आर्टिफिसियल इन्टेलिजेन्सका कारण ६ मध्ये एक जर्मन आफ्नो जागिर गुमाउने चिन्तामा

काठमाडौं ।

सोमबार प्रकाशित एक सर्वेक्षण अनुसार, जर्मनीका लगभग १६ प्रतिशत कर्मचारीहरूले आर्टिफिसियल इन्टेलिजेन्स (एआई) का कारण आफ्नो जागिर जोखिममा पर्न सक्ने विश्वास व्यक्त गरेका छन्।

करियर प्लेटफर्म जिङको २०२५ को रोजगार बजार प्रतिवेदनले यो प्रवृत्ति बढ्दो क्रममा रहेको पत्ता लगाएको र गत वर्षको तुलनामा १४ प्रतिशत भन्दा बढी भएको उल्लेख गरिएको छ।

प्रतिनिधि सर्वेक्षणको लागि सर्वेक्षण गरिएका २,००० कर्मचारीहरूमध्ये लगभग २९ प्रतिशतले एआईले धेरै मानव कामदारहरूलाई प्रतिस्थापन गर्नेछ भन्ने विश्वास व्यक्त गरेका छन्।

यद्यपि, आर्टिफिसियल इन्टेलिजेन्स (एआई) का कारण आफ्नो जागिर जोखिममा पर्न सक्ने भन्ने धारणमा भने उमेर समूहहरू अनुसार फरक मत प्राप्त भएको उल्लेख गरिएको छ। विभिन्न उमेर समूहहरू अन्तर्गत १८ देखि २५ र ५५ देखि ६५ वर्षका ३२ प्रतिशतको तुलनामा २५ देखि ३४ वर्षका केवल २५ प्रतिशतले एआईका कारण धेरै जागिरहरू जोखिममा रहेको भनि विश्वास गरेको बताएका छन्।

युवा वयस्कहरूले एआईले नवप्रवर्तन र समाधानका लागि नयाँ अवसरहरू सिर्जना गर्न मद्दत गर्दछ भन्ने कुरामा सहमत हुने सम्भावना बढी देखिएको बताइएको छ भने ४५ वर्ष र सोभन्दा माथिका २१ प्रतिशतले मात्र आशावादी भएको बताएका छन्।

नोभेम्बरमा प्रकाशित जर्मन रोजगार अनुसन्धान संस्थान (आईएबी) र अन्य संस्थाहरूले गरेको एक अध्ययन अनुसार, श्रम बजारमा एआईले उल्लेखनीय अवरोध ल्याउने सम्भावना भए पनि, समग्र रोजगारी संख्या स्थिर रहने अपेक्षा गरिएको छ।

संरचनात्मक परिवर्तनबाट लगभग १६ लाख रोजगारी प्रभावित हुनेछन् भने तीमध्ये केही गुम्नेछन् र केही पूर्वानुमान अवधिमा सिर्जना हुनेछन् भन्ने तथ्य अनुसन्धानकर्ताहरूले पत्ता लगाएको थप उल्लेख गरिएको छ।

सूचना प्रविधि र सूचना सेवा क्षेत्रले विकासबाट विशेष रूपमा लाभ उठाउने विश्वास गरिएको छ भने मागले लगभग ११०,००० नयाँ रोजगारी सिर्जना गर्ने अपेक्षा गरिएको छ।

यसैबीच, कर्पोरेट सेवाहरू जस्ता क्षेत्रहरूमा लगभग १२०,००० रोजगारी गुम्न सक्ने टेलीग्राफले रिपोर्ट गरेको छ।