काठमाडौं ।
अफकमले बेलायतमा सिधै मोबाइलमा स्याटेलाइट सेवा (डाइरेक्ट–टु–सेल) उपलब्ध गराउन पहिलो लाइसेन्स भर्जिन मिडिया ओ२ लाई दिएको छ। यससँगै कम्पनीले आगामी केही महिनाभित्र सेवा सुरु गर्ने बाटो खुलेको छ।
यो प्राविधिक रूपमा नयाँ लाइसेन्स भने होइन बरु मोबाइल अपरेटरको विद्यमान अनुमति पत्रमै संशोधन गरिएको हो। नियामकले गत वर्षको अन्त्यतिर अन्तिम रूप दिएको नयाँ नियमअनुसार यो प्रक्रिया अघि बढाइएको हो। ती नियमहरू फेब्रुअरी २५ देखि लागू हुनेछन्।
“नयाँ स्वीकृति ढाँचाअनुसार भर्जिन मिडिया ओ२ बाट आएको पहिलो लाइसेन्स संशोधन अनुरोध स्वीकृत गरेपछि कम्पनीले डीटूडी सेवा दिन पाउने फ्रिक्वेन्सीहरू समावेश गरेका छौं र विद्यमान ह्यान्डसेटहरूले सेवा प्रयोग गर्न पाउने व्यवस्था औपचारिक रूपमा लागू गरेका छौं,” अफकमले संक्षिप्त विज्ञप्तिमा जनाएको छ।
टेलिकम्स डटकमका अनुसार प्राविधिक पक्षभन्दा बाहिर हेर्दा स्याटेलाइट सेवा अनुमति प्राप्त गर्ने पहिलो कम्पनी बन्नु भर्जिन मिडिया ओ२ को महत्वाकांक्षाको संकेत हो। कम्पनीले गत अक्टोबरमा स्टारलिङ्कसँग साझेदारी गर्दा सन् २०२६ को पूर्वार्द्धमै डाइरेक्ट–टु–डिभाइस सेवा सुरु गर्ने संकेत दिएको थियो। बेलायतमा यस्तो साझेदारी पहिलो पटक भएको थियो।
स्पेसएक्स स्वामित्वको स्टारलिङ्कले ओटू स्याटेलाइट सेवा सञ्चालनमा सहयोग गर्नेछ। यसको उद्देश्य भू–सतहमा आधारित मोबाइल सञ्जाल नपुगेका क्षेत्रमा कनेक्टिभिटी उपलब्ध गराउनु हो। सेवा सुरु भएको १२ महिनाभित्र बेलायतको ९५ प्रतिशतभन्दा बढी भूभागमा ओटूको मोबाइल कभरेज विस्तार गर्ने लक्ष्य राखिएको छ।
सेवा सुरु हुँदा टेक्स्ट मेसेजिङ र केही आधारभूत डाटा सेवा उपलब्ध हुनेछन्। केही म्यापिङ, लोकेसन र मेसेजिङ एपहरू सुरुआतमै उपलब्ध हुने बताइएको छ। समयसँगै सेवा विस्तार गरिने स्टारलिङ्कले आफ्ना सबै अपरेटर साझेदारलाई प्रतिबद्धता जनाएको छ।
भर्जिन मिडिया ओटूले ओटू स्याटेलाइट ठ्याक्कै कहिले सुरु गर्ने वा यो सशुल्क सेवा हुने कि निःशुल्क भन्नेबारे हालसम्म खुलाएको छैन। अफकमको लाइसेन्स घोषणापछि कम्पनीले थप विवरण दिएको छैन। तर लक्ष्यअनुसार सेवा सुरु गर्न विवरण सार्वजनिक हुन अब धेरै समय नलाग्ने अनुमान गरिएको छ।
सेवा बजारमा ल्याउँदा भर्जिन मिडिया ओ२ ले आफू पहिलो भएको दावीलाई विशेष रूपमा प्रचार गर्ने सम्भावना छ।
यसले भोडाफोनथ्री लाई केही झट्का दिन सक्छ। यसअघि भोडाफोनले बेलायतको पहिलो मोबाइल कल गरेको भन्दै आफ्ना उपलब्धि सम्झाउँदै आएको थियो र हालसम्म डाइरेक्ट–टु–डिभाइस सेवा सुरु गर्ने पहिलो कम्पनी बन्ने अपेक्षा गरिएको थियो।
भोडाफोनथ्रीले एएसटी स्पेसमोबाइलसँग साझेदारी गर्दै डाइरेक्ट–टु–डिभाइस प्रविधिमा अग्रसर भूमिका खेलेको थियो। उसले सफल परीक्षणहरू गरेको दावी गर्दै भविष्यमा अन्य मोबाइल अपरेटरलाई पनि सेवा बेच्ने योजना बनाएको छ।
तर व्यावसायिक सुरुवात भने ढिला हुने संकेत देखिएको छ। एएसटी स्पेसमोबाइलले २०२६ मा व्यावसायिक सेवा सुरु गर्ने लक्ष्य रहेको जनाएको छ। यसै महिना ब्लूबर्ड ७ स्याटेलाइट प्रक्षेपण गर्ने योजना छ र वर्षअन्त्यसम्म ४५ देखि ६० स्याटेलाइट कक्षामा पुर्याउने लक्ष्य राखिएको छ, जसले सेवा सुरु गर्न सहयोग गर्ने अपेक्षा गरिएको छ।
अफकमले निकट भविष्यमा भोडाफोनथ्री सम्बन्धी अर्को लाइसेन्स संशोधन पनि जारी गर्न सक्छ। त्यसो भए बेलायतका मोबाइल अपरेटरहरूबीच स्याटेलाइट सेवा क्षेत्रमा प्रतिस्पर्धा अझ तीव्र हुने देखिन्छ। तर हालका लागि भर्जिन मिडिया ओ२ नै एक मात्र प्रतिस्पर्धी बनेको छ।
प्रकाशित: ७ फाल्गुन २०८२, बिहीबार
