सूचना तथा सञ्चार प्रविधि र फोटोनिक्स सम्बन्धी अन्तर्राष्ट्रिय सम्मेलन आयोजना हुँदै

काठमाडौं ।

सूचना तथा सञ्चार प्रविधि र फोटोनिक्स सम्बन्धी अन्तर्राष्ट्रिय सम्मेलन (आइसिटिपि २०२६) फेब्रुअरी ११ देखि १४ सम्म होटल हायात सेन्ट्रिकमा आयोजना गरिने भएको छ।

सम्मेलन रिसर्च एण्ड इनोभेसन सेन्टर नेपाल (रिकन) र नेपाल इन्जिनियरिङ कलेज (नेक) द्वारा संयुक्त रूपमा आयोजित हुनेछ, जसमा आइट्रिपलई नेपाल च्याप्टर र आइट्रिपलईको फोटोनिक्स सोसाइटी नान्जिङ च्याप्टरको प्राविधिक प्रायोजन रहेको छ।

आयोजकले नेपालमा प्राविधिक सम्मेलन र वैज्ञानिक प्रकाशनको गुणस्तर बढाउनुका साथै नेपाली शैक्षिक संस्थाहरूभित्र अनुसन्धान संस्कृतिलाई बलियो बनाउने उदेश्यका साथा आइसिटिपि २०२६ को आयोजना गरिएको रिसर्च एण्ड इन्नोभेसन सेन्टर फर नेपाल तथा सम्मेलनका सचिव ई. विरोध रिजालले बताए। उनले यस सम्मेलनमा नेपाल, कोरिया, चीन, भारत र भियतनामका विशिष्ट प्राध्यापक तथा अनुसन्धानकर्ताहरूको सहभागीता रहने र उनीहरुले आ–आफ्ना प्रस्तुति दिने कार्यक्रम समेत रहेको बताउनु भएको छ।

अन्तर्राष्ट्रिय योगदानकर्ताहरूबाट १५० भन्दा बढी अनुसन्धान पत्रहरू सो सम्मेलनमा प्रस्तुत गरिने आइट्रिपलई नेपाल सेक्सनका अध्यक्ष डा. अरुण तिमल्सिनाले बताए।

उनले विश्वव्यापी प्रविधि मानकीकरण, अनुसन्धानको गुणस्तर मापन, र विश्व-स्तरीय सम्मेलनहरूको प्रवद्र्धनमा आइट्रिपलईको महत्त्वमा जोड दिनुभएको छ। सो सम्मेलनमा दक्षिण कोरियाको शीर्ष अनुसन्धान विश्वविद्यालय कोरिया एडभान्स्ड इन्स्टिच्युट अफ साइन्स एण्ड टेक्नोलोजी अन्तर्गतको स्कूल अफ ग्लोबल डिजिटल इनोभेसनद्वारा आयोजना गरिने ग्लोबल डिजिटल इनोभेसन र प्रभाव सम्बन्धी विशेष कार्यशाला रहेको छ।

यस कार्यशालाले विभिन्न देशका सरकारी अधिकारीहरू, नीति निर्माताहरू र डिजिटल गभर्नेन्सका नेतृत्वकर्ताहरूलाई एकसाथ ल्याएर डिजिटल गभर्नेन्सका उदीयमान नीतिहरू, एआई रणनीतिहरू र सीमापार सहकार्यबारे छलफल गर्नेछ।

आयोजकहरूले यसले नेपाललाई विश्वव्यापी विशेषज्ञहरूबाट प्रत्यक्ष रूपमा सिक्ने र राष्ट्रिय डिजिटल रूपान्तरणका लागि नयाँ मार्गहरू पत्ता लगाउने दुर्लभ अवसर प्रदान गर्ने कुरामा जोड दिए।

पत्रकार सम्मेलनमा सम्मेलनका अध्यक्ष, चाइनाको नान्जिङ युनिभर्सिटीका प्रा डा विकास नकर्मीको भिडियो सन्देशसहित अन्य मुख्य वक्ताहरूको सन्देशहरू पनि प्रस्तुत गरिएको थियो। आइसिटिपि २०२६ मा आविष्कार र नवपरवर्तनलाई प्रेरित गर्न, विश्वव्यापी सहकार्यलाई बलियो बनाउन र सुधारिएको तथा दिगो प्राविधिक विकासलाई समर्थन गर्ने ज्ञान आदानप्रदानलाई प्रोत्साहित गर्न डिजाइन गरिएका विविध सत्रहरू समावेश हुनेछन्।

यस सम्मेलनलाई प्रमुख विश्वविद्यालयहरू, इन्जिनियरिङ कलेजहरू, विश्वविद्यालय अनुदान आयोग, नेपाल विज्ञान तथा प्रविधि प्रज्ञा(प्रतिष्ठान र अन्य धेरै संस्थाहरू सहित विभिन्न राष्ट्रिय तथा अन्तर्राष्ट्रिय संस्थाहरूले सहयोग गरेका छन्।

आयोजकहरूले यस कार्यक्रमले नेपाली अनुसन्धानकर्ताहरूका उच्च(गुणस्तरका कार्यहरू सहित प्रभावकारी अनुसन्धानहरू प्रदर्शन गर्ने एक जीवन्त मञ्चको रूपमा काम गर्ने जानकारी दिए।