क्यान महासंघका वरिष्ठ उपाध्यक्ष अधिकारी ‘चितवन आईसीटी एक्सलेन्स अवार्ड २०२५’ बाट सम्मानित

काठमाडौं ।

क्यान महासंघ चितवन शाखाको २०औँ वार्षिक साधारणसभा सम्पन्न भएको छ। कार्यक्रममा क्यान महासंघ चितवनले चिरञ्जीवी अधिकारीलाई आईसीटी एक्सलेन्स अवार्ड २०२५ बाट सम्मानित गरेको छ।

क्यान महासंघ चितवन शाखाको २०औँ वार्षिक साधारणसभा (एजीएम) अध्यक्ष विष्णु प्रसाद लामिछानेको सभापतित्वमा सफलतापूर्वक सम्पन्न भएको छ। चितवनको बढ्दो सूचना तथा सञ्चार प्रविधि (आईसीटी) इकोसिस्टमका लागि यो एक महत्त्वपूर्ण कोसेढुंगा भएको बताइएको छ।

कार्यक्रमका प्रमुख ‘अतिथिका रूपमा क्यान महासंघ चितवन शाखाका संस्थापक कोषाध्यक्ष तथा क्यान महासंघका वरिष्ठ उपाध्यक्ष चिरञ्जीवी अधिकारीको उपस्थिति रहेको थियो।

चिरञ्जीवी अधिकारीलाई ‘चितवन आईसीटी एक्सलेन्स अवार्ड २०२५’

आईसीटी क्षेत्रमा, विशेषगरी चितवनको प्रविधि विकासमा दुई दशकदेखि गरेको अतुलनीय योगदानको कदर गर्दै चिञ्जीवी अधिकारीलाई चितवन आईसीटी एक्सलेन्स अवार्ड २०२५’ बाट सम्मान गरिएको छ।

अधिकारीले यस क्षेत्रमा डिजिटल रूपान्तरण साइबर सुरक्षा सचेतना, र क्षमता विकासका लागि निरन्तर वकालत गर्दै आएका छन्। उनको योगदानले चितवनलाई एक उदीयमान प्रविधि केन्द्र (टेक हब) को रूपमा स्थापित गर्न महत्त्वपूर्ण भूमिका खेलेको बताइएको छ।

डिजिटल चितवन फ्रेमवर्कको प्रशंसा

कार्यक्रममा नेपाल उद्योग वाणिज्य महासंघ (एफएनसीसीआई) चितवनका वरिष्ठ उपाध्यक्ष, चिरञ्जीवी सुवेदीले अधिकारीको कार्यको उच्च प्रशंसा गरे। उनले चितवनलाई आधुनिक प्रविधिमैत्री शहरको रूपमा स्थापित गर्ने उद्देश्यका साथ तयार पारिएको डिजिटल चितवन फ्रेमवर्क’ को अवधारणा र निर्माणमा अधिकारीको महत्त्वपूर्ण योगदान रहेको बताए।

२०औँ साधारणसभाको सफल समापनले क्यान महासंघ चितवन शाखाको भविष्यको लागि तयार डिजिटल इकोसिस्टम निर्माण गर्ने र नेपालको बृहत् आईसीटी लक्ष्यहरूलाई समर्थन गर्ने प्रतिबद्धता झल्काएको उल्लेख गरिउको छ। यसले यस क्षेत्रमा आईसीटी पेशेवर, विद्यार्थी, स्टार्टअप र डिजिटल उद्यमीहरूका लागि बढ्दो अवसरहरूलाई संकेत गर्दछ।