काठमाडौं ।
विश्वका सबैभन्दा ठूला आठ स्मार्टफोन निर्माता कम्पनीहरूसँग गत वर्ष २० करोडभन्दा बढी सक्रिय प्रयोगमा रहेका उपकरण थिए र तीमध्ये करिब चारमध्ये एक आइफोन थियो। यो आँकडा काउन्टरपोइन्ट रिसर्चको एक प्रतिवेदनले देखाएको हो।
विश्वभर सक्रिय स्मार्टफोनको संख्या गत वर्ष २ प्रतिशतले बढेको प्रतिवेदनले देखाएको छ। नयाँ उपकरण बदल्ने चक्र झन्डै चार वर्ष पुगेको र दोस्रो प्रयोग (सेकेन्ड-लाइफ) उपकरणको हिस्सा बढ्दै जाँदा यो वृद्धि भएको हो।
सामान्यतया विश्लेषकहरूले ढुवानी (शिपमेन्ट) तथ्यांक सार्वजनिक गर्छन्, तर सक्रिय स्थापित आधारले उपकरणको दीर्घायु, प्रयोगकर्ता कायम रहने दर र इकोसिस्टमप्रतिको निष्ठा देखाउँछ। काउन्टरपोइन्टका अनुसार यसले वर्षौंदेखिको बिक्री र लामो प्रतिस्थापन चक्रको संयुक्त प्रभावलाई प्रतिनिधित्व गर्छ।
टेलिकम्स डटकमका अनुसार अनुसन्धान निर्देशक तरुण पाठकले भने, “२०२५ मा आठ प्रमुख स्मार्टफोन निर्माता प्रत्येकसँग २० करोडभन्दा बढी सक्रिय उपकरण थिए, जसले विश्व सक्रिय स्थापित आधारको ८० प्रतिशतभन्दा बढी हिस्सा ओगटेको छ। एप्पल र सामसङ मात्र एक अर्ब सक्रिय उपकरणको उपलब्धि पार गर्न सफल भएका छन्, जसले लामो समयसम्म प्रयोगकर्तालाई जोडिराख्ने उनीहरूको क्षमता देखाउँछ। २० करोडभन्दा बढी सक्रिय उपकरण समूहभित्र तीन स्पष्ट खण्ड देखिन्छन्। पहिलो एक अर्बभन्दा बढी समूह हो, जसमा एप्पल र सामसङ अगाडि छन्। उनीहरूले प्रिमियम स्थान र बलियो इकोसिस्टममार्फत दीर्घकालीन प्रयोगकर्ता निष्ठा हासिल गरेका छन्।”
प्रतिवेदनका अनुसार प्रिमियम फोनले प्रयोगकर्तालाई लामो समयसम्म कायम राख्न सहयोग गर्छ, किनकि मानिसहरूले यस्ता फोन लामो समयसम्म प्रयोग गर्छन्।
तर यो खण्ड चुनौतीपूर्ण पनि रहेको छ किनकि गत वर्ष एप्पल र सामसङ बाहेक अन्य छ कम्पनीले यस क्षेत्रमा एक अंकको मात्र बिक्री हिस्सा राखेका थिए।
यसैबीच मेमोरी चिपको अभावले पुर्जाको लागत बढाएको र उच्च स्पेसिफिकेसन भएका मोडेलको उपलब्धता सीमित गरेको छ। यसले अपग्रेड ढिला हुन सक्ने, प्रतिस्थापन चक्र लम्बिन सक्ने र “प्रिमियम” बनाउने प्रवृत्ति सुस्त हुन सक्ने प्रतिवेदनले जनाएको छ।
पहिले मोबाइल अपग्रेड नयाँ हार्डवेयर सुविधामा केन्द्रित हुन्थ्यो, तर एआई युगमा फरकपन सफ्टवेयर र इकोसिस्टम तहमा सरेको प्रतिवेदनले बताएको छ। यसअन्तर्गत उपकरणमै आधारित एआई, क्यामेरा बुद्धिमत्ता, उत्पादकता सुविधा र विभिन्न उपकरणबीचको समन्वय प्रयोगकर्ताका लागि झन् महत्वपूर्ण बन्दै गएका छन्।
एप्पलले भने आफ्नो स्थापित आधारबाट उच्च नाफा दरको आम्दानी निरन्तर रूपमा कमाइरहेको एकमात्र ब्रान्डको रूपमा स्थान बनाएको छ जहाँ सेवाबाट हुने आम्दानी दोहोरो अंकको दरमा बढिरहेको छ।
वरिष्ठ विश्लेषक कर्ण चौहानले भने, “एप्पल विश्व सक्रिय स्थापित आधारमा अगाडि छ, जहाँ करिब चारमध्ये एक सक्रिय स्मार्टफोन आइफोन हो। बलियो प्रयोगकर्ता निष्ठा, गहिरो आईओएस इकोसिस्टम र कडा रूपमा एकीकृत सेवाले यो सम्भव बनाएको हो। २०२५ मा एप्पलले अन्य सात प्रमुख कम्पनीहरूको संयुक्तभन्दा बढी नयाँ स्मार्टफोन उपकरण थप्यो। यसले परिपक्व बजारमा पनि प्रयोगकर्ता आकर्षित र कायम राख्ने क्षमता देखाउँछ। सामसङ विश्व सक्रिय स्थापित आधारको करिब पाँचमध्ये एक हिस्सा लिएर दोस्रो स्थानमा छ। यसको दीर्घ बजार उपस्थिति, प्रवेशस्तरदेखि प्रिमियमसम्म फैलिएको पोर्टफोलियो र प्रमुख क्षेत्रहरूमा व्यापक पहुँचले यसलाई सहयोग गरेको छ।”
जनवरी अन्त्यमा सार्वजनिक गरिएको हालैको नतिजामा एप्पलको बजार शक्ति देखिएको छ। कम्पनीले त्रैमासिक १४३.८ अर्ब डलर आम्दानी गरेको छ, जुन अघिल्लो वर्षको तुलनामा १६ प्रतिशतले बढी हो। यस अवधिमा आइफोनले अहिलेसम्मकै उत्कृष्ट त्रैमासिक प्रदर्शन गरेको कम्पनीले जनाएको छ।
एप्पलका अनुसार “हरेक भौगोलिक क्षेत्रमा कीर्तिमानी माग” देखिएको थियो। सेवाबाट हुने आम्दानी पनि अघिल्लो वर्षको तुलनामा १४ प्रतिशतले बढ्दै नयाँ रेकर्डमा पुगेको छ। कम्पनीका अनुसार यसको सक्रिय उपकरण संख्या २.५ अर्बभन्दा बढी पुगेको छ।
प्रकाशित: २९ माघ २०८२, बिहीबार
