काठमाडौं ।
क्यालिफोर्निया पब्लिक युटिलिटिज कमिसन (सीपीयूसी) ले विविधता, समानता र समावेशिता (डीईआई) सहित केही सर्तहरू राख्दै भेराइजनद्वारा फ्रन्टियर कम्युनिकेसन्सको अधिग्रहणलाई स्वीकृति दिएको छ।
यस निर्णयसँगै भेराइजनले फ्रन्टियर कम्युनिकेसन्स र त्यसका क्यालिफोर्नियास्थित सहायक कम्पनीहरू अधिग्रहण गर्न पाउनेछ। तर, अघिल्ला चरणहरूझैँ यसपटक पनि दूरसञ्चार कम्पनीले नयाँ सर्तहरूको पालना गर्नुपर्नेछ।
सीपीयूसीका सर्तअनुसार भेराइजनले कम आय भएका ग्राहक र क्यालिफोर्निया लाइफलाइन सहभागीहरूका लागि सुरक्षा सहित किफायती भ्वाइस र ब्रडब्यान्ड विकल्प विस्तार गर्नुपर्नेछ। साथै, ब्रडब्यान्ड विस्तार र नेटवर्कको विश्वसनीयतामा लगानी गर्नुपर्नेछ र “समग्र आदिवासी (ट्राइबल) संलग्नता आवश्यकताहरू” स्थापना गर्नुपर्नेछ।
त्यसैगरी विविध आपूर्ति शृंखला र कार्यबल प्रवर्द्धन गर्ने क्यालिफोर्नियाको सार्वजनिक नीतिलाई समर्थन गर्नुपर्नेछ, जसअन्तर्गत क्यालिफोर्निया स्टेट युनिभर्सिटी प्रणालीसँग १ करोड डलरको साझेदारी पनि समावेश छ।
ग्रामीण तथा कपर (तामाको तारमा आधारित) सेवाका ग्राहकलाई “कार्यान्वयनयोग्य कार्यसम्पादन मापदण्ड, लचिलोपन आवश्यकताहरू र निगरानी” मार्फत संरक्षण गर्नुपर्नेछ। कडा कार्यान्वयन र अनुगमन—रिपोर्टिङ र अनुपालन संयन्त्रसहित—समेत सुनिश्चित गर्नुपर्नेछ।
यसका अतिरिक्त, किफायतीपन, सेवा गुणस्तर, श्रम संरक्षण, पूर्वाधार विस्तार र क्यालिफोर्नियाका साना व्यवसायसँग ५० करोड डलर खर्च गर्ने प्रतिबद्धता पनि सर्तमा समावेश छन्।
“क्यालिफोर्नियाले केवल मर्जर स्वीकृत गरिरहेको छैन, हामी समुदायलाई जोड्ने, आवश्यक परेकाहरूका लागि लागत घटाउने र कार्यबल तथा आपूर्तिकर्ता विविधता संरक्षणलाई मजबुत बनाउने ठोस प्रतिबद्धता सुरक्षित गरिरहेका छौँ,” सीपीयूसी का आयुक्त तथा जिम्मेवार आयुक्त जोन रेनोल्ड्सले बताएका छन्। “दृढ सर्त र स्वतन्त्र निगरानीमार्फत यी प्रतिबद्धता क्यालिफोर्नियाली परिवारका लागि वास्तविक सुधारमा रूपान्तरण हुने सुनिश्चित गर्दै हामी विविध समुदायलाई समर्थन गर्ने क्यालिफोर्नियाका मूल्यहरूका पक्षमा उभिएका छौँ।”
टेलिकम्स डटकमका अनुसार भेराइजनले जारी गरेको विज्ञप्तिमा, सम्झौता सम्पन्न भएपछि ३१ राज्य र वाशिङ्टन डीसीमा करिब ३ करोड फाइबर ‘पासिङ्स’ (फाइबर पुग्ने घरधुरी/व्यवसाय) सम्म आफ्नो पहुँच विस्तार हुने जनाएको छ।
भेराइजनका सीईओ ड्यान शुल्मानले भनेका छन्, “फ्रन्टियर अधिग्रहण बन्द गर्ने दिशाको यो मार्ग भेराइजनको विकासक्रममा महत्वपूर्ण कोशेढुङ्गा हो र बजार नेतृत्व पुनः प्राप्त गर्ने हाम्रो रूपान्तरणतर्फको साहसी कदम हो।
