कस्टम एआई प्रोसेसरको बिक्री बढ्दा समग्र नाफामा दबाब पर्यो: ब्रोडकम

काठमाडौं ।

ब्रोडकमको सेयर शुक्रबार ११ प्रतिशतभन्दा बढीले घटेपछि चिप निर्माता कम्पनीले कम नाफा दिने कस्टम एआई प्रोसेसरको बिक्री बढ्दा समग्र नाफामा दबाब परेको चेतावनी दिएको छ। यसले कम्पनीको व्यवसाय अपेक्षाकृत कम लाभदायक हुन सक्ने चिन्ता बढाएको छ।

मार्जिनमा परेको दबाबबारेको चेतावनीले ठूला प्रविधि कम्पनीहरूको एआई लगानीबाट हुने प्रतिफलबारे लगानीकर्तामा चासो बढाएको छ। एक दिनअघि ऋण लिएर एआई पूर्वाधार निर्माणमा ठूलो पूँजी खर्च गरेको कारण ओरेकलका सेयर १०.८ प्रतिशतले घटेका थिए।

पछिल्ला महिनामा प्रविधि कम्पनीहरूको सेयर मूल्य तीव्र रूपमा बढेपछि एआई खर्चबारे लगानीकर्ताको निगरानी झनै कडा बनेको छ। आफ्नै ग्राहकमा लगानी गर्ने ‘सर्कुलर डिल’हरूले पनि सम्भावित बबलको डर बढाएका छन्।

तर केही विश्लेषकले एआईको दीर्घकालीन सम्भावना अझै बलियो रहेको बताएका छन्। उनीहरूका अनुसार प्रविधि, विशेषगरी चिप कम्पनीहरू, थप क्षमता विस्तारका लागि उद्योगले सयौँ अर्ब डलर खर्च गर्ने तयारी गरिरहेका कारण वार्षिक रूपमा ठूलो फाइदा लिन सक्छन्।

रोयटर्सका अनुसार कस्टम एआई प्रोसेसर विकास गर्न चाहने कम्पनीका लागि महत्त्वपूर्ण सेवा प्रदान गर्दै आएको ब्रोडकमले यस वर्ष ठूलो सम्झौता हात पारेको छ। पछिल्ला दुई त्रैमासिकमा गुगलका लागि बनाइएका कस्टम ‘आइरनवुड’ चिपका लागि एन्थ्रोपिकबाट मात्र २१ अर्ब डलरको सम्झौता गरेको कम्पनीले जनाएको छ। शुक्रबारको गिरावटका बाबजुद ब्रोडकमको सेयर मूल्य यस वर्ष ५७ प्रतिशतभन्दा बढीले बढेको छ।

ब्रोडकमको सेयर अग्रिम मुख्य आम्दानीको आधारमा करिब ३२ गुणा इन्टरप्राइज भ्यालुमा कारोबार भइरहेको छ, जुन एआई चिप कम्पनी एनभिडियाको १९.६ गुणा र एडभान्स्ड माइक्रो डिभाइसेसको ३०.२ गुणाभन्दा बढी हो। यस वर्ष एनभिडियाका सेयर ३४ प्रतिशतले बढेका छन् भने एएमडीका सेयर ८३ प्रतिशतले उकालो लागेका छन्।

“अहिले धेरै कम्पनीको खर्च गर्ने योजना अझै निकै ठूलो देखिन्छ, त्यसैले डराएर निर्णय गर्नु चाँडो हुन्छ,” मेलियस रिसर्चका विश्लेषक बेन राइट्जेसले भने। तर ब्रोडकमले एआई आम्दानीको हिस्सा बढ्दा यस वर्षभरि मार्जिनमा दबाब रहने स्पष्ट पारेको छ। कम्पनीसँग ७३ अर्ब डलरको अर्डर ब्याकलग छ, जुन आगामी १८ महिनाभित्र आपूर्ति गर्ने अपेक्षा गरिएको छ।

यदि हालको गिरावट कायमै रहेमा ब्रोडकमको बजार मूल्यबाट २१३ अर्ब डलरभन्दा बढी घट्न सक्ने अनुमान गरिएको छ। “एआई चिपबाट हुने ग्रस मार्जिन घट्ने टिप्पणीका कारण सेयर बिक्री बढेको हो। तर यी चिप अपरेटिङ मार्जिन बढाउने खालका भएकाले हामी चिन्तित छैनौं,” मर्निङस्टारका विश्लेषकहरूले बताएका छन्।