काठमाडौं ।
अमेरिकाले राष्ट्रिय सुरक्षाको नाममा विदेशमा बनेका राउटरको बिक्रीमा रोक लगाएको छ।
संघीय सञ्चार ब्यूरो (एफसीसी) ले राष्ट्रिय सुरक्षा जोगाउने प्रयासअन्तर्गत विदेशी निर्माणका उपभोक्ता राउटरहरूको बिक्रीमा प्रतिबन्ध लगाएको हो। यो कदम उद्योग विश्लेषकहरूले अपेक्षा गरेकोभन्दा कडा देखिएको छ, किनकि यसले विदेशी मात्र होइन, अमेरिकी कम्पनीहरूलाई पनि असर गर्छ। अधिकांश अमेरिकी कम्पनीहरूले आफ्ना उपभोक्ता-स्तरका राउटर विदेशका कारखानामा उत्पादन गर्ने भएकाले उनीहरू पनि प्रभावित हुनेछन्।
एफसीसी ले यो प्रतिबन्ध विदेशी देशमा उत्पादन भएका सबै उपभोक्ता राउटरलाई “कभर्ड लिस्ट”मा राखेर लागू गरेको हो, जुन सूचीमा राष्ट्रिय सुरक्षाका लागि अस्वीकार्य जोखिम ठहरिएका सञ्चार उपकरण र सेवाहरू समावेश गरिन्छ।
तर कम्पनीहरूका लागि एउटा विकल्प खुला छ। राउटर निर्माता कम्पनीहरूले छुटका लागि आवेदन दिन सक्छन्, र धेरैले त्यसो गर्ने सम्भावना छ। उदाहरणका लागि, नेटगियरले आफ्ना उत्पादन अमेरिकामै डिजाइन गरे पनि उत्पादन भने एसियाका विभिन्न देशहरूमा गर्छ।
अर्कोतर्फ टीपी लिङ्कलाई स्वीकृति पाउन गाह्रो हुने देखिएको छ। यसको बेइजिङसँगको सम्बन्धका कारण पछिल्लो समय अमेरिकामा साइबर सुरक्षा चिन्ता बढेको छ, जुन यो व्यापक प्रतिबन्धको एक कारण मानिएको छ।
एफसीसीको विवरणअनुसार विदेशी निर्माणका राउटरमा रहेका सुरक्षा कमजोरीहरू दुरुपयोग गरी दुष्ट तत्वहरूले अमेरिकी घरपरिवारमाथि आक्रमण, नेटवर्क अवरोध, जासुसी र बौद्धिक सम्पत्ति चोरी जस्ता गतिविधि गरेका छन्। साथै भोल्ट, फ्लाक्स र सल्ट टाइफून साइबर आक्रमणमा पनि यस्ता राउटर प्रयोग भएका उल्लेख गरिएको छ।
एफसीसी अध्यक्ष ब्रेन्डन कारले कम्पनीहरूलाई “कन्डिसनल अप्रुभल”का लागि आवेदन दिन प्रोत्साहित गरेका छन्।
छुट पाउन चाहने कम्पनीहरूले आफ्नो स्वामित्व संरचना, उत्पादन प्रक्रिया, प्रयोग हुने सामग्रीसम्बन्धी विस्तृत जानकारी दिनुपर्नेछ। साथै अमेरिकामै उत्पादन सुविधा स्थापना वा विस्तार गर्ने समयरेखा पनि प्रस्तुत गर्नुपर्नेछ।
तर एफसीसीले कति उत्पादन अमेरिकाभित्रै गर्नुपर्ने वा त्यसका लागि कति समय दिइने भन्ने स्पष्ट गरेको छैन।
टेलिकम्स डटकमका अनुसार यस कदममार्फत अमेरिकी सरकारले राष्ट्रिय सुरक्षाको आधारमा कुन राउटरलाई देशभित्र अनुमति दिने भन्ने छनोट गर्ने अधिकार राखेको देखिन्छ। यसले सम्पूर्ण बजारमा असर पार्नेछ, तर केही कम्पनीहरू अरूभन्दा बढी प्रभावित हुनेछन्।
ब्लूमबर्गलाई दिएको बयानमा नेटगियरले यस कदमलाई समर्थन गरेको छ। “अमेरिकीहरूको लागि सुरक्षित डिजिटल भविष्यतर्फको कदमका लागि हामी प्रशासन र एफसीसी को प्रशंसा गर्छौँ,” कम्पनीले भनेको छ।
चीनबाहेक थाइल्याण्ड, भियतनाम, इन्डोनेसिया र ताइवानमा राउटर उत्पादन गर्ने नेटगियरलाई छुट पाउन समस्या नहुने विश्वास गरिएको छ। घोषणा पछि यसको सेयर मूल्य बढेको छ, र लगानीकर्ताहरूले टीपी-लिङ्क जस्ता प्रतिस्पर्धी कम्पनीहरू पछि पर्न सक्ने सम्भावनालाई पनि हेरेका छन्।
प्रकाशित: १२ चैत्र २०८२, बिहीबार