सम्झौता सम्पन्न भएपछि, मोबाइल, घरायसी इन्टरनेट र अन्य आवश्यक सेवाका लागि व्यापक क्षेत्रभरि उत्कृष्ट संयुक्त मोबाइल–फाइबर अनुभव प्रदान गर्न हामी विशिष्ट रूपमा सक्षम हुनेछौँ।
“हामी ग्राहकलाई सेवा दिन, खुशी पार्न र उनीहरूको विश्वास तथा निष्ठा जित्न पूर्ण रूपमा केन्द्रित छौँ। आगामी हप्ता लेनदेन सम्पन्न भएपछि, हाम्रो धेरै विस्तारिएको पहुँचले थप क्षेत्रका थप घरधुरी र व्यवसायलाई बढी मूल्य प्रदान गर्नेछ, जसले हाम्रो वृद्धिलाई अघि बढाउनेछ र ग्राहक तथा शेयरधारक दुवैलाई लाभ पुर्याउनेछ।”
भेराइजनले सेप्टेम्बर २०२४ मा फ्रन्टियर कम्युनिकेसन्स अधिग्रहणमा सहमति जनाएको थियो, जसले फाइबर नेटवर्क अपरेटरको मूल्य २० अर्ब डलर आँकिएको थियो।
यो प्रक्रिया अघि बढाउँदा भेराइजन विभिन्न नियामक निकायबीच डीईआई सम्बन्धी फरक दृष्टिकोणका कारण दबाबमा परेको थियो। सीपीयूसी ले हालै राखेका केही सर्तहरू एफसीसी का दृष्टिकोणसँग वैचारिक रूपमा ठोक्किन्छन्ज हाँ सीपीयूसीले डीईआई सम्बन्धी केही सुरक्षा कायम राख्न चाहन्छ, त्यहीं एफसीसीले वर्तमान प्रशासनको धारणा अनुरूप विद्यमान कर्पोरेट डीईआई नीतिहरू हटाउन चाहन्छ।
गत वर्ष मे महिनामा एफसीसीले लाइसेन्स र अन्य अनुमतिहरू हस्तान्तरण गर्न आवश्यक आवेदनहरू स्वीकृत गर्दै सम्झौतालाई हरियो बत्ती दिएको थियो। तर, सम्झौता अघि बढाउन भेराइजनले आफ्नो डीईआई विभाग बन्द गर्यो र व्यवसायका अन्य क्षेत्रमा रहेका डीईआई नीतिहरू पनि हटायो।
त्यस समय एफसीसीलाई पठाएको पत्रमा भेराइजनले भनेको थियो, “डीईआई सम्बन्धी नियामक र नीतिगत परिदृश्य परिवर्तन भएको हामी स्वीकार गर्छौँ। यस परिवर्तनको सन्दर्भमा हामीले डीईआई सम्बन्धी कार्यक्रम, मानव संसाधन प्रक्रिया, आपूर्तिकर्ता कार्यक्रम, तालिम सामग्री र अन्य पहलहरूको मूल्याङ्कन गरिरहेका छौँ। केही डीईआई नीति र अभ्यास विभेदसँग जोडिन सक्ने ठहर भएकाले, समान रोजगारी अवसर र भेदभावरहितताप्रति प्रतिबद्धता पुनः पुष्टि गर्दै हामी अभ्यासहरू परिमार्जन गर्दै डीईआई सम्बन्धी नीतिहरू अन्त्य गर्दैछौँ… यी परिवर्तन तत्काल लागू हुन्छन्।”
सीपीयूसी यस विकासक्रमप्रति सन्तुष्ट नभएको देखिएको थियो र नोभेम्बरसम्म पनि यो विषय अड्को बनेको संकेत थियो। क्यालिफोर्नियाले पछिल्लोपटक तोकेका नयाँ सर्तहरूमार्फत यो विवाद समाधान भएको देखिन्छ।
अब कुनै अप्रत्याशित अवरोध नआएमा, परस्पर विरोधी विचारधाराबीचको यो सन्तुलन सम्हाल्दै भेराइजनले मर्जरको फाइदा उठाउन सक्ने अवस्थामा पुगेको टेलिकम्स डटकमले उल्लेख गरेको छ।
प्रकाशित: ४ माघ २०८२, आईतवार
