टेस्लाको फुल सेल्फ ड्राइभिङ (सुपरभाइज्ड) को नयाँ संस्करण अपडेट गरेपछि गाडी चलाउँदै मेसेज गर्न मिल्ने

काठमाडौं ।

टेस्लाका सीईओ इलन मस्कले बिहीबार एक्समा पोस्ट गर्दै कम्पनीको फुल सेल्फ ड्राइभिङ (सुपरभाइज्ड) ड्राइभर–असिस्ट्यान्स सफ्टवेयरको नयाँ संस्करणले चालकलाई गाडी चलाउँदै मेसेज गर्न सक्ने अनुमति दिएको बताएका छन्। यद्यपि अमेरिकाका अधिकांश राज्यमा यस्तो कार्य गैरकानुनी छ।

मस्कले एक प्रयोगकर्तालाई जवाफ दिँदै यस्तो बताएका हुन्, जसले एपएसडी भनिने सफ्टवेयरको नयाँ अपडेटले फोन प्रयोग गर्दा चेतावनी नदेखाएको कुरा उल्लेख गरेका थिए। मस्कका अनुसार अपडेटले यस्तो अनुमति “वरिपरिको ट्राफिकको अवस्थाका आधारमा” दिन सक्छ।

मस्कले थप विवरण भने सार्वजनिक गरेका छैनन् र टेस्लासँग जानकारी दिने कुनै पीआर टोली छैन। मस्कले इमेलमार्फत पठाइएको टिप्पणी अनुरोधमा पनि प्रतिक्रिया दिएका छैनन्।

अमेरिकी परिवहन तथ्यांक ब्युरोका अनुसार अमेरिकाका लगभग सबै ५० राज्यले गाडी चलाउँदा मेसेज गर्न प्रतिबन्ध लगाएका छन्, र करिब आधा राज्यले गाडी चलाउँदा हातमा फोन समातेर कुनै पनि प्रयोग गर्न निषेध गरेका छन्।

टेकक्रञ्चका अनुसार मस्कले धेरै प्रचार गरे पनि एपएसडी अझै पनि ड्राइभर–असिस्ट्यान्स प्रणाली मात्र हो, जसले टेस्लाका गाडीलाई पूर्ण रूपमा स्वचालित बनाउँदैन। सुरुमा एफएसडी प्रयोग गर्दा चालकले स्टेयरिङमा हात राख्नुपर्ने थियो। पछि यो नियम हटाइयो, तर इन–क्याबिन क्यामेराले चालक सडकतर्फ ध्यान दिएको देखे मात्र हात हटाउन पाउने व्यवस्था गरिएको थियो।

एपएसडी ले इन–क्याबिन क्यामेरा र स्टेयरिङ सेन्सरहरूको संयोजनमार्फत चालकको ध्यान निगरानी गर्छ। प्रणाली पूर्ण स्वचालित नभएकाले, कुनै जटिल परिस्थिति आएमा चालकले तुरुन्तै नियन्त्रण लिन तयार हुनुपर्छ। यस्तो नियन्त्रण हस्तान्तरण नै ड्राइभर–असिस्ट्यान्स प्रणाली संलग्न दुर्घटनाहरूमा प्रमुख कारण मानिन्छ।

मस्क स्वयंले अघिल्लो वर्षहरूमा पनि सबै टेस्ला गाडीमा मानक रूपमा आउने अटोपाइलटले चालकलाई अत्यधिक ढुक्क बनाउने गरेको स्वीकार गरेका छन्। नियामक निकायहरूले अटोपाइलट सक्रिय हुँदा भएका दर्जनौँ मृत्यु दुर्घटनाहरू पत्ता लगाएका छन्।

अहिले अमेरिकी नेशनल हाइवे ट्राफिक सेफ्टी एडमिनिस्ट्रेशन (एनएचटीएसए) ले एपएसडीको छानबिन गरिरहेको छ किनकि ५० भन्दा बढी रिपोर्टमा यसले रातो बत्ती पार गरेको वा गलत लेनमा प्रवेश गरेको उल्लेख छ। एफएसडीले कम दृश्यता भएका अवस्थामा गराएका दुर्घटनाहरूको पनि छानबिन भइरहेको छ। एनएचटीएसएले पनि टिप्पणी अनुरोधमा तत्काल प्रतिक्रिया दिएको छैन।

टेस्ला क्यालिफोर्निया डीएमडब्लूसँगको लामो कानुनी विवादको अन्त्यतिर पनि पुगेको छ, जहाँ डीएमडब्लूले कम्पनीले एपएसडी र अटोपाइलट लाई वर्षौंसम्म गलत तरिकाले प्रचार गरेको आरोप लगाएको छ। डीएमडब्लूले अदालतमा कम्तिमा ३० दिनका लागि टेस्ला को कार बिक्री र उत्पादन निलम्बन गर्न अनुरोध गरेको छ। यस मामिलामा निर्णय वर्षको अन्त्यसम्म आउने अपेक्षा छ।