एकीकृत सूचना प्रणालीका लागि ‘साझा सतर्कता प्रोटोकल’ कार्यान्वयन हुनुपर्नेमा सरोकारवालाहरुको जोड

काठमाडौं ।

पूर्वानुमानमा आधारित एकीकृत सूचना प्रणाली लागि साझा सतर्कता प्रोटोकल कार्यान्वयन हुनुपर्नेमा जोड दिइएको छ।

नेपाल सरकार जल तथा मौसम विज्ञान विभाग, विश्व मौसम सङ्गठन र त्रिभुवन विश्वविद्यालय सेन्टर फर एप्लाइड रिसर्च एण्ड डेभलपमेन्टको संयुक्त आयोजनामा सुर्खेत वीरेन्द्रनगरमा आज सञ्चालित ‘साझा सतर्कता प्रोटोकलका लागि मापदण्ड सञ्चालन प्रक्रिया’ कार्यशालामा सबै सरोकारवालाहरूसँग उक्त प्रोटोकल कार्यान्वयनका बारेमा परामर्श भएको हो।

उक्त कार्यशालामा बोल्दै कर्णाली प्रदेश सरकारका प्रमुख सचिव वीरेन्द्रकुमार यादवले पूर्वानुमान सूचना प्रणालीको भरपर्दो वितरणको माध्यम मिडिया नै भएको बताए। “विपद्बाट बच्न र जनधनको क्षति कम गर्नका लागि पूर्वतयारी र प्रतिकार्यमा सघाउने विश्वसनीय क्षेत्र सञ्चारमाध्यम नै हो । यसमा सञ्चारमाध्यमसहित सरोकारवाला निकायहरूले महत्त्वपूर्ण भूमिका खेल्नुपर्दछ”, प्रमुख सचिव यादवले भने।

जल तथा मौसम विज्ञान विभागका उपमहानिर्देशक विक्रम श्रेष्ठले भूगोल र भाषाअनुसारको सूचना प्रवाह गर्दा बढी प्रभावकारी हुने बताए। विभिन्न सञ्चारका कुरालई समग्रमा एकै ठाउँमा ल्याएर एउटै खालको एकीकृत सूचना जाओस् र प्रभावकारी होस् भन्ने हिसाबले विश्व मौसम सङ्गठनले साझा सतर्कता प्रोटोकल (क्याप)को परिकल्पना गरेको बताउँदै उनले यही क्षेत्रको व्यवस्थापनको पक्षमा निर्देशिका र कार्यविधि प्रयोगमा ल्याउने कार्यको विकास गर्न थालिएको जनाए।

कर्णाली प्रदेश सरकार जलस्रोत तथा उर्जा विकास मन्त्रालयका सचिव मोहनकुमार शाक्यले साझा सतर्कता प्रोटोकल मार्फत पूर्वसूचना र सावधानी अपनाउन सहयोग पुग्ने बताए। लक्षित तथा प्रभावितसम्म सूचना पुर्याउनु महत्त्वपूर्ण कुरा भएको बताउँदै उनले नेपालको पूर्वचेतावनी प्रणाली अन्तरराष्ट्रिय मापदण्डसँग मिल्नुपर्नेमा जोड दिए।

जिल्ला प्रशासन कार्यालय सुर्खेतका प्रमुख जिल्ला अधिकारी जगदीश्वर उपाध्यायले मौसमजन्य विपद् विगतभन्दा यस वर्ष कम देखिनुमा पूर्वतयारी र समयमै सूचना प्रवाह भएको दाबी गरे। उनले हरेक विपद्का घटनामा सुरक्षा निकायको सक्रिय सहभागिता रहेको जनाउँदै विपद्जन्य घटनाको प्रतिकार्यका लागि पूर्वतयारी गर्न प्रदेश, जिल्ला र स्थानीय तहका आपत्कालीन कार्य सञ्चालन केन्द्रहरूको समन्वय र सहकार्य आवश्यक भएको बताए।

उक्त कार्यशालामा वरिष्ठ जलविद् विनोद पराजुली र रोजन लामिछानेले ‘साझा सतर्कता प्रोटोकलका लागि मापदण्ड सञ्चालन प्रक्रिया’ कार्यान्वयन, प्रा डा विष्णु पाण्डे र इन्साफ अर्यालले नेपालमा दैनिक तथा घण्टामा हुने वर्षा, खतरा क्याटालगिङ, थ्रेसहोल्डका बारेमा आफ्नो प्रस्तुति राखेका थिए।

जल तथा मौसम विज्ञान कार्यालय सुर्खेतका कार्यालय प्रमुख डा.ईन्दिरा कँडेलले सुर्खेत र दैलेखको सीमा क्षेत्र रातानाङलामा रहेको राडार अवस्था र यसले दिने सूचनाको कभरेजका बारेमा जानकारी दिए।

कार्यक्रममा कर्णाली प्रदेशका सचिव, स्थानीय तह, नेपाल टेलिकम, एनसेल, रेडक्रस, सुरक्षा निकाय, सञ्चार क्षेत्रका प्रमुख एवं प्रतिनिधिसहित सबै सरोकारवालाको सहभागिता थियो । रासस