काठमाडौं ।
स्पेनका लागि गत वर्ष प्रक्षेपण गरिएका दुई सैन्य सञ्चार उपग्रहमध्ये दोस्रो स्याटेलाइट स्पेनस्याट एनजी-२ पृथ्वीभन्दा धेरै माथि कक्षामा पुग्ने क्रममा एउटा “अन्तरिक्ष कण”सँग ठोक्किएको छ।
स्पेनको रक्षा मन्त्रालयका तर्फबाट स्याटेलाइटको स्वामित्व र सञ्चालन गर्ने कम्पनी हिस्डेस्याटमा बहुसंख्यक सेयर रहेको इन्द्र ग्रुपले जनवरी २ मा जारी गरेको वक्तव्यमा यसबारे जानकारी दिएको हो।
स्पेस डटकमका अनुसार स्पेनस्याट एनजी-२ लाई अक्टोबर २३ मा फ्लोरिडास्थित केप क्यानाभेरल स्पेस फोर्स स्टेशनबाट स्पेसएक्सको फाल्कन ९ रकेटमार्फत प्रक्षेपण गरिएको थियो।
यो स्याटेलाइटले सुरक्षित सञ्चारका लागि बनाइएको दुई उपग्रहको प्रणाली पूरा गर्ने उद्देश्य राखिएको थियो तर अब त्यो सम्भव नहुन सक्ने संकेत देखिएको छ। यसअघि स्पेनस्याट एनजी-१ पनि गत जनवरीमा फाल्कन ९ रकेटमार्फत कक्षामा पठाइएको थियो।
एयरबसले निर्माण गरेको करिब २ अर्ब युरो (२.३ अर्ब अमेरिकी डलर) लागतको यी दुई उपग्रहलाई युरोपकै “उन्नत सरकारी सञ्चार प्रणाली” का रूपमा डिजाइन गरिएको थियो।
इन्द्र ग्रुपका अनुसार उक्त अन्तरिक्ष कणको ठोक्किने घटना करिब ३१,००० माइल (५०,००० किलोमिटर) उचाइमा भएको हो, जुन भूस्थिर कक्षा (जियोस्टेसनरी अर्बिट) भन्दा पनि माथि पर्छ।
भूस्थिर कक्षा पृथ्वीबाट करिब २२,२३६ माइल (३५,७८६ किलोमिटर) उचाइमा रहेको हुन्छ। प्रक्षेपणपछि स्पेनस्याट एनजी-२ भूस्थिर कक्षातर्फ बिस्तारै सर्दै थियो, तर ठोक्किने भएपछि यसको वर्तमान अवस्थाबारे अझै स्पष्ट जानकारी सार्वजनिक गरिएको छैन।
इन्द्र ग्रुपका अनुसार, “रक्षा मन्त्रालय र अन्य ग्राहकहरूको सेवा प्रभावित नहोस् भनेर हिस्डेस्याटले आकस्मिक योजना लागू गरिसकेको छ।” वक्तव्यमा थप भनिएको छ, “प्राविधिक टोलीले उपलब्ध तथ्याङ्कको विश्लेषण गरेर क्षतिको स्तर निर्धारण गरिरहेको छ। आवश्यक परेमा स्पेनस्याट एनजी-२ लाई सकेसम्म छिटो प्रतिस्थापन गरिनेछ।”
प्रकाशित: २३ पुष २०८२, बुधबार
