काठमाडौं ।
ओपनएआईले च्याटजीपीटी मा ल्याउने भनिएको “एडल्ट मोड” फिचरको सुरुवात फेरि स्थगित गरेको छ। यो फिचरमार्फत प्रमाणित वयस्क प्रयोगकर्ताले इरोटिका लगायतका वयस्क सामग्रीमा पहुँच पाउने योजना थियो।
ओपनएआईका सीईओ साम अल्टम्यानले पहिलो पटक यो फिचरको घोषणा गत अक्टोबरमा गरेका थिए। उनले त्यसबेला भनेका थिए, “डिसेम्बरमा उमेर प्रमाणीकरण प्रणालीलाई पूर्ण रूपमा लागू गर्ने क्रममा ‘वयस्क प्रयोगकर्तालाई वयस्ककै रूपमा व्यवहार गर्ने’ हाम्रो सिद्धान्तअनुसार प्रमाणित वयस्कका लागि इरोटिका जस्ता थप सामग्री अनुमति दिइनेछ।”
तर फिचरको सुरुवात पहिले पनि एकपटक स्थगित भइसकेको थियो। सुरुमा डिसेम्बरमा ल्याउने योजना थियो, तर त्यसपछि यस वर्षको पहिलो त्रैमासिकसम्म सारिएको थियो। त्यतिबेला अल्टम्यानले आन्तरिक मेमो पठाउँदै “कोड रेड” घोषणा गरेका र टोलीलाई च्याटजीपीटीको मुख्य अनुभव सुधारमा केन्द्रित हुन आग्रह गरेको रिपोर्ट आएको थियो।
अब ओपनएआई का एक प्रवक्ताले एक्जियसलाई कम्पनीले “एडल्ट मोडको सुरुवात अझै पछि सारिरहेको” बताएका छन्। उनका अनुसार कम्पनी अहिले धेरै प्रयोगकर्ताका लागि एआईको बौद्धिक क्षमता, व्यक्तित्व सुधार र च्याटबोटलाई “अझ सक्रिय” बनाउने जस्ता उच्च प्राथमिकता भएका कामहरूमा ध्यान दिइरहेको छ।
प्रवक्ताले भने, “हामी अझै पनि वयस्कलाई वयस्ककै रूपमा व्यवहार गर्ने सिद्धान्तमा विश्वास गर्छौँ, तर प्रयोग अनुभवलाई ठीक बनाउन अझै केही समय लाग्नेछ।”
रोयटर्सका अनुसार यो ढिलाइ कति समयसम्म रहनेछ भन्ने भने स्पष्ट छैन।
प्रकाशित: २४ फाल्गुन २०८२, आईतवार
