काठमाडौं ।
अमेरिकी राष्ट्रपति ट्रम्पले सुरक्षा र चीनसम्बन्धी चिन्ता देखाउँदै चिप्स सम्झौता रोकेका छन्। राष्ट्रपति ट्रम्पले शुक्रबार अमेरिकी फोटोनिक्स कम्पनी हाइफो कर्पले न्यु जर्सीस्थित एअरोस्पेस तथा रक्षा क्षेत्रको कम्पनी एमकोरका सम्पत्ति ३० लाख डलरमा किन्ने सम्झौता राष्ट्रिय सुरक्षा र चीनसँग सम्बन्धित चिन्ताका कारण रोकेका छन्।
ह्वाइट हाउसले सार्वजनिक गरेको आदेशमा ट्रम्पले हाइफो “जनवादी गणतन्त्र चीनका नागरिकद्वारा नियन्त्रणमा रहेको” भन्दै २०२४ मा एमकोरका व्यवसायहरू अधिग्रहण गरेपछि उक्त कम्पनीले “अमेरिकाको राष्ट्रिय सुरक्षामा असर पार्ने खालका कदम चाल्न सक्ने” विश्वास गर्न आफू बाध्य भएको उल्लेख गरेका छन्। आदेशमा कुनै व्यक्तिको नाम उल्लेख गरिएको छैन र ट्रम्पका चिन्ताबारे विस्तृत विवरण पनि दिइएको छैन।
“यो कारोबार यहाँबाट निषेध गरिएको छ,” ट्रम्पले भनेका छन् र हाइफोलाई “जहाँ भए पनि एमकोरका सम्पत्तिसँग सम्बन्धित सबै हित र अधिकार” १८० दिनभित्र बेच्न आदेश दिएका छन्।
रोयटर्सका अनुसार अमेरिकामा विदेशी लगानीसम्बन्धी समिति (सीएफआईयूएस) ले उक्त सम्झौतामाथि गरेको अनुसन्धानमा राष्ट्रिय सुरक्षासम्बन्धी जोखिम पहिचान गरेको भन्दै ट्रेजरी विभागले ट्रम्पको आदेशपछि जनाएको छ। तर बयानमा जोखिम के हो भन्ने कुरा स्पष्ट गरिएको छैन।
शुक्रबार ढिलासम्म हाइफो र एमकोर दुवैसँग प्रतिक्रिया लिन तत्काल सम्भव भएन र उनीहरूले आफ्ना वेबसाइटमा पनि कुनै प्रतिक्रिया सार्वजनिक गरेका थिएनन्।
सम्झौता हुँदा सार्वजनिक रूपमा सूचीकृत रहेको र पछि निजीकरण गरिएको एमकोरले हाइफोले आफ्नो चिप्स व्यवसाय र इन्डियम–फस्फाइड वेफर निर्माण सञ्चालन २.९२ मिलियन डलरमा किनेको बताएको छ।
हाइफोले त्यतिबेला आफू पूर्व एमकोर इन्जिनियरिङ उपाध्यक्ष गेन्जाओ झाङ र ह्यारी मूरले सह–स्थापना गरेको कम्पनी भएको जनाएको थियो। ह्यारी मूरको लिंक्डइन प्रोफाइलअनुसार उनी एमकोरका पूर्व वरिष्ठ बिक्री निर्देशक हुन्।
प्रकाशित: २१ पुष २०८२, सोमबार
