काठमाडौं ।
बेलायतका दूरसञ्चार कम्पनीहरूले सम्झौताको बीचमै मूल्य वृद्धि अन्त्य गर्ने नयाँ चार्टरमा हस्ताक्षर गरेका छन्।
यसले भविष्यमा हुने कुनै पनि मूल्य परिवर्तनबारे ग्राहकलाई सुरुमा नै स्पष्ट जानकारी दिने उद्देश्य राखेको छ जसलाई जीवनयापन खर्च व्यवस्थापनमा सहयोग गर्ने कदमका रूपमा प्रस्तुत गरिएको छ।
चार्टरअन्तर्गत ग्राहकले नयाँ मोबाइल वा ब्रडब्यान्ड सम्झौता गर्दा कति रकम तिर्नुपर्ने हो भन्ने कुरा पहिल्यै थाहा पाउनेछन् जसले गर्दा सम्झौताको बीचमा अप्रत्याशित रूपमा शुल्क बढ्ने अवस्था अन्त्य हुने बताइएको छ।
गत वर्षको अन्त्यतिर चान्सलर र प्रविधि सचिवले टेलिकम क्षेत्रलाई हस्तक्षेप गर्दै “परिश्रमी उपभोक्तालाई निष्पक्ष व्यवहार सुनिश्चित गर्न, सहमति नगरेको मूल्य वृद्धिको सामना गर्न नपर्ने बनाउन र सेवा प्रदायकबाट स्पष्ट सूचना उपलब्ध गराउन” निर्देशन दिएका थिए।
विज्ञप्तिअनुसार सरकारी सुविधा लिनेहरूका लागि सस्तो सामाजिक ट्यारिफ उपलब्ध भए पनि करिब १० मध्ये ७ जना योग्य ब्रडब्यान्ड ग्राहकले यसबारे सुनेका थिएनन्। त्यसैले चार्टरले योग्य ग्राहकलाई सामाजिक ट्यारिफ सजिलै पहुँचयोग्य बनाउने व्यवस्था पनि गर्नेछ।
यसअन्तर्गत सेवा प्रदायकले योग्य ग्राहकलाई सक्रिय रूपमा सामाजिक ट्यारिफबारे जानकारी गराउनेछन् र “आर्थिक कठिनाइ भोगिरहेका ग्राहकलाई बिना जरिवाना सस्तो योजनामा सर्ने अवसर तथा सहज किस्ताबन्दी योजना” प्रस्ताव गर्नेछन्। नियामक अफकमका अनुसार सामाजिक ट्यारिफमार्फत योग्य परिवारले वार्षिक २२० पाउन्डसम्म बचत गर्न सक्ने टेलिकम्स डटकमले उल्लेख गरेको छ।
“ब्रोडब्यान्ड र मोबाइल ग्राहकले निष्पक्ष व्यवहार पाउनुपर्छ र बिलमा अचानक वृद्धि भोग्न नपरोस्,” प्रविधि सचिव लिज केन्डलले भनिन्। “सरकारको कदमपछि टेलिकम कम्पनीहरूले सम्झौताको बीचमा हुने अप्रत्याशित मूल्य वृद्धि अन्त्य गर्न र सामाजिक ट्यारिफ सजिलो बनाउन सहमति जनाएका छन्। यी परिवर्तनले देशभरका लाखौं उपभोक्तालाई वास्तविक राहत दिनेछ र जीवनयापन खर्चको दबाब घटाउन सहयोग गर्नेछ।”
बीटी ग्रुपकी प्रमुख कार्यकारी एलिसन किर्कबीले थपिन्, “हामीले मूल्य पारदर्शिता र निष्पक्षतामा उद्योगको नेतृत्व गरेका छौं र अब अन्य मोबाइल नेटवर्कलाई पनि त्यही गर्न आह्वान गरिरहेका छौं। ग्राहक संरक्षण मूल्य मात्र नभई भरपर्दो पूर्वाधारसँग पनि सम्बन्धित छ। बीटीजत्तिको लगानी कसैले गरेको छैन, र निरन्तर लगानीलाई समर्थन गर्न सरकारलाई साहसी निर्णय लिन आग्रह गर्छौं। जति धेरै मानिस, व्यवसाय र समाज जोडिन्छन्, त्यति नै हाम्रो नेटवर्कले आर्थिक वृद्धि बढाउँछ।”
भर्जिन मिडिया ओ२ का सीईओ लुट्ज शुलरले भने, “यो चार्टरले उपभोक्ताका लागि पूर्वानुमेयता र पारदर्शिता बलियो बनाउँदै टेलिकम क्षेत्रले दिने महत्वपूर्ण मूल्यलाई पनि मान्यता दिन्छ। भर्जिन मिडिया ओ२ ले प्रत्येक वर्ष अर्बौं पाउन्ड लगानी गर्दै फाइबर सेवा विस्तार र ४जी तथा ५जी नेटवर्क सुधार गरिरहेको छ। बढ्दो माग र नयाँ प्रविधिसँग तालमेल राख्न यस्तो डिजिटल पूर्वाधारमा लगानी निरन्तर आवश्यक छ।”
गत वर्ष अफकमले मोबाइल अपरेटरलाई सन्देशमार्फत हुने ठगी नियन्त्रणमा जिम्मेवार बनाउने नयाँ नियम पनि सार्वजनिक गरेको थियो। यसअन्तर्गत मोबाइल अपरेटर र व्यवसायिक क्षेत्रमा काम गर्ने एग्रिगेटरहरूमा थप नियम लागू गरिएको छ, जसले अन्तिम प्रयोगकर्ताको सुरक्षा बढाउने अपेक्षा गरिएको छ।
प्रकाशित: १ फाल्गुन २०८२, शुक्रबार
