काठमाडौं ।
टेलिफोनिका र अरेञ्जले स्याटेलाइट कनेक्ट यूरोपसँग डाइरेक्ट-टू-डिभाइस (डीटूडी) स्याटेलाइट सेवा प्रयोग गर्ने विषयमा छलफल गरिरहेका छन्।
दुवै अपरेटर समूहले युरोपका विभिन्न बजारमा डीटूडी सेवा प्रयोगबारे नयाँ गठन भएको स्याटेलाइट कनेक्ट यूरोप सँग काम गरिरहेका छन्। स्पेनको टेलिकम कम्पनी टेलिफोनिका ले युरोपभर रहेका हालका मोबाइल सञ्जाललाई पूरकका रूपमा डीटूडी स्याटेलाइट कनेक्टिभिटीको सम्भावना अध्ययन गरिरहेको जनाएको छ। फ्रान्सेली कम्पनी अरेञ्ज ले पनि यस्तै सन्देश दिएको छ र उसले स्याटेलाइट कम्पनीसँग समझदारीपत्रमा हस्ताक्षर गरिसकेको छ।
दुवै टेलिकम कम्पनीले सम्भावित स्याटेलाइट साझेदारसँग वार्ता भइरहेको कुरा सार्वजनिक गरेकाले भविष्यमा औपचारिक सम्झौता हुने अनुमान गरिएको छ। सार्वजनिक रूपमा हेर्दा स्याटेलाइट कनेक्ट यूरोप सँग सम्झौता गर्न नजिक पुग्ने पहिलो युरोपेली अपरेटरहरू टेलिफोनिका र अरेञ्ज नै रहेको टेलिकम्स डटकमले उल्लेख गरेको छ।
यो कम्पनी एएसटी स्पेसमोबाइल र भोडाफोन बीचको संयुक्त उद्यम हो जसले गत साता मात्रै औपचारिक रूपमा काम सुरु गरेको हो। यसको उद्देश्य मोबाइल अपरेटरहरूलाई पृथ्वीको तल्लो कक्ष अर्थात् एलईओमा आधारित स्याटेलाइट कनेक्टिभिटी सेवा थप्न सहयोग गर्नु हो। कम्पनी लक्जेम्बर्गमा आधारित छ र पाँचवटा युरोपेली ग्राउन्ड स्टेशनमार्फत सञ्चालन गर्ने योजना छ। पहिलो दुई स्टेशन यूके र स्पेनमा निर्माणाधीन छन्।
भोडाफोन यूकेमा कम्पनीको मोबाइल नेटवर्क अपरेटर साझेदार भएकाले स्पेनको कम्पनी पनि सम्भावित नयाँ ग्राहक सूचीमा हुनु स्वाभाविक मानिएको छ।
तर टेलिफोनिकाले सम्भावित सम्झौता स्पेनमा मात्र नभई जर्मनीमा पनि लागू हुने स्पष्ट पारेको छ। कम्पनीले व्यवसाय, सार्वजनिक सेवा र सर्वसाधारण उपभोक्ताका लागि सेवा विकास गर्ने लक्ष्य राखेको छ।
टेलिफोनिकाकी ग्लोबल सीटीआईओ एण्ड्रिया फोल्गिरासले नयाँ डीटूडी स्याटेलाइट प्रविधिको अध्ययनमार्फत स्याटेलाइट कनेक्टिभिटीले उन्नत मोबाइल सञ्जाललाई कसरी पूरक बनाउन सक्छ र युरोपका दुर्गम क्षेत्रमा कनेक्टिभिटी आवश्यकतालाई कसरी सम्बोधन गर्न सक्छ भन्ने बुझाइ बढाउने लक्ष्य रहेको बताइन्।
अरेञ्ज केही अगाडि देखिएको छ। उसले गत वर्ष फ्रान्समा स्काइलोसँग सहकार्य गर्दै ‘मेसेज स्याटेलाइट’ नामक डाइरेक्ट-टू-सेल सन्देश सेवा सुरु गरेको थियो। तर स्याटेलाइट कनेक्ट यूरोपसँगको सहकार्य भने टेलिफोनिका जस्तै चरणमा रहेको देखिन्छ।
अरेञ्जले कम्पनी र एएसटी स्पेसमोबाइलसँगको साझेदारी डीटूडी प्रविधिमा सम्बन्धित बजारमा सहकार्यका लागि भएको जनाएको छ। यसको ध्यान दुर्गम क्षेत्रमा मोबाइल कभरेज बढाउने र सेवा स्थायित्व सुधार गर्नेमा केन्द्रित छ। अरेञ्जका सीईओ क्रिस्टेल हेडेमानले डीटूडी स्याटेलाइट कनेक्टिभिटीलाई मोबाइल सञ्जालको आवश्यक पूरक भन्दै यसले ग्राहकलाई जहाँसुकै भए पनि १०० प्रतिशत कनेक्टिभिटी सुनिश्चित गर्न मद्दत गर्ने बताइन्।
अरेञ्जले यस वर्षको दोस्रो भागदेखि रोमानियामा भ्वाइस, डाटा र एसएमएस परीक्षण सुरु गर्नेछ। साथै, युरोपेली सुरक्षा आवश्यकतासँग मेल खाने उपायहरू अध्ययन गर्ने र अरेञ्ज द्वारा व्यवस्थापन गरिएको कोर नेटवर्कमा स्याटेलाइट प्रणाली समावेश गर्ने विषयमा पनि सहकार्य रहने जनाएको छ। यी परीक्षणको समय सान्दर्भिक देखिन्छ। एएसटी स्पेसमोबाइलले २०२६ भित्र व्यावसायिक सेवा सुरु गर्ने प्रतिबद्धता जनाएको छ तर त्यसअघि थप स्याटेलाइट कक्षामा पठाउन आवश्यक छ।
कम्पनीको ब्लूबर्ड ७ स्याटेलाइट फेब्रुअरी अन्त्यतिर प्रक्षेपण हुने योजना थियो, तर त्यसबारे कुनै घोषणा नभएकाले हालसम्म प्रक्षेपण नभएको अनुमान गरिएको छ। अहिले कक्षामा दोस्रो पुस्ताको ब्लूबर्ड ६ मात्र रहेको छ। वर्षअन्त्यसम्म ४५ देखि ६० वटा स्याटेलाइट प्रक्षेपण गर्ने लक्ष्य राखिएको छ।
स्याटेलाइट कनेक्ट यूरोपका प्रबन्ध निर्देशक मेरेडिथ शार्पल्सले कम्पनी युरोपेली अपरेटरहरूलाई जोड्न आएको र प्रतिस्पर्धा गर्न नभई पूरक सेवा दिन आएको बताएका छन्। उनले अरेञ्ज सँग सहकार्य गर्दै डीटूडी स्याटेलाइट प्रविधिको क्षमता प्रदर्शन गर्न उत्सुक रहेको बताए। यही सन्देश उनले टेलिफोनिका सम्बन्धी घोषणामा पनि दोहोर्याएका छन्।
विश्लेषकहरूका अनुसार यी दुई घोषणाले ब्लूबर्ड ७ को व्यवसायिक मोडेल र यसै वर्ष सेवा सुरु गर्ने योजनामा विश्वास बढाएको छ। पछिल्ला वर्षहरूमा कम्पनी Starlink को छायाँमा रहेको थियो, तर अब भने सेवा सुरु गर्ने अवस्थामा पुगेको संकेत देखिएको छ।
प्रकाशित: २० फाल्गुन २०८२, बुधबार
