काठमाडौं ।
ट्रम्प प्रशासनले इलन मस्कको डिपार्टमेन्ट अफ गभर्नमेन्ट एफिसिएन्सी (डीओजीई) का दुई सदस्यले अमेरिकी नागरिकहरूको सामाजिक सुरक्षा नम्बर (एसएसएन) मा पहुँच पुर्याएर ती विवरण साझा गरेको हुन सक्ने स्वीकार गरेको छ।
अदालतका कागजातअनुसार ती डाटाहरू गत वर्ष “केही राज्यहरूमा निर्वाचन नतिजा उल्ट्याउने” उद्देश्य राख्ने एक राजनीतिक पैरवी समूहलाई सहयोग गर्न प्रयोग गरिएको हुन सक्छ।
पहिलो पटक पोलिटिकोले सार्वजनिक गरेको यो खुलासा सामाजिक सुरक्षा प्रशासन (एसएसए) का शीर्ष अधिकारीहरूले डीओजीईको डाटामा पहुँचसम्बन्धी कानुनी विवादमा यसअघि दिएको बयानमा गरिएका सुधारहरूको श्रृंखलाको हिस्सा हो।
अदालतका कागजातमा न त डीओजीईका ती दुई सदस्यको नाम उल्लेख गरिएको छ, न त सम्बन्धित पैरवी समूहको पहिचान नै खुलाइएको छ।
न्याय मन्त्रालयकी अधिकारी एलिजाबेथ शापिरोले अदालतमा दर्ता गरिएका कागजातमा लेखेअनुसार, सन् २०२५ को मार्चमा एक राजनीतिक पैरवी समूहले एसएसएमा कार्यरत डीओजीई टिमका दुई सदस्यलाई सम्पर्क गर्दै आफूले प्राप्त गरेको राज्यस्तरीय मतदाता सूचीको विश्लेषण गर्न अनुरोध गरेको थियो। ‘उक्त पैरवी समूहको स्पष्ट उद्देश्य मतदाता ठगीका प्रमाण खोज्ने र केही राज्यहरूमा निर्वाचन नतिजा उल्ट्याउने थियो,’ शापिरोले लेखेकी छन्।
शापिरोका अनुसार, त्यसपछि डीओजीई का एक सदस्यले एसएसएका कर्मचारीको हैसियतमा उक्त पैरवी समूहसँग ‘भोटर डाटा सम्झौता’ मा हस्ताक्षर गरी पठाएका थिए।
अदालतको आदेशअनुसार सो समयमा पहुँच निषेध गरिएका निजी विवरण—जसमा सामाजिक सुरक्षा नम्बर पनि पर्छ—डीओजीईका ती सदस्यहरूले हेरेको र स्वीकृति नपाएका ‘तेस्रो पक्ष’ सर्भरमा डाटा साझा गरिएको हुन सक्ने आशंका गरिएको छ।
‘सम्बन्धित डीओजीई टिमका सदस्य बाहेक एसएसएका अन्य कर्मचारीहरूलाई उक्त पैरवी समूहसँग भएका सम्पर्क वा “भोटर डाटा सम्झौता” बारे जानकारी थियो भन्ने कुनै प्रमाण हालसम्म छैन,’ शापिरोले उल्लेख गरेकी छन्।
ती दुई डीओजीई सदस्यले वास्तवमै डाटा साझा गरे वा नगरे भन्ने कुरा अझै स्पष्ट नभए पनि, इमेलहरूबाट ‘एसएसए डाटालाई मतदाता सूचीसँग मिलान गर्न पैरवी समूहलाई सहयोग गर्न डीओजीई टिमका सदस्यहरूलाई अनुरोध गरिएको हुन सक्ने’ संकेत मिलेको शापिरोले बताएकी छन्।
शापिरोका अनुसार एसएसएले ती दुई डीओजीई कर्मचारीलाई ह्याच एक्ट उल्लङ्घनको सम्भावनामा सन्दर्भित गरेको छ। उक्त कानुनले संघीय कर्मचारीलाई आफ्नो आधिकारिक पद राजनीतिक गतिविधिका लागि प्रयोग गर्न प्रतिबन्ध लगाउँछ।
गत वर्ष एक संघीय न्यायाधीशले डीओजीई का सदस्यहरूलाई एसएसएका प्रणालीमा पहुँच गर्न रोक लगाउने आदेश जारी गरेका थिए। सो प्रणालीमा सामाजिक सुरक्षा नम्बर, स्वास्थ्यसम्बन्धी विवरण, ड्राइभिङ लाइसेन्स नम्बर, करसम्बन्धी जानकारीलगायत विभिन्न प्रकारका व्यक्तिगत डाटा समावेश थिए।
पछि एसएसएका एक ह्विसलब्लोअरले डीओजीई ले करोडौँ सामाजिक सुरक्षा अभिलेखहरू सुरक्षा कमजोर रहेको क्लाउड सर्भरमा अपलोड गरेको आरोपसमेत लगाएका थिए।
प्रकाशित: ८ माघ २०८२, बिहीबार
