काठमाडौं ।
इन्टरनेसनल कन्फरेन्स अन आईसीटी एण्ड फोटोनिक्स (आईसीटीपी २०२६) सम्बन्धी पहिलो चार दिने अन्तर्राष्ट्रिय सम्मेलन काठमाण्डौँमा सुरु भएको छ।
नेपालको प्राविधिक नवप्रवर्तन, अनुसन्धान–संचालित विकास र डिजिटल रूपान्तरणको बढ्दो आवश्यकतासँग मेल खाने एउटा महत्त्वपूर्ण पहलको रुपमा सूचना तथा सञ्चार प्रविधिसँग सम्बन्धित उक्त अन्तर्राष्ट्रिय सम्मेलनको बिहीबार उद्घाटन सत्रबाट सुरु गरिएको छ।
सूचना तथा सञ्चार प्रविधि (आईसीटी) र फोटोनिक्समा द्रुत प्रगतिसँगै दिगो विकासलाई अगाडि बढाउन ज्ञान आदानप्रदान, सहकार्य र नीतिगत छलफलको लागि प्लेटफर्म सिर्जना गर्ने पहलको रुपमा अन्तर्राष्ट्रिय सम्मेलन सुरु गरिएको हो।
आईईईई को नेपाली अध्याय अन्तर्गत आयोजित नेपालमा पहिलो आईईईई सम्मेलनको उल्लेखनीय पहल गरेकोमा र यो विश्वव्यापी कार्यक्रम आयोजना गरेकोमा नेपालका लागि कोरिया गणराज्यका राजदूत एच.ई. ताई–यङ पार्कले आयोजकहरूलाई बधाई दिएका छन्।
‘यो साँच्चै नेपालको वैज्ञानिक र शैक्षिक समुदायको लागि गर्व र ऐतिहासिक क्षण भएको र यो आईसीटीपी २०२६ नेपालमा तयार पार्न गरिएको कडा परिश्रमको कदर गर्दछु’ राजदूत पार्कले उल्लेख गरे।
कोरिया गणतन्त्रको विज्ञान तथा सूचना प्रविधि मन्त्रालय र आईआईटीपी (सूचना तथा सञ्चार प्रविधि योजना तथा मूल्याङ्कन संस्थान) को सहयोगमा केएआईएसटी को ग्राजुएट स्कूल अफ ग्लोबल डिजिटल इनोभेसन (जीडीआई) को नेतृत्वमा ग्लोबल डिजिटल इनोभेसन एण्ड इम्प्याक्ट वर्कशप (कार्यशाला) सँगै यो महत्त्वपूर्ण सम्मेलन आयोजना भएकोमा राजदूत पार्कले खुसी व्यक्त गरेका छन्।
‘यो सहकार्यले विज्ञान, प्रविधि, अनुसन्धान र डिजिटल इनोभेसनमा नेपाल र कोरिया बीचको बलियो र बढ्दो साझेदारीलाई प्रतिबिम्बित गर्दछ’ राजदूत पार्कले थप बताए।
उद्घाटन समारोहमा सम्मेलनका सभापति प्रा. डा.विकाश नकर्मीले स्वागत मन्तव्य राख्दै सम्मेलनले विश्वभर अनुसन्धान कार्य र नीतिलाई हेर्नुका साथै प्राविधिक र सामाजिक चुनौतीहरूलाई सम्बोधन गर्ने विश्वव्यापी साझेदारीलाई प्रवर्द्धन गर्ने लक्ष्य राखेको बताए।
यो सम्मेलन आरएफ र फोटोनिक्स, एआई र मेसिन लर्निङ, नवीकरणीय ऊर्जा र हरित कम्प्युटिङ, आईसीटी नीति र डिजिटल शासन, कम्प्युटिङ र रोबोटिक्स र स्वचालनमा हालका प्रवृत्तिहरू गरी मुख्यतया ६ ट्र्याकहरूमा केन्द्रित रहेको डा.नकर्मीले जानकारी दिए।
त्यसैगरी सम्मेलनका उप सभापति प्रा. सियोङ हुन हानले आईसीटीपी २०२६ ले एआई र मेसिनिङदेखि नवीकरणीय ऊर्जा, रोबोटिक्स, आईसीटी नीति, डिजिटल शासन र नेपालमा पहिलो पटक फोटोनिक्स ट्र्याकसम्मको व्यापक प्राविधिक ट्र्याकहरूको साथ विश्वव्यापी नवप्रवर्तन परिदृश्यमा नेपालको बढ्दो भूमिकालाई प्रकाश पारेको बताए।
आईसीटीपी २०२६ ले विद्वत्तापूर्ण अनुसन्धानलाई अगाडि बढाउन, नवप्रवर्तनलाई बढावा दिन र विश्वव्यापी प्राविधिक परिदृश्यमा नेपालको संलग्नतालाई सुदृढ पार्न उत्प्रेरकको रूपमा काम गर्ने लक्ष्य राखेको छ।
उपलब्धिहरू साझा गर्न र विज्ञान र प्रविधिको भविष्यलाई आकार दिन अनुसन्धानकर्ताहरू, विद्यार्थीहरू, उद्योग पेशेवरहरू, नीति निर्माताहरू र नवप्रवर्तकहरूलाई एकसाथ ल्याउन आईसीटीपी २०२६ ले महत्वपूर्ण भूमिका निर्वाह गर्नेछ।
यो शिक्षा, उद्योग र सरकार बीचको सहकार्यलाई सुदृढ पार्ने; दिगोपन र ऊर्जा–कुशल कम्प्युटिङ जस्ता विश्वव्यापी र स्थानीय चुनौतीहरूलाई सम्बोधन गर्ने; नवप्रवर्तन र अनुसन्धानलाई प्रवर्द्धन गर्ने – विशेष गरी युवा अनुसन्धानकर्ताहरू र स्टार्टअपहरू बीच; र विश्वव्यापी आईसीटी र फोटोनिक्स विकासमा नेपालको भूमिका बढाउने कुरामा केन्द्रित छ।
विविध विषयवस्तुहरू, मुख्य वक्ताहरू, र प्राविधिक सत्रहरू सहित आईसीटीपी २०२६ ले नेपालमा अनुसन्धान, उद्योग नवप्रवर्तन, र दिगो प्राविधिक वृद्धिलाई अगाडि बढाउने लक्ष्य राखेको छ।
प्रकाशित: २९ माघ २०८२, बिहीबार
