निर्भरता घटाउने लक्ष्य राखिएको छ।
लिनक्स एउटा ओपन सोर्स अपरेटिङ सिस्टम हो, जसलाई निःशुल्क डाउनलोड र प्रयोग गर्न सकिन्छ। यसका विभिन्न संस्करणहरू विशेष आवश्यकता र प्रयोगका लागि अनुकूलित गरिएका हुन्छन्।
फ्रान्सका मन्त्री डेभिड एमिएलले एक वक्तव्यमा यस कदमको उद्देश्य “हाम्रो डिजिटल भविष्यमा नियन्त्रण पुनःस्थापित गर्नु” भएको बताएका छन्। उनले फ्रान्स सरकारले आफ्नो डाटा र डिजिटल पूर्वाधारमा नियन्त्रण नभएको अवस्था अब स्वीकार गर्न नसक्ने बताए।
फ्रान्स सरकारले यो परिवर्तन कहिले पूरा हुन्छ भन्ने निश्चित समयरेखा वा कुन लिनक्स संस्करण प्रयोग गर्ने भन्ने खुलाएको छैन। यो प्रक्रिया सुरुमा सरकारी डिजिटल एजेन्सी डाइनमका कम्प्युटरहरूबाट सुरु हुनेछ। माइक्रोसफ्टले यसबारे कुनै प्रतिक्रिया दिएको छैन।
अमेरिकी प्रविधि कम्पनीहरूमाथिको निर्भरता घटाएर आफ्नै देशभित्र विकास भएका प्रविधि र क्लाउड सेवाको प्रयोग बढाउने प्रयासलाई “डिजिटल सार्वभौमिकता” भनिन्छ, र फ्रान्सले यसतर्फ पछिल्लो समय जोड दिएको छ।
यूरोपभरिका नीति निर्माता र सरकारी अधिकारीहरू अमेरिकी प्रविधिमाथिको अत्यधिक निर्भरता र त्यसबाट उत्पन्न जोखिमप्रति सचेत बन्दै गएका छन्। जनवरीमा यूरोपेली संसदले यूरोपेली आयोगलाई विदेशी प्रदायकहरूमाथिको निर्भरता घटाउन सकिने क्षेत्रहरू पहिचान गर्न निर्देशन दिने प्रतिवेदन पारित गरेको थियो।
२०२५ जनवरीदेखि पदमा आएका अमेरिकी राष्ट्रपति डोनाल्ड ट्रम्पले विश्व नेताहरूमाथि दबाब बढाएको र आफ्ना आलोचकहरूमाथि प्रतिबन्धहरू प्रयोग गरेको उल्लेख गरिएको छ। अन्तर्राष्ट्रिय आपराधिक अदालतका न्यायाधीशहरूलाई समेत प्रतिबन्ध लगाइएकाले उनीहरूलाई अमेरिकी कम्पनीहरूसँग कारोबार गर्न कठिन भएको रिपोर्टमा जनाइएको छ।
फ्रान्सले विन्डोज छोड्ने निर्णय केही महिनाअघि माइक्रोसफ्ट टिम्स प्रयोग बन्द गरी फ्रान्समै बनेको ‘भिजियो’ प्रयोग गर्ने निर्णयपछि आएको हो। यो उपकरण ओपन सोर्स एन्ड-टु-एन्ड इन्क्रिप्टेड भिडियो मिटिङ टुल ‘जित्सी’मा आधारित छ।
फ्रान्स सरकारले आफ्नो स्वास्थ्य डाटा प्लेटफर्मलाई पनि यसै वर्षभित्र नयाँ सुरक्षित प्लेटफर्ममा सार्ने योजना बनाएको जनाएको छ।
प्रकाशित: ३० चैत्र २०८२, सोमबार
