काठमाडौं ।
गुगल म्याप्समा रहेका यी चारओटा शक्तिशाली सुविधाहरूले प्रयोगकर्ताहरूको समय, ब्याट्री र इन्टरनेट खपत बचत गर्न मद्दत गर्ने पाइएको छ।
एप्लिकेसनले प्रयोगकर्ताहरूको समय बचत गर्न सक्ने उपयोगी कामहरू लुकाउने तथ्यबारे थाहा नपाई धेरै प्रयोगकर्ताहरूले गुगल म्याप्स केवल नेभिगेसनको लागि प्रयोग गर्ने गरेका छन्।
गुगल म्याप्समा रहेका ती उपयोगी चार सुविधाहरु बारे टेलिग्राफले रिपोर्ट तयार पारेको छः
१. पार्क गरेको स्थान कहिल्यै नबिर्सनको लागि “सेभ पार्किङ”:
आफ्नो सवारी साधन कहाँ पार्क गरियो भनेर सम्झनको लागि फोटो खिच्नुको सट्टा सिधै एपमा आफ्नो स्थान सेभ गर्न सकिने छ। पार्क गरेपछि, आफ्नो स्थान वा स्थिति देखाउने ब्लू डट (निलो थोप्ला) ट्याप गर्दै “सेभ पार्किङ” चयन गर्न सकिने छ। गुगल म्याप्सले नक्सामा मार्कर राख्नेछ भने प्रयोगकर्ताले पार्किङ स्तर वा स्थान जस्ता नोटहरू पनि थप्न सक्ने छन्।
२. इन्टरनेट बिना पनि नेभिगेसन प्रयोग गर्न सकिनेः
अफलाइन म्याप्स (नक्सा) सुविधाको साथ प्रयोगकर्ताले आफ्नो फोनमा शहर वा क्षेत्रको नक्सा डाउनलोड गर्न सक्नेछन्। यो सुविधाले प्रयोगकर्तालाई सिग्नल वा इन्टरनेट नभएको बेला फ्लाइट मोडमा पनि नेभिगेसन र स्थान खोजी प्रयोग गर्न अनुमति दिनेछ।
३. कुनै ठाउँ जानुअघि कति व्यस्त छ भनेर जाँच गर्न सकिनेः
कुनै ठाउँ खोज्दा (जस्तै पसल, रेस्टुरेन्ट, वा जिम), “पपुलर टाइम” (लोकप्रिय समय) चार्टमा तल स्क्रोल गर्न सकिने छ। यो सुविधाले प्रयोगकर्तालाई औसतको तुलनामा हाल त्यहाँ कति मानिसहरू छन् भनेर देखाउनेछ र लाइन वा भीडभाड भएको समयबाट बच्न मद्दत गर्दछ।
४. रियल टाइममा स्थान सेयर गर्न सकिनेः
यदि साथीहरू वा परिवारलाई आफू कहाँ छु भनेर थाहा दिन चाहेमा प्रयोगकर्ताले निश्चित समयको लागि उनीहरूसँग आफ्नो रियल टाइममा स्थान सेयर गर्न सकिनेछ। यो स्ट्याटिक लोकेसन पठाउनुभन्दा बढी सटीक छ।
प्रकाशित: ८ फाल्गुन २०८२, शुक्रबार
