काठमाडौं ।
दुई जना रूसी र एक जना अमेरिकी अन्तरिक्ष यात्री आठ महिना अन्तर्राष्ट्रिय अन्तरिक्ष स्टेशनमा बिताएर सुरक्षित रूपमा पृथ्वी फर्किएका छन्।
रूसी संघीय अन्तरिक्ष संस्था रोस्कोस्मसका सेर्गेई राइजिकोभ र अलेक्सी जुब्रित्स्की तथा नासाका जोनी किम आज मंगलबार (डिसेम्बर ९) काजाकस्तानको चिसो र हिउँ परिरहेको स्टेपी क्षेत्रमा अवतरण गरे।
प्यारासुटको सहायताले झर्दै आएको सोयुज एमएस – २७ यान ब्रेकिङ थ्रस्टरको सहयोगमा राति १२:०३ ईएसटी (०५:०३ जीएमटी वा स्थानीय समयअनुसार १०:०३ बजे) मा अवतरण भयो।
रोस्कोस्मसको उद्धार टोली नासा प्रतिनिधिसहित छिट्टै घटनास्थल पुग्यो र तीनै जना चालक दलका सदस्यलाई क्याप्सुलबाट बाहिर निकालेर छोटो स्वास्थ्य परीक्षणका लागि कुर्सीमा बसालियो। राइजिकोभ र किम राम्रो अवस्थामा र उत्साहित देखिन्थे। जुब्रित्स्कीलाई सोयुजबाट निस्किनासाथ सिधै फुलाउने मेडिकल टेन्टमा लगियो।
“सोयुज यात्राको अर्को चरण सफलतापूर्वक समाप्त भयो। एक्सपेडिसन ७३ का सबै काम पूरा भएका छन्,” राइजिकोभले अवतरणपछि भने। “हामी सबै राम्रो महसुस गरिरहेका छौँ।” अन्तरिक्ष यात्री र अन्तरिक्ष यात्रुहरूलाई अब हेलिकोप्टरमार्फत काजाकस्तानको करागान्डा लगिनेछ, जहाँ उद्धार टोलीको आधार छ। किम नासाको विमानमार्फत ह्युस्टन लैजान्छन् भने राइजिकोभ र जुब्रित्स्कीलाई रूसको स्टार सिटीस्थित गगारिन कोस्मोनट ट्रेनिङ सेन्टर पठाइनेछ।
स्पेस डटकमका अनुसार राइजिकोभ, जुब्रित्स्की र किमको पृथ्वी फिर्ती यात्रा सोमबार सुरु भएको थियो, जब उनीहरूले सोयुजलाई स्टेशनको प्रिचाल मोड्युलबाट अलग गरे। उनीहरूको प्रस्थान राति ८:४१ ईएसटी (मंगलबार ०१:४१ जीएमटी) मा भयो, जसले एक्सपेडिसन ७३ को औपचारिक अन्त्य र एक्सपेडिसन ७४ को शुरुवात जनायो।
“यहाँ बिताएको आठ महिनामा मैले सबैभन्दा धेरै सम्झने कुरा हामी बीचको सम्बन्ध हुनेछ,” किमले आइतबार कमान्ड हस्तान्तरणको छोटो समारोहमा भने।
“अन्तरिक्ष यात्रीको सबैभन्दा ठूलो गुण केवल प्राविधिक सीप वा निष्ठा होइन प्रेम हो भन्ने मेरो ठम्याई छ। एकअर्काप्रति र हाम्रो सुन्दर ग्रहका लागि प्रेम नै सबैभन्दा ठूलो शक्ति हो। हामीले यहाँ यही कुरा पूरा गर्यौँ — एकअर्कालाई सधैँ सम्मान दियौँ, माया गर्यौँ, जमिनमा हाम्रो सहयोग गर्ने सबैप्रति कृतज्ञता व्यक्त गर्यौँ। यही कुरा अन्तरिक्ष अन्वेषणलाई सम्भव र मानवीय बनाउँछ,” किमले थपे।
नवगठित एक्सपेडिसन ७४ मा स्टेशनमै रहेका सदस्यहरूमा कमान्डर माइक फिन्के, नासाका जेना कार्डम्यान र क्रिस विलियम्स, जापानको अन्तरिक्ष संस्था जाक्साका किमिया युई र रोस्कोस्मसका ओलेग प्लातोनोभ, सेर्गेई कुड-स्वेर्चकोभ र सेर्गेई मिकाएभ छन्।
कुड-स्वेर्चकोभ, मिकाएभ र विलियम्स नोभेम्बर अन्त्यतिर सोयुज मार्फत स्टेशन पुगेका थिए, जसको प्रक्षेपणले स्टेशनमा उडान गर्न सक्ने रूसको एकमात्र प्रक्षेपण स्थललाई गम्भीर रूपमा क्षति पुर्याएको थियो।
राइजिकोभ, जुब्रित्स्की र किमले तल्लो पृथ्वी कक्षमा बिताएका २४५ दिनमा सयौँ वैज्ञानिक अनुसन्धान र प्राविधिक परीक्षण गरेका थिए। उनीहरूले स्टेशनको मर्मत, मानवरहित कार्गो जहाजहरूको आगमन–प्रस्थान व्यवस्थापन गर्दै, नर्थरोप ग्रुमन (सिग्नस एक्सएल) र जाक्सा (एचटीभी-एक्स) का नयाँ अपग्रेडेड मालवाहक यानहरूको स्वागत पनि गरेका थिए।
राइजिकोभ र जुब्रित्स्कीले दुई वटा स्पेसवाक पनि गरे जसमा वैज्ञानिक उपकरण जडान र युरोपियन रोबोटिक आर्मका नियन्त्रण उपकरणलाई स्टेशनको रूसी सेग्मेन्ट बाहिर सार्ने काम समावेश थियो।
प्रकाशित: २३ मंसिर २०८२, मंगलवार
