सामाजिक सञ्जाल एक्सले नयाँ सुविधा प्रस्तुत गर्यो, प्रमाणित नभएका खाता र बटहरुको संख्या घटाउने लक्ष्य

काठमाडौं ।

सामाजिक सञ्जाल प्लेटफर्म एक्सले प्रमाणित नभएका खाताहरूको संख्या घटाउने र बटहरू हटाउने लक्ष्य राखेको छ।

एक्स (पहिले ट्विटर) ले नयाँ “अबाउट दिस एकाउण्ट” सुविधा प्रस्तुत गर्ने घोषणा गरेको छ। एक्सको नयाँ सुविधाले प्रयोगकर्ताहरूको प्रोफाइलहरूको बारेमा–तिनीहरू कहाँबाट आएका हुन्, प्रयोगकर्ता नाम परिवर्तनहरूको संख्या, प्लेटफर्ममा पहिलो पटक दर्ता भएको मिति र तिनीहरूले एप कसरी स्थापना गरे भन्ने सहितका जानकारी प्रदर्शन गर्नेछ।

मानव भएको बहाना गर्ने प्रमाणित नभएका खाताहरू र बटहरूको संख्या घटाउनु यो नयाँ सुविधाको उद्देश्य भएको बताइएको छ।

उदाहरणका लागिः यदि कुनै प्रयोगकर्ताले आफू संयुक्त राज्य अमेरिकाबाट भएको दाबी गर्दा डाटाले भने खाता अर्को देशबाट आएको देखाएको खण्डमा अन्य प्रयोगकर्ताहरूले तिनीहरुको मनसायमाथि शंका गर्ने कारण हुन सक्ने उल्लेख गरिएको छ।

एक्सका उत्पादन प्रमुख, निकिता बीरले यो सुविधाको विश्वव्यापी रोलआउटलाई “ग्लोबल अगोराको अखण्डता सुनिश्चित गर्ने दिशामा एक महत्त्वपूर्ण कदमको” रुपमा वर्णन गरेकी छिन्।

साथै केही प्रयोगकर्ताहरूले एक्सले उनीहरूलाई देखाएको स्थान सही नभएको भन्ने गुनासोलाई बीरले स्वीकार गर्दै यहि मंगलबारसम्ममा ती समस्याहरू समाधान गरिने बताएको टेलिग्राफले रिपोर्ट गरेको छ।