काठमाडौं ।
ऊर्जा, जलस्रोत तथा सिँचाइमन्त्री कुलमान घिसिङले आगामी दिनमा सौर्य ऊर्जालाई प्राथमिकता दिनुपर्ने बताएका छन्।
नेपाल सौर्य ऊर्जा विद्युत् सङ्घको २५ औँ वार्षिक साधारण सभालाई मङ्गलबार सम्बोधन गर्दै उनले नेपालमा सौर्य ऊर्जा बढ्दो क्रममा रहेकाले यसलाई प्राथमिकतामा राख्नुपर्ने बताएका हुन्।
“सौर्य ऊर्जा राष्ट्रिय प्रसारण ग्रिडमा जोडिन थालेको छ, यसको उत्पादन बढाउन सके विद्युत् आयात घटाउन सकिन्थ्यो,” उनले भने। मन्त्री घिसिङले सौर्य ऊर्जालाई अगाडि बढाउन सरकारले मापदण्ड बनाएर कार्यान्वयनमा लैजान लागेको बताउँदै देशभर रहेका सिँचाइका नहरमा सौर्य ऊर्जा उत्पादनका लागि सरकारले अध्ययन गरिरहेको उल्लेख गरे।
“सिँचाइका नहरमाथि सौर्य ऊर्जा उत्पादन गरेर कसरी निजी क्षेत्रलाई समावेश गर्न सकिन्छ भनेर सरकार लागिरहेको छ,” उनले भने।
उनले छिमेकी मुलुक भारतमा एक लाख मेगावाटभन्दा बढी सौर्य ऊर्जा उत्पादन भइरहेको चर्चा गर्दै नेपालको पहाडी भूभागमा रहेका डाँडाको प्रयोग गरेर नेपालमा पनि सौर्य ऊर्जा उत्पादन बढाउन सकिने बताए। भारतमा १५ हजार मेगावाट विद्युत् निर्यात गर्ने गरी प्रसारण लाइन निर्माण भइरहेको उनको भनाइ थियो।
राष्ट्रिय योजना आयोगका उपाध्यक्ष डा. प्रकाशकुमार श्रेष्ठले जलवायु परिवर्तनले खोलाहरू सुक्दै जाँदा विद्युत् उत्पादनमा असर परिरहेको बताए। आगामी दिनमा नेपालले सौर्य ऊर्जालाई प्राथमिकता दिनुपर्ने उनको भनाइ थियो। उपाध्यक्ष श्रेष्ठले १६ औँ पञ्चवर्षीय योजनालाई नवीकरणीय ऊर्जालाई प्राथमिकता दिएको बताए।
ऊर्जा, जलस्रोत तथा सिँचाइ मन्त्रालयका सचिव चिरञ्जीवी चटौतले सरकारले आगामी दुई वर्षभित्र पूर्ण विद्युतीकरण गरिसक्ने लक्ष्यसाथ काम गरिरहेको बताए। उनले जलविद्युत्सँगै सौर्य ऊर्जा क्षेत्रमा पनि क्रमशः विकास हुँदै गएको उल्लेख गरे।
वैकल्पिक ऊर्जा प्रवर्धन केन्द्रका कार्यकारी निर्देशक नवराज ढकालले नेपालभित्र विद्युत्को पहुँच नपुगेका दूरदराजको क्षेत्रमा सौर्य ऊर्जा पुऱ्याउन वैकल्पिक ऊर्जा प्रवर्धन केन्द्रसँगको सहकार्यमा सङ्घले निर्वाह गरेको भूमिका सराहनीय रहेको बताए।
नेपाल उद्योग वाणिज्य महासङ्घका वरिष्ठ उपाध्यक्ष अञ्जनकुमार श्रेष्ठले सौर्य ऊर्जा उत्पादनलाई मर्यादित र व्यवस्थित बनाउन सङ्घले निर्वाह गरेको भूमिकाको प्रशंसा गरे। सङ्घको २५ औँ वार्षिक साधारण सभाबाट नयाँ नेतृत्व चयन गर्ने कार्यक्रम रहेको छ।
आजको गोरखापत्रबाट
प्रकाशित: २३ पुष २०८२, बुधबार
