काठमाडौं ।
जर्मनीको दूरसञ्चार नियामक निकायले कपर नेटवर्क क्रमशः बन्द (डिकमिसन) गर्ने प्रारम्भिक योजना तयार पारेको छ। यसलाई हालसम्म फाइबर विस्तारमा पछि परेको जर्मनीले फाइबरतर्फ संक्रमणलाई प्रोत्साहन दिन थालेको पछिल्लो संकेतका रूपमा हेरिएको छ।
फेडरल नेटवर्क एजेन्सी (बीनेट्जा) ले कानुनमै समेटिने नियमहरू प्रस्ताव गरेको छ, जसअनुसार कुनै क्षेत्रमा फाइबर कभरेज न्यूनतम तहमा पुगेपछि र उपयुक्त होलसेल सेवाहरू उपलब्ध भएमा कपर नेटवर्क बन्द गर्न अनुमति दिइनेछ।
बीनेट्जाका अनुसार, फाइबर कभरेज ८० प्रतिशत पुगेपछि माइग्रेसन प्रक्रिया सुरु गरिनुपर्छ, र कपर नेटवर्क पूर्ण रूपमा बन्द हुने समयसम्म देशव्यापी फाइबर कभरेज हासिल भइसकेको हुनुपर्ने आदर्श अवस्था हो।
यसलाई ध्यानमा राख्दै बीनेट्जाले सहज संक्रमण सुनिश्चित गर्न विभिन्न उपायहरू प्रस्ताव गरेको छ। कपर–आधारित सेवाको बजारिकरण नेटवर्क बन्द हुनु भन्दा २४ महिना अगावै रोक्नुपर्ने र अन्तिम डिकमिसनभन्दा कम्तीमा १२ महिना अघि थप सूचना जारी गर्नुपर्ने सुझाव दिएको छ।
टेलिकम्स डटकमका अनुसार उपयुक्त होलसेल सेवाको परिभाषा स्पष्ट पार्दै बीनेट्जाले खुला पहुँच फाइबर नेटवर्कहरू खुद्रा इन्टरनेट सेवा प्रदायकहरू (आईएसपी) का लागि व्यापक रूपमा उपलब्ध हुनुपर्ने बताएको छ। यसका लागि प्रविधि, प्रक्रिया र मूल्य निर्धारणसम्बन्धी एकरूप नियम लागू हुनुपर्ने उल्लेख गरिएको छ।
यी प्रस्तावहरूमाथि सरोकारवाला र इच्छुक पक्षहरूले १६ मार्चसम्म प्रतिक्रिया दिन सक्नेछन्।
बीनेट्जाका अध्यक्ष क्लाउस मुलरका अनुसार, “फाइबर अप्टिक्समा रूपान्तरण जर्मनीका लागि भविष्य–उन्मुख इन्टरनेट उन्नयन हो। फाइबर लगभग देशव्यापी रूपमा उपलब्ध नहुँदासम्म र नयाँ नेटवर्कमा प्रतिस्पर्धा सुनिश्चित नहुँदासम्म कपर नेटवर्क बन्द गर्न सकिँदैन। त्यसैले निश्चित सर्तहरू पूरा भएपछि—फाइबर कसले बिछ्याएको हो भन्ने कुरासँग असम्बन्धित रूपमा—कपर नेटवर्क बन्दतर्फको प्रक्रिया सुरु हुनुपर्छ।”
उनले थपे, “यस नियामक अवधारणामार्फत हामी कपरबाट फाइबरतर्फ सफल माइग्रेसनको दृष्टिकोण प्रस्तुत गरिरहेका छौँ। उपभोक्तालाई संक्रमणका सबै चरणबारे प्रारम्भिक र स्पष्ट जानकारी दिनुपर्छ। साथै, फाइबर युगमा उनीहरूले विभिन्न सेवा प्रदायक र न्यायोचित मूल्यबीच छनोट गर्न पाउनुपर्छ।”
युरोपका अन्य देशहरूको तुलनामा वर्षौंसम्म पछि परे पनि, पछिल्ला वर्षहरूमा जर्मनीले फाइबर विस्तारमा उल्लेखनीय प्रगति गरेको छ। BNetzA का तथ्यांकअनुसार, गत जुनको अन्त्यसम्म एफटीटीएच/बी बाट कभर भएका घरधुरीको संख्या २ करोड ४६ लाख पुगेको छ, जुन जर्मनीका कुल घरधुरीको करिब ६० प्रतिशत हो। पाँच वर्षअघि यो संख्या मात्र ६७ लाख थियो।
तीमध्ये करिब आधा घरधुरीहरू डोयच टेलिकमले कभर गरेको छ। बाँकी हिस्सा डोयच ग्लासफेजर, भोडाफोन, अल्टिसको संयुक्त उपक्रम ओएक्सजी, टेलिफोनिका र अलियाञ्जको संयुक्त ‘अन्सेर ग्रुन ग्लासफेजर (यूजीजी)’ तथा यूरोफाइबर जस्ता साना प्रतिस्पर्धीहरूले सम्हालेका छन्।
तर फाइबरको प्रयोग दर अझै कम छ। हाल सक्रिय फाइबर कनेक्शन ५८ लाख मात्रै छन् जसमा एफटीटीबी १२ लाख र एपटीटीएच ४६ लाख छन्। यसले कुल २३.६ प्रतिशत टेक–अप दर देखाउँछ। तुलना गर्दा बेलायतको ओपनरपिचले गत नोभेम्बरमा ३८ प्रतिशत टेक–अप दर रिपोर्ट गरेको थियो।
डीएसएल अझै पनि सबैभन्दा लोकप्रिय पहुँच प्रविधि बनेको छ, जसमा २ करोड ३२ लाख सक्रिय कनेक्शन छन्—यो संख्या २०२० को उच्चतम २ करोड ५४ लाखबाट थोरै मात्र घटेको हो। ८५ लाख कनेक्शनसहित हाइब्रिड फाइबर कोएक्सियल (एचएफसी) दोस्रो स्थानमा छ।
यसले के संकेत गर्छ भने फाइबर सेवाले अझै पनि अधिकांश फिक्स्ड ब्रोडब्यान्ड ग्राहकलाई डीएसएल छोड्न प्रेरित गर्ने जति राम्रो मूल्य–प्रस्ताव दिन सकेको छैन।
तर कपर सेवाको बजारिकरण बन्द भएपछि अन्ततः उपभोक्तासँग विकल्प सीमित हुनेछ। यदि बीनेट्जाको योजना अनुसार प्रक्रिया अघि बढ्यो भने, होलसेल फाइबर बजार पर्याप्त रूपमा विस्तार र प्रतिस्पर्धात्मक हुने अपेक्षा गरिएको छ, जसले मूल्यलाई अझ आकर्षक बनाउने टेलिकम्स डटकमले उल्लेख गरेको छ।
प्रकाशित: ८ माघ २०८२, बिहीबार
