Technology Khabar ३ पुष २०८२, बिहीबार
काठमाडौं ।
अटोमोटिभ उद्योगका केही खण्डहरूको विकास गम्भीर र द्रुत रहेको अवस्थामा अहिलेसम्म ब्याट्रीहरूतर्फ थोरै परिवर्तन भएको छ।
अमेरिकी कम्पनी युनिग्रिडले नयाँ १२–भोल्ट ब्याट्री विकास गरेको छ। ब्याट्रीको आयु लिड–एसिड ब्याट्रीहरू भन्दा दश गुणा लामो भएको र कम तापक्रम सहन सक्नुका साथै क्षति बिना पूर्ण रूपमा डिस्चार्ज गर्न सकिने कम्पनीको दावी छ।
नयाँ ब्याट्री पुरानो लिड–एसिड ब्याट्रीहरू भन्दा पूर्ण रूपमा फरक रसायन विज्ञानमा आधारित छ र यसमा सोडियम–आयन सेल्स प्रयोग गरिएको छ। ब्याट्रीले मुख्य पदार्थको रूपमा सामान्य नुन प्रयोग गर्ने टेलिग्राफले रिपोर्ट गरेको छ।
लिथियम–आयन ब्याट्रीहरूको तुलनामा नयाँ ब्याट्रीमा आगोको जोखिम कम भएको र यसले तथाकथित “थर्मल रनअवे” निम्त्याउन नसक्ने बताइएको छ।
युनिग्रिडले लिड–एसिड ब्याट्रीहरू भन्दा नयाँ ब्याट्रीको धेरै फाइदाहरू भएको बताएको छ। तातो र चिसो हावापानीमा ब्याट्री ५ हजारभन्दा बढी पटक चार्ज र डिस्चार्ज हुने अपेक्षा छ साथै यो लिड–एसिड ब्याट्री भन्दा १० गुणा बढी समय चल्नेछ।
यस हिसाबले सवारी साधन पार्क गर्नुपरेको खण्डमा ब्याट्री पूर्ण रूपमा डिस्चार्ज भए पनि फरक पर्दैन र यो क्षतिग्रस्त पनि हुँदैन। साथै नयाँ ब्याट्रीमा परम्परागत १२–भोल्ट ब्याट्रीको तुलनामा चिसो अवस्थामा दोब्बर सुरुवाती शक्ति रहेको दावी छ।
नयाँ ब्याट्री लिड–आधारित ब्याट्रीहरू भन्दा सस्तो हुने अपेक्षा गरिएको छ। युनिग्रिडले पहिले नै सवारी साधन निर्माता र वितरकहरूलाई नयाँ ब्याट्री बेच्न सुरु गरिसकेको घोषणा गरेको छ।
प्रकाशित: ३ पुष २०८२, बिहीबार
