काठमाडौं ।
हालैको र्यालीपछि ट्रम्प मिडियामा शर्ट इन्ट्रेस्ट बढेको एस३ पार्टनर्सले जनाएको छ। वित्तीय डाटा कम्पनी एस३ पार्टनर्सका अनुसार अमेरिकी राष्ट्रपति डोनाल्ड ट्रम्पको सामाजिक सञ्जाल कम्पनीमा हालैको मर्जर घोषणापछि शर्ट इन्ट्रेस्ट बढेको छ जसले केही व्यापारीहरूले सेयरले हालै कमाएको लाभ फिर्ता गर्न सक्ने अपेक्षा गरेको संकेत गर्छ।
घाटा बेहोर्दै आएको ट्रम्प मिडिया एन्ड टेक्नोलोजी ग्रुपका सेयरहरू कम्पनीले गुगल समर्थित टीएई टेक्नोलोजिजसँग ६ अर्ब डलरको मर्जर घोषणा गरेको डिसेम्बर १८ को मितिदेखि ३० प्रतिशतभन्दा बढीले बढेका छन्। उक्त घोषणापछि दुई दिनमै सेयर मूल्य अधिकतम ६३ प्रतिशतसम्म उकालिएको थियो।
के हो शर्ट इन्ट्रेस्ट?
कम्पनी वा धितोपत्र बजारमा शर्ट इन्ट्रेस्ट भन्नाले कुनै कम्पनीका कति सेयरहरू उधारो लिएर बेचिएका छन् तर अझै फिर्ता (कभर) गरिएको छैनन् भन्ने जनाउँछ। यो सूचकले लगानीकर्ताहरूको धारणा बताउँछ।
यदि शर्ट इन्ट्रेस्ट धेरै छ भने बजारले उक्त कम्पनीको सेयर मूल्य घट्न सक्छ भन्ने नकारात्मक अपेक्षा गरेको संकेत हुन्छ र यदि असामान्य रूपमा धेरै भयो भने भविष्यमा शर्ट स्क्विज (एकाएक मूल्य तीव्र रूपमा बढ्नु) को सम्भावना पनि देखाउँछ।
रोयटर्सका अनुसार मर्जर घोषणा यता ट्रम्प मिडियाका सेयरमा सर्ट इन्टरेस्ट ३१ प्रतिशतले बढेर झन्डै १ करोड ६० लाख सेयर पुगेको छ, जुन अक्टोबरयताकै उच्च स्तर आसपास हो, एस३ पार्टनर्सले शुक्रबारको प्रतिवेदनमा भनेको छ।
शुक्रबार सेयर ४ प्रतिशतले बढेर १३.७७ डलर पुगेको अवस्थामा, त्यो सर्ट इन्टरेस्टले कम्पनीका सेयर घट्ने अनुमानमा करिब २१८ मिलियन डलर बराबरको बाजीलाई जनाउँछ।
ट्रम्प मिडियाको सबै-सेयरमा आधारित सम्झौता कृत्रिम बुद्धिमत्ता डाटा सेन्टरबाट आएको ऊर्जा बूममा ठूलो दाउ हो र यसले क्रिप्टोकरेन्सीदेखि रियल इस्टेट तथा मोबाइल सेवासम्म फैलिएको ट्रम्प परिवारका विविध व्यवसायमा थप जोड दिएको छ।
ट्रम्पसँग ट्रम्प मिडियाका ११.५ करोड सेयर छन्, जुन कम्पनीको करिब ४० प्रतिशत हो। मर्जरपछि बनेको कम्पनीमा उनको हिस्सेदारी करिब २० प्रतिशत रहनेछ।
प्रकाशित: २० पुष २०८२, आईतवार
